​ប្រែ​សម្រួលៈ​បំណង​(​ស្ត្រេត​ថែមស៍​)៖ ចិន​និង​ហ្វីលីពីន​បាន​ព្រមព្រៀង​បង្កើត​បណ្តាញ​ទាក់ទង​ផ្ទាល់​ស្តី​ពី​សមុទ្រ​ចិន​ខាងត្បូង និង​ដោះស្រាយ​ជម្លោះ​ដោយ​អហិង្សា នេះ​បើ​តាម​អ្វី​ដែល​ប្រទេស​ទាំង​ពីរ​បាន​​ប្រកាស​នៅ​ក្នុង​សេចក្តីថ្លែងការណ៍​រួម​មួយ​ដែល​ក្រសួងការបរទេស​ចិន​បាន​ចេញ​កាលពី​ថ្ងៃ​ព្រហស្បតិ៍​ទី​៥មករា​។​

​ប្រទេស​ទាំង​ពីរ​បាន​បញ្ជាក់​ឡើងវិញ​អំពី​សារសំខាន់​នៃ​ការថែរក្សា​និង​ជំរុញ​សន្តិភាព​ព្រមទាំង​ស្ថិរភាព​តំបន់ ហើយនឹង​សេរីភាព​នាវាចរណ៍​រួមទាំង​ការហោះ​កាត់​សមុទ្រ​ចិន​ខាងត្បូង ។​ពួកគេ​ក៏​យល់ព្រម​ជំរុញ​​ពាណិជ្ជកម្ម​ទ្វេភាគី​ក្នុង​បំណង​ស្តារឡើងវិញ​ទំហំ​ពាណិជ្ជកម្ម​អោយ​ដូច​កាលពី​មុន​ពេល​ផ្ទុះ​កូវី​ដ​១៩​។​

​ឯកអគ្គរដ្ឋទូត​ចិន​ប្រចាំ​ទីក្រុង​ម៉ានីល​បាន​និយាយ​​ថា ហ្វីលីពីន​និង​ចិន​នឹង​ជំរុញ​កិច្ចសហកា​រលើ​ការ​ធ្វើ​អាជីវកម្ម​ប្រេង​និង​ហ្គាស​នៅក្នុង​តំបន់​គ្មាន​ជម្លោះ​។​

​ការសរសេរ​បង្ហោះ​របស់​ឯកអគ្គរដ្ឋទូ​ត​ចិន​កើត​ឡើង​ក្រោយ​ជំនួប​មួយ​រវាង​ប្រធានាធិបតី​ចិន ស៊ី ជីន​ភីង និង​សម​ភាគី​ហ្វីលីពីន ហ្វែរ​ឌីណ​ង់ ម៉ាកូ​ស ជូនៀ កាលពី​ថ្ងៃ​ពុធ​។​

ក្នុងជំនួប​នៅ​ក្រុង​ប៉េកាំង លោក​​ស៊ី បាន​សន្យា​ធ្វើការ​ជាមួយ​ហ្វីលីពីន​លើ​ការគ្រប់គ្រង​ដោះស្រាយ​បញ្ហា​សមុទ្រ​តាមរយៈ​ការប្រឹក្សា​យោបល់​ដោយ​មិត្តភាព បន្ត​ការចរចា​លើ​ការធ្វើ​អាជីវកម្ម​ប្រេង​និង​ហ្គាស ជំរុញ​កិច្ចសហកា​រលើ​ការធ្វើ​​អាជីវកម្ម​ប្រេង​និង​ហ្គាស​នៅ​តំបន់​គ្មាន​ជម្លោះ និង​សហការ​គ្នា​លើ​ថាមពលបៃតង​ដូចជា ថាមពល​ដោយ​ពន្លឺ ខ្យល់​និង​យានយន្ត​ថាមពល​ថ្មី​៕

​ប្រធានាធិបតី​ចិន ស៊ី ជីន​ភីង ទទួល​ជួប​សម​ភាគី​ហ្វីលីពីន​នៅ​ក្រុង​ប៉េកាំង​កាលពី​ថ្ងៃ​៤​មករា​(​រូប ស៊ីន​ហួរ​)​