​ប្រែ​សម្រួលៈ​បំណង​(​ស្ត្រេត​ថែមស៍​)៖ នាវាចម្បាំង​អាម៉េរិក​មួយ​បាន​បើក​កាត់​ច្រក​សមុទ្រ​តៃវ៉ាន់​ដែល​មាន​ការ​ប្រទាញប្រទង់​គ្នា​កាលពី​ថ្ងៃ​ព្រហស្បតិ៍ ជា​ផ្នែក​នៃ​អ្វីដែល​យោធា​អាម៉េរិក​ហៅថា សកម្មភាព​បើក​​ឆ្លងកាត់​ធម្មតា​ដើម្បី​សេរីភាព​នាវាចរណ៍ តែ​តែងតែបង្ក​កំហឹង​ពី​ចិន​ប៉េកាំង​។​

​នៅ​ប៉ុន្មាន​ឆ្នាំ​មកនេះ នាវាចម្បាំង​អាម៉េរិក​និង​មាន​មួយ​ពេល​នោះនាវា​មកពី​បណ្តា​ប្រទេស​សម្ពន្ធមិត្ត ដូចជា​អង់គ្លេស​និង​កាណាដា បាន​បើក​កាត់ផ្លូវទឹក​ដ៏​រសើប​នេះ ដោយ​បង្ក​ការ​ថ្កោលទោស​ពី​ចិន​​ដែល​ចាត់​ទុក​ទាំង​កោះ​​និង​ច្រក​សមុទ្រ​តៃវ៉ាន់​ជា​ផ្នែក​នៃ​ទឹកដី​របស់​ខ្លួន​។​

​នៅក្នុង​សេចក្តីថ្លែងការណ៍​មួយ យោធា​អាម៉េរិក​បាន​និយាយថា នាវា​ពិឃាត​ជុង​-​ហ៊ូ​ន​(Chung-Hoon)​បំពាក់​កាំជ្រួច​បញ្ជា​នាំ​ផ្លូវ​បាន​ធ្វើ​ការបើក​ឆ្លងកាត់​ច្រក​សមុទ្រ​តៃវ៉ាន់​ដើម្បី​«​បង្ហាញ​ការប្តេជ្ញាចិត្ត​​របស់​អាម៉េរិក​ចំពោះ​តំបន់​ឥណ្ឌូ​ប៉ាស៊ីហ្វិក​មួយ​សេរី​និង​បើកចំហ​»​។​

​ក្រសួង​យោធា​តៃវ៉ាន់​បាន​និយាយថា នាវា​នេះ​បាន​បើក​ទៅ​ទិស​ខាងជើង​កាត់​ច្រក​សមុទ្រ​និង​ថា​កងកម្លាំង​របស់​ខ្លួន​បាន​តាមដាន​ដំណើរ​របស់​វា ហើយ​មិន​បាន​សង្កេតឃើញ​អ្វី​ខុស​ពី​ធម្មតា​ទេ​។​

​សូមបញ្ជាក់​ថា ផ្លូវទឹក​តូច​នេះ​តែងតែ​ជា​ប្រភព​នៃ​ភាព​តានតឹង​យោធា​ចាប់តាំងពី​កងកម្លាំងសាធារណរដ្ឋ​ចិន​ដែល​ចាញ់​សង្គ្រាមស៊ីវិល​បាន​ភៀសខ្លួន​ពី​ចិនដីគោក​ទៅកាន់​កោះ​តៃវ៉ាន់​នៅ​ឆ្នាំ​១០៤៩​។​អាម៉េរិក​​មិន​មាន​ទំនាក់ទំនង​ការទូត​ជាមួយ​តៃវ៉ាន់​ទេ តែ​មាន​ច្បាប់​មួយ​ធានា​ផ្តល់​មធ្យោបាយ រួម​មាន​ការផ្គត់ផ្គង់​សព្វាវុធ​អោយតៃវ៉ាន់ការពារ​ខ្លួនឯង​។​

​ចំណែក​ចិន​ក៏​មិន​ដែល​ច្រាន​ចោល​លទ្ធភាព​នៃ​ការប្រើ​កម្លាំងយោធា​ដើម្បី​នាំ​កោះ​នេះ​មក​ធ្វើ​ការបង្រួបបង្រួម​ជាមួយ​មហា​ចិនដីគោក​វិញដែរ៕