​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អតីត​ម្ចាស់​ក្រុមហ៊ុន​រៀបចំ​ពិធី​បុណ្យសព​របស់​រដ្ឋ​ខូ​លូ​រ៉ាដូ​ត្រូវបាន​កាត់ទោស​ឱ្យ​ជាប់​ពន្ធនាគារ​សហព័ន្ធ​ចំនួន ២០​ឆ្នាំ​កាល​ពី​ថ្ងៃ​អង្គារ​ទី​៣​មករា​ពី​បទ​ឆបោក​​សាច់ញាតិ​របស់​អ្នកស្លាប់​ដោយ​ការ​កាត់​យក​បំណែក​សាក​សព​ចំនួន ៥៦០ នាក់​និង​លក់​គ្រឿងក្នុង​សាកសព​ដោយ​គ្មាន​ការអនុញ្ញាត​។​

​លោកស្រី មេហ្គា​ន ហេស (Megan Hess)​អាយុ ៤៦ ឆ្នាំ​បាន​សារភាព​ទោស​ក្នុងករណី​ឆបោក​នេះ​កាលពី​ខែកក្កដា​។ លោកស្រី​បាន​បើក​ក្រុមហ៊ុន​រៀបចំ​ពិធី​បុណ្យសព ឈ្មោះ Sunset Mesa និង ក្រុមហ៊ុន​បម្រើ​សេវាកម្ម​បរិច្ចាគ​សរីរាង្គ Donor Services ពី​អគារ​តែ​មួយ​នៅ​ទីក្រុង​ម៉ុន​ត្រូសេ (Montrose) រដ្ឋ​ខូ​ឡូ​រ៉ាដូ​។ ការជាប់គុក ២០​ឆ្នាំ​គឺជា​រយៈពេល​អតិបរមា​ដែល​ត្រូវបាន​អនុញ្ញាត​នៅ​​ក្រោម​ច្បាប់​។​

​ម្តាយ​របស់​លោកស្រី​ហេស​អាយុ ៦៩ ឆ្នាំ​ឈ្មោះ សឺ​លី កុច (Shirley Koch)​ក៏​បាន​សារភាព​ទោស​ពី​ករណី​ឆបោក​នេះដែរ ហើយ​ត្រូវបាន​កាត់ទោស​ជាប់គុក ១៥ ឆ្នាំ​។ កំណត់​ត្រា​របស់​តុលាការ​បង្ហាញថា តួនាទី​ស្នូល​របស់​លោក​ស្រីកុច​គឺកាត់​សាកសព​។​

​រដ្ឋអាជ្ញា លោក ធី​ម ណេ​ហ្វ (Tim Neff) បាន​និយាយ​នៅក្នុង​ឯកសារ​របស់​តុលាការ​ថា​”​ហេស​និង​កុច​បាន​ប្រើ​កន្លែង​រៀបចំ​ពិធី​បុណ្យសព​របស់​ពួកគេ​នៅ​ពេល​មួយ​ដើម្បី​លួច​សាកសព​និង​ផ្នែក​នៃ​​សាកសព​ដោយ​ប្រើប្រាស់​ទម្រង់​បរិច្ចាគ​ក្លែងបន្លំ និង​ឆបោក​។ ការប្រព្រឹត្ត​របស់​ហេស​និង​កុច​បណ្តាល​ឱ្យ​មាន​ការឈឺចាប់​ផ្លូវ​ចិត្ត​យ៉ាង​សម្បើម​សម្រាប់​ក្រុមគ្រួសារ​និង​ញាតិសន្តាន​របស់​សព​”​។​

​ករណី​សហព័ន្ធ​ត្រូវបាន​ជំរុញ​ឱ្យ​ធ្វើ​ឡើង​ដោយសារ​ការស៊ើបអង្កេត​ជា​បន្តបន្ទាប់​របស់​ទីភ្នាក់ងារ​សារព័ត៌មាន​រ៉​យ​ទ័រក្នុង​ឆ្នាំ ២០១៦-២០១៨ អំពី​ការលក់​គ្រឿង​ក្នុង​សាកសព​នៅក្នុង​សហរដ្ឋ​អាម៉េរិក​ដែលជា​​ឧស្សាហកម្ម​មួយ​ស្ទើរតែ​គ្មាន​ការគ្រប់គ្រង​។​

​អតីត​បុគ្គលិក​បាន​ប្រាប់​រ៉​យ​ទ័​រថា ហេស​និង​កុច​បាន​រៀបចំ​ការវះកាត់​សាកសព​ដោយ​គ្មាន​ការអនុញ្ញាត ហើយ​ប៉ុន្មាន​សប្តាហ៍​បន្ទាប់ពី​រឿងរ៉ាវ​ឆ្នាំ ២០១៨ ត្រូវបាន​ផ្សព្វផ្សាយ ទីភ្នាក់ងារ FBI បាន​ឆ្មក់​បង្ក្រាប​ក្រុមហ៊ុន​របស់​លោកស្រី​ហេស​។​

​នៅក្នុង​ឯកសារ​របស់​ពួកគេ រដ្ឋ​អាជ្ញា​បាន​សង្កត់ធ្ងន់​លើ “​ចរិត​ដ៏​សាហាវ​” នៃ​គម្រោងការណ៍​របស់លោក​ស្រី​ហេស ហើយ​បាន​ពណ៌នា​ថា​វា​ជា​ករណី​សរីរាង្គ​សាកសព​ដ៏​សំខាន់​បំផុត​មួយ​នៅក្នុង​ប្រវត្តិសាស្ត្រ​អាម៉េរិក​នា​ពេល​ថ្មីៗ​នេះ​។​

​ចៅក្រម​អាម៉េរិក​លោកស្រី គ្រីស្ទី​ន អា​គ្វេ​ឡូ (Christine Arguello) បាន​និយាយ​ក្នុងអំឡុង​សវនាការ​កាត់ទោស​កាល​ពី​ថ្ងៃ​អង្គារ​នៅ​ទីក្រុង​ហ្គ្រែ​ន​ចាំង​សិន (Grand Junction) រដ្ឋ​ខូ​ឡូ​រ៉ាដូ ថា “​នេះ​គឺជា​ករណី​ដ៏​រំជួលចិត្ត​បំផុត​ដែល​ខ្ញុំ​ធ្លាប់​ជួបប្រទះ​នៅ​កៅអី​ចៅក្រម​”​។​

“​វា​ធ្វើឱ្យ​តុលាការ​ព្រួយបារម្ភ ដែល​ចុងចោទ​ហេស​បដិសេធ​មិន​ទទួលខុសត្រូវ​ចំពោះ​ទង្វើ​របស់​ខ្លួន​”​។​

​ចៅក្រម​បាន​បង្គាប់​ឱ្យ​បញ្ជូន​ហេស​និង​កុក​ទៅ​ពន្ធនាគារ​ភ្លាមៗ​តែម្តង​៕

​លោកស្រី មេហ្គា​ន ហេស ជាប់គុក​២០​ឆ្នាំ​ពី​បទ​លក់​សរីរាង្គ​សាកសព​ដោយ​គ្មាន​ការអនុញ្ញាត