​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន LG កំពុង​រចនា​បច្ចេកវិជ្ជា​អន្តរ​កម្ម​និង​ឥត​ខ្សែ​សម្រាប់​ផ្ទះ​នាពេល​អនាគត​។​

​ក្រុមហ៊ុន​ដែលមាន​មូលដ្ឋាន​នៅ​កូរ៉េខាងត្បូង​មួយ​នេះ​បាន​ប្រកាស​ទូរទស្សន៍​ឥត​ខ្សែ​ទំហំ ៩៧ អ៊ី​ញ​និង​ទូទឹកកក​ថ្លា​ដែលមាន​ទ្វារ​ប្តូរ​ពណ៌​ដើម្បី​បំពេញ​តាម​អារម្មណ៍​របស់​អ្នក​ប្រើ​នៅក្នុង​កម្មវិធី​ពិព័រណ៍​​គ្រឿង​អេឡិចត្រូនិក CES​។​

​ការ​រចនា​របស់​ទូរ​ទស្សន៍ OLED M3 ថ្មី​នេះ​បាន​ដកចេញ​នូវ​តម្រូវការ​សម្រាប់​ខ្សែ ហើយ​ផ្ទុយទៅវិញ​ត្រូវបាន​បំពាក់​តាមរយៈ​បច្ចេកវិជ្ជា Zero Connect របស់​ក្រុមហ៊ុន​ដែល​ផ្សាយ​ចេញ​នូវ​រលក​​សញ្ញា​គុណភាព HDMI ដល់​ទៅ​ជាង ៩ ម៉ែត្រ និង​ទម្រង់​អូ​ឌី​យ៉ូ​ជាច្រើន ដែល​វា​មាន​ខ្សែភ្លើង​ដោត​តែ​មួយ​ប៉ុណ្ណោះ​។​

​ទូទឹកកក​ឈ្មោះថា MoodUp ត្រូវ​បាន​ដំណើរការ​ដោយ App ដែល​អនុញ្ញាត​ឱ្យ​អ្នកប្រើប្រាស់​ជ្រើសរើស​ពី ២២ ពណ៌​សម្រាប់​បន្ទះ​ទ្វារ​ខាងលើ និង ១៩​ពណ៌​សម្រាប់​ទ្វារ​ខាងក្រោម​ដែល​អនុញ្ញាត​ឱ្យ​ពួកគេ​​ប្តូរ​រូបរាង​របស់​ទូទឹកកក​និង​បរិយាកាស​ផ្ទះបាយ​របស់​ពួកគេ​។​

LG បានបង្ហាញ​បច្ចេកវិជ្ជា​ផ្សេង​ទៀត​ជាច្រើន​ក្នុងអំឡុង​ព្រឹត្តិការណ៍ Media Day ដូចជា​ទូរទស្សន៍​ផ្សេងៗ​ជាច្រើន​ម៉ូត​ដែល​ភ្ជាប់​មក​ជាមួយ Paramount Streaming ប៉ុន្តែ​ទូរទស្សន៍ M3 និង​ទូទឹកកក MoodUp បាន​ទាក់ទាញ​ចំណាប់អារម្មណ៍​ខ្លាំង​ជាង​គេ​នៅ​ពិព័រណ៍​ឆ្នាំនេះ​។​

“​ផ្ទះ​អនាគត​” គឺជា​លំហ​ដែល​ផ្តល់ឱ្យ​អ្នករស់នៅ​នូវ​បទពិសោធន៍​អន្តរ​កម្ម បច្ចេកវិជ្ជា​ឥត​ខ្សែ និង​ការ​រចនា​ដ៏​ឆ្លាត​វៃ​។ ហើយ​ទាំងនេះ​គឺជា​អ្វី​ដែល LG បាន​បង្អួត​កាលពី​ថ្ងៃ​ពុធ​ទី​៤​មករា​។​

M3 គឺជា​ទូរទស្សន៍​ដំបូង​គេ​ដែល​លុបបំបាត់​ខ្សែ​ដែល​ត្រូវការ​ដើម្បី​ត​ភ្ជាប់​ឧបករណ៍​ផ្សេងទៀត ដូច​ជា​ឧបករណ៍​បំពង​សំឡេង​និង​ប្រអប់​ស្ទ្រី​ម​ជា​ដើម​។​

​ផ្ទុយទៅវិញ ការច្នៃប្រឌិត​ថ្មី​នេះ​មាន​ប្រអប់ Zero Connect Box ថ្មី​របស់ LG ដែល​អាច​ដាក់​នៅ​កន្លែង​ណា​ក៏​បាន​នៅក្នុង​បន្ទប់​តែមួយ​។​

​ប្រអប់​នេះ​ត្រូវបាន​រចនា​ឡើង​ដោយ​មាន​រន្ធ​ដោត​ជាច្រើន​សម្រាប់​ឧបករណ៍​ផ្សេងទៀត ហើយ​បញ្ជូន​រលកសញ្ញា​អូ​ឌី​យ៉ូនិ​ង​វីដេអូ​ដោយ​ឥត​ខ្សែ​ទៅកាន់​ទូរទស្សន៍ M3​។​

LG បាន​និយាយថា អ្នកប្រើប្រាស់​អាច​បញ្ជូន​វីដេអូ​រហូត​ដល់​កម្រិត 4K នៅ​ល្បឿន ១២០Hz ដែល​ជា​លក្ខណៈ​វិនិច្ឆ័យ​ចាំបាច់​សម្រាប់​ការលេង​ហ្គេម​និង​ការផ្សាយ​ស្ទ្រី​ម​។​

​ហើយ​មុខងារ​ទាំង​អស់​នៅលើ​ប្រអប់ Zero Connect Box គឺ​បញ្ជា​ដោយ​សំឡេង​៕

ទូរទស្សន៍ M3 និង​ទូទឹកកក MoodUp បាន​ទាក់ទាញ​ចំណាប់អារម្មណ៍​ខ្លាំង​ជាង​គេ​នៅ​ពិព័រណ៍ CES ឆ្នាំនេះ