ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រធានាធិបតី​បារាំង​បាន​ប្រកាស​កាលពី​ថ្ងៃ​ពុធ​ទី​៤​មករា​ថា បន្ទាប់​ពី​ការពិភាក្សា​ជាមួយ​សម​ភាគី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី​បារាំង​នឹង​​ក្លាយជា​ប្រទេស​លោកខាងលិច​ដំបូង​គេ​ដែល​ប្រគល់​រថក្រោះ​ឱ្យទៅ​អ៊ុ​យក្រែន​។​

​ចំណាត់ការ​ផ្គត់ផ្គង់រ​ថ​ក្រោះ AMX-10 RC​ដល់​អ៊ុ​យក្រែន ដែល​ជា​រថក្រោះ​ធុន​ស្រាល​ដាក់​ដំណើរការ​ចាប់តាំងពី​ទសវត្សរ៍​ឆ្នាំ​១៩៨០​និង​កំពុង​បញ្ឈប់​ការប្រើប្រាស់​បណ្តើរៗ​នៅក្នុង​យោធា​បារាំង គឺ តំណាង​​ឱ្យ​ការផ្លាស់ប្តូរ​ដ៏​សំខាន់​នៅក្នុង​ការគាំទ្រ​ផ្នែក​យោធា​របស់​បារាំង​សម្រាប់​អ៊ុ​យក្រែន​។​

​រដ្ឋាភិបាល​ក្រុង​ប៉ារីស​បាន​បញ្ជូន​កាំភ្លើង​ធំ​ទំនើបៗ រថពាសដែក មី​ស៊ី​ល​ប្រឆាំង​យន្តហោះ និង​ប្រព័ន្ធ​ការពារ​ដែនអាកាស​ឱ្យទៅ​អ៊ុយ​ក្រែន​រួចហើយ​ប៉ុន្តែ​លោក​ម៉ា​ក្រុង​មាន​ការព្រួយបារម្ភ​ជា​យូរ​មក​ហើយ​​ចំពោះ​ការបង្ក​កំហឹង​ជាមួយ​រុស្ស៊ី​និង​ការ​ផ្តាច់ទំនាក់ទំនង​ការទូត​ជាមួយ​លោក វ្ល៉ា​ឌី​មៀ ពូ​ទីន​។​

​ជំនួយការ​របស់​មេដឹកនាំ​បារាំង​បាន​ប្រាប់​អ្នកយក​ព័ត៌មាន​ក្នុង​លក្ខខណ្ឌ​មិន​បញ្ចេញ​ឈ្មោះ​បន្ទាប់​ពី​ការហៅ​ទូរស័ព្ទ​រវាង​លោក​ម៉ា​ក្រុង​និង​លោក​ហ្សេ​លេន​ស្គី ថា “​ប្រធានាធិបតី​ចង់​បង្កើន​…​ជំនួយ​”​ដល់​​អ៊ុ​យក្រែន “​ដោយ​ទទួលយក​ការ​ចែកចាយ​រថក្រោះ​ធុន​ស្រាល AMX-10 RC”​។​

​លោក​បាន​និយាយថា “​វា​ជា​លើកទីមួយ​ហើយ​ដែល​រថក្រោះ​រចនា​ដោយ​លោកខាងលិច​ត្រូវបាន​ផ្គត់ផ្គង់​ដល់​កងកម្លាំង​ប្រដាប់អាវុធ​អ៊ុ​យក្រែន​”​។​

​សម្ពន្ធមិត្ត​ណា​តូ​បាន​បង្កើន​ការគាំទ្រ​ផ្នែក​យោធា​របស់​ពួកគេ​ជា​បណ្តើរៗ​ដល់​អ៊ុយ​ក្រែន​ចាប់តាំងពី​ខែ​កុម្ភៈ​ឆ្នាំមុន ដោយ​បាន​ផ្តល់​នូវ​ប្រព័ន្ធ​សព្វាវុធ​ទំនើបៗ​កាន់តែ​ច្រើនឡើង ខណៈ​ក៏​មាន​ការព្រួយបារម្ភ​ជា​សាធារណៈ​អំពី​ហានិភ័យ​នៃ​ជម្លោះ​កើន​ឡើង​ជាមួយ​រដ្ឋាភិបាល​ក្រុង​មូ​ស្គូ​ផងដែរ​។​

​ការផ្ទេរ​យន្តហោះ​ចម្បាំង មី​ស៊ី​ល​រយៈ​ចម្ងាយ​ឆ្ងាយ និង​រថក្រោះ ត្រូវ​គេ​មើលឃើញ​ថា​ជា​សកម្មភាព​បង្កហេតុ ដែល​អាច​បង្ក​ហានិភ័យ​ដល់​ការប្រឈមមុខ​ដាក់​គ្នា​ដោយផ្ទាល់​បន្ថែម​ទៀត​រវាង​រុស្ស៊ី​និង​លោកខាងលិច​៕

​ទាហាន​អ៊ុយ​ក្រែន​ឈរ​លើ​រថក្រោះ T-80 នៅ​ទីតាំង​មិន​បញ្ចេញ​ឈ្មោះ​នៅ​ភាគ​ខាងកើត​អ៊ុ​យក្រែន កាលពី​ថ្ងៃទី​២៩ ខែ​ធ្នូ ឆ្នាំ​២០២២