​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុម​អ្នកវិទ្យាសាស្ត្រ​ឈានមុខ ដែល​ផ្តល់​ដំបូន្មាន​ដល់​អង្គការ​សុខភាព​ពិភពលោក (WHO)​បាន​និយាយថា ពួក​គេ​ចង់បាន “​រូប​ភាពប្រាកដនិយម​បន្ថែមទៀត​” អំពី​ស្ថានភាព​កូវី​ដ​១៩ ពី​អ្នកជំនាញ​កំពូល​របស់​ចិន​នៅក្នុង​កិច្ចប្រជុំ​ដ៏​សំខាន់​មួយ​កាលពី​ថ្ងៃ​អង្គារ​ទី​៣​មករា ខណៈ​ការព្រួយបារម្ភ​បាន​កើនឡើង​អំពី​ការ​រាលដាល​យ៉ាង​ឆាប់រហ័ស​នៃ​មេរោគ​កូរ៉ូណា​។​

WHO​បាន​អញ្ជើញ​អ្នកវិទ្យាសាស្ត្រ​ចិន​ឱ្យ​ចូលរួម​កិច្ចប្រជុំ​បិទទ្វារ​តាម​អន​ឡាញ​មួយ​កាលពី​ថ្ងៃ​អង្គារ​ជាមួយនឹង​ក្រុមប្រឹក្សា​បច្ចេកទេស​របស់​ខ្លួន​ស្តីពី​ការវិវត្ត​នៃ​មេរោគ​ដើម្បី​បង្ហាញ​ទិន្នន័យ​អំពី​មេរោគ​​បំប្លែង​ដែល​កំពុង​ចរាចរ​នៅក្នុង​ប្រទេស​។ កិច្ចប្រជុំ​នេះ​មិន​បើកចំហ​ចំពោះ​សាធារណជន​ឬ​ប្រព័ន្ធ​ផ្សព្វផ្សាយ​ទេ​។​

​ចិន​បាន​ដក​វិធានការកូ​វីដ​សូន្យ​របស់​ខ្លួន​ក្នុង​ខែ​ធ្នូ ឆ្នាំ ២០២២​។ ករណី​ឆ្លងកូវី​ដ​១៩​ឥឡូវ​នេះ​កំពុង​កើនឡើង ប៉ុន្តែ​ទិន្នន័យ​ផ្លូវការ​មាន​ភាពយឺតយ៉ាវ​ណាស់​។​

​វេជ្ជបណ្ឌិត ម៉ា​រៀន គូប​មែន (Marion Koopmans) អ្នកឯកទេស​ខាង​មេរោគ​ជនជាតិ​ហូ​ឡង់​ដែល​អង្គុយ​នៅ​គណៈកម្មាធិការ WHO បាន​និយាយថា​”​យើង​ចង់​ឃើញ​រូប​ភាពជាក់ស្តែង​បន្ថែម​ទៀត​នៃ​​អ្វី​ដែល​កំពុង​កើតឡើង​”​។

​ថ្លែង​ទៅកាន់​ទីភ្នាក់ងារសារព័ត៌មាន​រ៉​យ​ទ័រ​នៅ​មុន​កិច្ចប្រជុំ លោកស្រី​បាន​និយាយថា ទិន្នន័យ​មួយចំនួន​ពី​ប្រទេស​ចិន ដូច​ជា​ចំនួន​អ្នក​សម្រាក​ព្យាបាល​នៅ​មន្ទីរពេទ្យ​គឺ “​មិន​គួរ​ឱ្យ​ជឿជាក់​ជាខ្លាំង​។​​វា​ជា​ប្រយោជន៍​របស់​ចិន​ខ្លួនឯង​ទេ​ក្នុង​ការបង្ហាញ​ព័ត៌មាន​ដែល​គួរឱ្យ​ទុក​ចិត្ត​បន្ថែមទៀត​”​។​

​សាស្ត្រាចារ្យ ទូ​លី​យ៉ូ ដេ អូ​លី​វើរ៉ា (Tulio de Oliveira) អ្នកវិទ្យាសាស្ត្រ​អាហ្វ្រិក​ខាងត្បូង​ដែល​អង្គុយ​ក្នុង​គណៈកម្មាធិការ​នេះ​ផងដែរ ហើយ​ក្រុម​របស់​គាត់​បាន​រកឃើញ​មេរោគ​បំប្លែង​ថ្មី​មួយ​ចំនួន បាន​និយាយថា “​ជា​ការពិត​” វា​ជា​ការល្អ​ក្នុង​ការទទួលបាន​ព័ត៌មាន​បន្ថែម​ពី​ប្រទេស​ចិន ប៉ុន្តែ​នេះ​ក៏​អនុវត្ត​ជា​សកល​ផងដែរ​៕

វេជ្ជបណ្ឌិត ម៉ា​រៀន គូប​មែន ទិន្នន័យ​មួយចំនួន​ពី​ប្រទេស​ចិន ដូច​ជា​ចំនួន​អ្នក​សម្រាក​ព្យាបាល​នៅ​មន្ទីរពេទ្យ​គឺ “​មិន​គួរ​ឱ្យ​ជឿជាក់​ជាខ្លាំង​”