ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កងកម្លាំង​សន្តិសុខ​ម៉ិក​ស៊ិ​កបានចាប់ខ្លួន​លោក អូ​វី​ឌី​អូ គូ​ស្មាន់ (Ovidio Guzmán)​ជា​អ្នក​ជួញដូរ​គ្រឿងញៀន​ដែល​អាម៉េរិក​តាម​ចាប់ខ្លួន​និង​ជា​កូនប្រុស​​របស់​អតីត​ចៅហ្វាយ​ក្រុម​ជួញដូរ​គ្រឿងញៀន Sinaloa លោក ចាវ​គីន “​អែល​ឆា​ប៉ូ​” គូ​ស្មាន់ (Joaquín “El Chapo” Guzmán) នៅក្នុង​ប្រតិបត្តិកា​រទាំង​ព្រលឹម​ថ្ងៃ​ព្រហស្បតិ៍​ទី​៥​មករា​ដែល​​នាំឱ្យ​មាន​ការបាញ់ប្រហា​រ​គ្នា​និង​ការបិទផ្លូវ​នៅ​ទូ​ទាំង​រដ្ឋធា​នីម៉ិក​ស៊ី​កូ​។​

​រដ្ឋមន្ត្រី​ការពារជាតិ​លោក ល្វីស ក្រេសិ​ន​ស្យូ សាន់​ដូ​វ៉ា​ល់ (Luis Cresencio Sandoval) បាន​និយាយថា ទាហាន​និង​បុគ្គលិក​ឆ្មាំ​ជាតិ​បាន​ចាប់​កូនប្រុស​របស់ “​អែល​ឆា​ប៉ូ​”​។​

​អូ​វី​ឌី​អូ គូ​ស្មាន់ ដែល​មាន​រហស្សនាម​ថា “​អា​កណ្តុរ​” មិនមែន​ជា​កូនប្រុស​ល្បីឈ្មោះ​បំផុត​របស់​លោក​អែល​ឆា​ប៉ូ​នោះ​ទេ​រហូត​ដល់​ការចាប់​រូបគេ​បរាជ័យ​កាលពី​បី​ឆ្នាំ​មុន​។ ការប៉ុនប៉ង​នោះ​ក៏​បាន​បង្កើត​អំពើហិង្សា​នៅ​ទីក្រុង​គូលី​យ៉ា​កាន់ (Culiacan) ផងដែរ ដែល​នៅ​ទីបំផុត​បាន​នាំឱ្យ​ប្រធានាធិបតី អង់​ដ្រេ​ស ម៉ា​នូ​អែល ឡូប៉េស អូ​ប្រាដ័​រ (Andrés Manuel López Obrador) បញ្ជា​ឱ្យ​យោធា​ដោះលែង​រូបគេ​។​

​ការចាប់ខ្លួន​ដ៏​កក្រើក​កាលពី​ថ្ងៃ​ព្រហស្បតិ៍​បាន​កើតឡើង​ប៉ុន្មាន​ថ្ងៃ​មុនពេល​លោក​ឡូប៉េស អូ​ប្រាដ័​រ នឹង​ធ្វើជា​ម្ចាស់ផ្ទះ​ទទួល​ប្រធានាធិបតី​អាម៉េរិក ចូ បៃ​ដិន​សម្រាប់​កិច្ចពិភាក្សា​ទ្វេភាគី​បន្ទាប់​ពី​កិច្ច​​ប្រជុំ​កំពូល​មេដឹកនាំ​អាម៉េរិក​ខាងជើង​របស់​ពួកគេ​ជាមួយ​នាយក​រដ្ឋមន្ត្រី​កាណាដា ចា​ស្ទីន ទ្រូ​ដូ​។ ​ការជួញដូរ​គ្រឿងញៀន​រួមជាមួយ​នឹង​អន្តោប្រវេសន៍​ត្រូវ​គេ​រំពឹងថា​នឹង​ក្លាយជា​ចំណុច​សំខាន់​ត្រូវ​លើក​មក​និយាយ​។​

​លោក ម៉ៃ វី​ជី​ល (Mike Vigil) អតីត​ប្រធាន​ប្រតិបត្តិការ​អន្តរជាតិ​របស់ DEA បាន​និយាយ​កាលពី​ថ្ងៃ​ព្រហស្បតិ៍​ថា “​នេះ​គឺជា​ការ​វាយ​សំពង​យ៉ាង​ខ្លាំង​លើ​ក្រុម​ជួញដូរ​គ្រឿងញៀន Sinaloa​និង​​ជា​ជ័យជម្នះ​ដ៏​សំខាន់​សម្រាប់​នីតិរដ្ឋ​។ ទោះយ៉ាងណា វា​នឹង​មិន​រារាំង​លំហូរ​គ្រឿងញៀន​ចូល​ទៅ​សហរដ្ឋ​អាម៉េរិក​នោះទេ​។ សង្ឃឹម​ថា​ម៉ិក​ស៊ិក​នឹង​ធ្វើប​ត្យា​ប័ន​រូបគេ​ទៅ​សហរដ្ឋ​អាម៉េរិក​”៕

​អូ​វី​ឌី​អូ គូ​ស្មាន់ ត្រូវបាន​ម៉ិក​ស៊ិក​ចាប់ខ្លួន​កាលពី​ថ្ងៃ​ព្រហស្បតិ៍

​ការចាប់ខ្លួន​អូ​វី​ឌី​អូ គូ​ស្មាន់ នាំ​អោយ​ផ្ទុះ​អំពើហិង្សា​ពី​ក្រុម​ជួញ​ថូរ​ថ្នាំញៀន​