​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន Sony និង Honda បានបង្ហាញ​ម៉ាក​រថយន្ត​អគ្គិសនី​ថ្មី​របស់​ពួកគេ ហើយ​និយាយ​ថា​ពួកគេ​សង្ឃឹមថា​នឹង​មាន​រថយន្ត​ថ្មី​ដំបូង​របស់​ក្រុមហ៊ុន​​នៅលើ​ដងផ្លូវ​ក្នុង​រយៈពេល​បួន​ឆ្នាំ​ទៀត​។​

​ការបណ្តាក់ទុន​រួមគ្នា​របស់​ក្រុមហ៊ុន​បច្ចេកវិជ្ជា​និង​រថយន្ត​ខ្នាត​យក្ស​នេះ​ត្រូវបាន​គេ​ហៅថា Afeela​ខណៈ​រថយន្ត​អគ្គិសនី​គំរូ​មួយ​បាន​បង្ហាញ​ខ្លួន​នៅ​លើ​ឆាក​ក្នុង​សន្និសីទ​សារព័ត៌មាន​របស់​ក្រុមហ៊ុន Sony មុន​ពេល​ពិព័រណ៍​បច្ចេកវិជ្ជា CES នៅ​ទីក្រុង​ឡាសវេ​ហ្គាស ដែល​បើក​នៅ​ថ្ងៃ​ព្រហស្បតិ៍​នេះ​។​

​លក្ខណៈ​បច្ចេកទេស​សំខាន់ៗ​ជាច្រើន​របស់​រថយន្ត​នៅ​មិន​ទាន់​បង្ហាញ​ទេ ប៉ុន្តែ​លោក យ៉ា​ស៊ូ​ហ៊ី​ដេ មី​ហ្ស៊ូ​ណូ (Yasuhide Mizuno) នាយក​ប្រតិបត្តិ​នៃ​ក្រុមហ៊ុន Sony Honda Mobility Group បាន​និយាយថា វា​នឹង​រួម​បញ្ចូល​គ្នា​នូវ “​ឧបករណ៍​ចាប់​សញ្ញា​របស់ Sony និង​ប្រព័ន្ធ​សុវត្ថិភាព​របស់ Honda” ដោយ​រថយន្ត​នេះ​នឹង​មាន​កាមេរ៉ា​ចំនួន ៤៥ គ្រាប់ និង​ឧបករណ៍​ចាប់​សញ្ញា​ខាងក្នុង​និង​ខាងក្រៅ ដែល​នឹង​តាមដាន​ស្ថានភាព​រថយន្ត​និង​កន្លែង​ជុំវិញ រួមទាំង​អ្នកបើកបរ​ផង​ដែរ​។​

​ក្រុមហ៊ុន Sony ក៏​បាន​និយាយ​ផងដែរ​ថា ខ្លួន​នឹង​ប្រើប្រាស់​ជំនាញ​របស់​ខ្លួន​ខាង​ហ្គេម​និង​ការកម្សាន្ត​ដើម្បី​បង្កើត​បទពិសោធន៍​ក្នុង​រថយន្ត​ពិសេស​តែមួយ​គត់​សម្រាប់​អ្នកដំណើរ​។ រូបភាព​គំរូ​នៃ​ផ្នែក​ខាងក្នុង​រថយន្ត​បានបង្ហាញ​ត្រួសៗ​អំពី​អេក្រង់​និង​បរិយាកាស​អន្តរ​កម្ម​ជាច្រើន​។​

​ផ្នែក​ខាង​មុខ​របស់​រថយន្ត​ក៏​រួម​បញ្ចូល​ផងដែរ​នូវ Media Bar ដែល​ក្រុមហ៊ុន​បច្ចេកវិជ្ជា​យក្ស​នេះ​និយាយថា អាច​ត្រូវបាន​ប្រើ​ដើម្បី​ចែករំលែក​ព័ត៌មាន​ជាមួយ​មនុស្ស​ជុំវិញ​រថយន្ត​អគ្គិសនី​នេះ រួម​ទាំង​ការព្រមាន​និង​ព័ត៌មាន​លម្អិត​អំពី​ការ​សាក​ភ្លើង​ផងដែរ​។​

​លោក​មី​ហ្ស៊ូ​ណូបាន​និយាយថា រថយន្ត Afeela សង្ឃឹម​ថា​ចាប់ផ្តើម​លក់​នៅ​ឆ្នាំ ២០២៥ ដោយ​រថយន្ត​ដំបូង​ទាំងនោះ​នឹង​ដឹក​ទៅ​អាម៉េរិក​ខាងជើង​នៅ​និទាឃ​រដូវ​ឆ្នាំ ២០២៦៕

​រថយន្ត​អគ្គិសនី Afeela បាន​បង្ហាញ​ខ្លួន​នៅ​លើ​ឆាក​ក្នុង​សន្និសីទ​សារព័ត៌មាន​របស់​ក្រុមហ៊ុន Sony មុន​ពេល​ពិព័រណ៍​បច្ចេកវិជ្ជា CES នៅ​ទីក្រុង​ឡាសវេ​ហ្គាស ដែល​បើក​នៅ​ថ្ងៃ​ព្រហស្បតិ៍​នេះ​