​ប្រែ​សម្រួលៈ​បំណង​(​ដេល្លី​ម៉េល​)៖ មជ្ឈមណ្ឌល​អវកាស​ជាតិ​កូរ៉េ​បាន​និយាយ​កាលពី​ថ្ងៃ​អង្គារ​ថា យាន​គោចរ​ព្រះ​ចន្ទ​លើកដំបូង​របស់​កូរ៉េខាងត្បូង ឈ្មោះដានូរី( Danuri​)បាន​បញ្ជូន​រូបថត​ស​ខ្មៅ​អំពី​ផ្ទៃ​ព្រះ​ចន្ទ​​និង​ផែនដី​។​

Danuri​ត្រូវ​បាន​បាញ់​បង្ហោះ​តាម​រ៉ុក្កែត SpaceX​ចេញពី​អាម៉េរិក​កាលពី​ខែ​សីហា ២០២២ និង​បាន​ចូល​ក្នុង​គន្លង​ព្រះ​ចន្ទ​កាលពី​ខែ​មុន​។​

​រូបភាព​របស់​វា ដែល​ត្រូវបាន​ថត​ចន្លោះ​ថ្ងៃ​២៤​ធ្នូ និង​១​មករា បង្ហាញ​ផ្ទៃ​ព្រះ​ចន្ទ​និង​ផែនដី​និង​ត្រូវបាន​ថត​ពីលើ​ព្រះ​ចន្ទ​យ៉ាងតិច​ចម្ងាយ​១២០​គីឡូម៉ែត្រ នេះ​បើ​តាម​សេចក្តីថ្លែងការណ៍​មួយ​របស់​វិទ្យា​​ស្ថាន​សិក្សា​ស្រាវជ្រាវ​អវកាស​កូរ៉េ​(KARI)​។​វា​បាន​បន្ថែមថា រូបភាព​និង​វីដេអូ បញ្ជូន​មក​ក៏​ត្រូវ​ប្រើ​សំរាប់​ជ្រើសរើស​ទីតាំង​ចុះចត​របស់​យាន​មួយ​លើ​ផ្ទៃ​ព្រះ​ចន្ទ​នៅ​ឆ្នាំ​២០៣២​។​

KARI​បាន​និយាយថា យាន​Danuri​នេះ​ហោះ​ជុំវិញ​ព្រះ​ចន្ទ​នៅ​រាល់​ពីរ​ម៉ោង​ម្តង ហើយ​នឹង​ចាប់ផ្តើម​បេសកកម្ម​វិទ្យាសាស្ត្រ​របស់​វា​នៅ​ខែ​ក្រោយ រួម​មាន​ការ​គូស​ផែនទី និង​វិភាគ​សណ្ឋាន​ដី​របស់​ព្រះ​ចន្ទ​​វាស់​កម្លាំង​ទំនាញ​និង​កម្ម​រស្មី​ហ្កា​ម៉ា​។​

​វា​ក៏​នឹង​សាកល្បង​បច្ចេកវិទ្យា​«​អ៊ីនធឺណិត​អវកាស​»​ដោយ​បញ្ជូន​រូបថត​និង​វីដេអូ​មកកាន់​ផែនដី​។​

​ប្រធានាធិបតី​កូរ៉េខាងត្បូង​លោក យូ​ន ស៊ុក​យ៉ូល បាន​អបអរ​សមិទ្ធផល​របស់​Danuri​ថា​ជា​«​ព្រឹត្តិការណ៍​ប្រវត្តិសាស្ត្រ​»​មួយ​នៅក្នុង​កម្មវិធី​អវកាស​របស់​ប្រទេស​។​

​សូមបញ្ជាក់​ថា កូរ៉េខាងត្បូង​បាន​ដាក់ចេញ​ផែនការ​ប្រកបដោយ​មហិច្ឆតា​សំ​រាប់​ទី​អវកាស រួម​មាន​យាន​ចុះចត​លើ​ព្រះ​ចន្ទ​នៅ​ឆ្នាំ​២០៣២ និង​ភព​អង្គារ​នៅ​យ៉ាងយូរ​ត្រឹម​ឆ្នាំ​២០៤៥៕

​យាន​គោចរ​ជុំវិញ​ព្រះ​ចន្ទ​របស់​កូរ៉េ​ខាងត្បូង​បាន​បញ្ជូន​រូបភាព​ស​ខ្មៅ​ស្តី​ពី​ព្រះ​ចន្ទ​និង​ផែនដី​