​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រព័ន្ធ​ផ្សព្វផ្សាយ​រដ្ឋ​បាន​និយាយ​កាលពី​ថ្ងៃ​ពុធ​ទី​៤​មករា​ថា ក្មេងប្រុស​វៀតណាម​អាយុ ១០​ឆ្នាំ​ម្នាក់​ដែល​បាន​ធ្លាក់​ចូល​ទៅ​ក្នុង​រណ្តៅ​ចំហរ​តូចចង្អៀត​មួយ​​នៃ​ពុម្ព​សសរ​បេតុង​នៅឯ​ការដ្ឋាន​សំណង់​នៅ​ថ្ងៃ​ចូលឆ្នាំ​សកល​ត្រូវ​បាន​បញ្ជាក់ថា​បាន​ស្លាប់​ហើយ​។​

​កាសែត​អន​ឡា​ញ VnExpress បាន​ដកស្រង់​សម្តី​មន្ត្រី​មូលដ្ឋាន​ថា ក្រុម​អ្នក​ជួយសង្គ្រោះ​បាន​ចំណាយពេល​ជិត ១០០ ម៉ោង​ដើម្បី​ព្យាយាម​រំដោះ​ក្មេងប្រុស​ឈ្មោះ ថៃ លី ហ័​រ ណា​ម (Thai Ly Hao Nam) ចេញ​ពី​សសរ​គ្រឹះ​ប្រវែង ៣៥ ម៉ែត្រ ដែល​ត្រូវបាន​ខួង​ចូលទៅក្នុង​ដី ប៉ុន្តែ​មិន​ទទួល​ជោគជ័យ​នោះ​ទេ​។​

​លោក ដ័ន តាន់​ប៊ូ (Doan Tan Buu) អនុប្រធាន​ខេត្ត​ដុង​ថាប (Dong Thap)​ភាគខាងត្បូង ត្រូវបាន​ដកស្រង់​សម្តី​ថា​”​អាជ្ញាធរ​បាន​កំណត់​ថា​ជនរងគ្រោះ​បាន​ស្លាប់​ហើយ​និង​កំពុង​ព្យាយាម​​យក​សាកសព​មក​ធ្វើបុណ្យ​”​។​

​ណា​ម​ត្រូវ​គេ​ឮ​ស្រែកយំ​ឱ្យគេ​ជួយ​ភ្លាមៗ​បន្ទាប់ពី​រូបគេ​ធ្លាក់​ចូល​ក្នុង​ពុម្ព​សសរ​បេតុង​ដែល​មាន​អង្កត់ផ្ចិត ២៥ សង់ទីម៉ែត្រ​កាលពី​ថ្ងៃ​សៅរ៍​សប្តាហ៍​មុន​នៅ​ការដ្ឋាន​សាងសង់​ស្ពាន​មួយ​ក្នុង​ខេត្ត​ដីសណ្ត​ទន្លេមេគង្គ​មួយ​នេះ ជា​កន្លែង​ដែល​រូបគេ​និង​មិត្តភក្តិ​កំពុង​ដើររក​ដែក​អេតចាយ​។​

​លោក​ប៊ូ​និយាយថា ក្មេងប្រុស​នេះ​បាន​ធ្លាក់​ចូល​ពុម្ព​សសរ​បេតុង​មួយ​ដែល​មាន​ស៊ីឡាំង​តូច ហើយ​ថា​រូបគេ​អាច​មាន​របួស​ធ្ងន់ធ្ងរ​ច្រើន​។​

​រដ្ឋាភិបាល​វៀតណាម​បាន​និយាយថា កាលពី​ព្រឹក​ថ្ងៃ​ពុធ នាយករដ្ឋមន្ត្រី​វៀតណាម លោក ផាម មិញ ជិញ​បាន​ជំរុញ​ឱ្យ​ក្រុម​អ្នក​ជួយ​សង្គ្រោះ​និង​អាជ្ញាធរ​មូលដ្ឋាន​ចល័ត​ឧបករណ៍​និង​កម្លាំង​ទាំងអស់​​ដែល​ត្រូវការ​ចាំបាច់​ដើម្បី​សង្គ្រោះ​ក្មេង​នេះ​។​

​ទាហាន​និង​អ្នកជំនាញ​ផ្នែក​វិស្វកម្ម​ប្រហែល ១០០ នាក់​ត្រូវបាន​ប្រមូលផ្តុំ​ដើម្បី​ព្យាយាម​សង្គ្រោះ​ក្មេងប្រុស​នេះ​។ ក្រុម​អ្នក​ជួយសង្គ្រោះ​បាន​ធ្វើ​ការលើក​សសរ​ចេញពី​រន្ធ​ដៅ​ជម្រៅ ៣៥ ម៉ែត្រ​ដោយ​បន្ទន់​​ដី​និង​យក​ភក់​និង​ទឹក​ចេញ​ដើម្បី​កាត់បន្ថយ​សម្ពាធ​ជុំវិញ​សសរ​៕

ទាហាន​និង​អ្នកជំនាញ​ផ្នែក​វិស្វកម្ម​ប្រហែល ១០០ នាក់​ត្រូវបាន​ប្រមូលផ្តុំ​ដើម្បី​ព្យាយាម​សង្គ្រោះ​ក្មេងប្រុស​ឈ្មោះ ថៃ លី ហ័​រ ណា​ម