​ប្រែ​សម្រួលៈ​បំណង​(​ស្ត្រេត​ថែមស៍​)៖ ព្រះអង្គម្ចាស់​ហារី បាន​ទទួល​ស្គាល់​ថា​ទ្រង់​បាន​សម្លាប់​មនុស្ស​២៥​នាក់​ក្នុងអំឡុងពេល​ទ្រង់ធ្វើ​ជា​អ្នកបើក​ឧទ្ធម្គាគចក្រ​Apache​នៅ​អា​ហ្វ​ហ្គានី​ស្ថាន នេះ​បើ​តាម​សារព័ត៌​​មាន​អង់គ្លេស​ចុះ​ផ្សាយ​កាលពី​ថ្ងៃ​ព្រហស្បតិ៍ ដោយ​ស្រង់​ចេញពី​សៀវភៅ​កំណត់​ប្រវត្តិ​មួយ​របស់​ទ្រង់​។​

​រំលឹកថា ព្រះអង្គម្ចាស់​វ័យ​៣៨​វស្សា​អង្គ​នេះ​ធ្លាប់​ត្រូវបាន​បញ្ជូន​ទៅ​បំពេញ​បេសកកម្ម​ប្រឆាំង​ក្រុម​ឧទ្ទាម​តា​លី​បង់​នៅ​អា​ហ្វ​ហ្គានី​ស្ថាន​ពីរដងដោយ​បេសកកម្ម​ទីមួយ​ជា​អ្នកគ្រប់គ្រង​បញ្ជា​ការហោះហើ​រលើ​ការ​វាយ​​ប្រហារ​តាម​អាកាស​នៅ​ឆ្នាំ​២០០៧-២០០៨ និង​បន្ទាប់​មកជាអ្នកបើក​ឧទ្ធម្ភាគចក្រ​ប្រយុទ្ធ​ធុន​Apache​នៅ​ឆ្នាំ​២០១២-២០១៣​។​

​ក្នុង​សៀវភៅ​កំណត់​ប្រវត្តិ​Spare​ដែល​ត្រូវ​ចេញលក់​នៅ​សប្តាហ៍​ក្រោយ ព្រះ​អង្គ​បាន​មានបន្ទូលថា ទ្រង់​បាន​បំពេញបេសកកម្ម​៦​លើកជា​អាកាសយានិក​ម្នាក់ ដែល​នាំ​អោយ​ព្រះអង្គ​«​យកអាយុ​ជីវិត​មនុស្ស​» នេះ​បើ​តាម​សារព័ត៌មាន​Daily Telegraph​បាន​រាយការណ៍​។​ហារី​បានបញ្ជាក់​ថា វា​មិន​ជា​មោទនភាព​ឬ​ភាពអាម៉ាស​អីទេ​និង​បាន​ពណ៌នា​ការកំទេច​គោលដៅ​ងាយស្រួលដូចជា​«​ការដក​គ្រាប់​អុក​»​ចេញ​​ពី​ក្តារអុក​។​

​វីដេអូ​បំពាក់​នៅ​ច្រមុះ​ឧទ្ធម្ភាគចក្រ​Apache អនុញ្ញាត​អោយ​ទ្រង់​អាច​វាយ​តំលៃ​លទ្ធផល​បេសកកម្ម​និង​កំណត់​ថា​តើ​បាន​សម្លាប់​មនុស្ស​បាន​ប៉ុន្មាន​នាក់​។​កន្លង​មក​ព្រះអង្គម្ចាស់​មិន​ដែន​ពិភាក្សា​ជា​សា​​ធា​រណៈ​អំពី​ចំនួន​សមាជិក​ក្រុម​តា​លី​បង់​ដែល​ទ្រង់​បាន​សម្លាប់​ទេ​។​

​ព្រះអង្គម្ចាស់​ចាត់ទុក​អំ​ពើ​របស់​ទ្រង់​ថា​ជា​ការងារ​ត្រឹមត្រូវ​ដោយសារ​តែ​អនុស្សាវរីយ៍​នៃ​ការវាយប្រហារ​ភេរវកម្ម​១១​កញ្ញា នៅ​សហរដ្ឋ​អាម៉េរិក និង​បន្ទាប់​ពី​បាន​ជួប​ក្រុមគ្រួសារ​ជនរងគ្រោះ​។​

​ព្រះអង្គម្ចាស់​ហារី បាន​បំរើការ​ដប់ឆ្នាំ​ក្នុង​កងទ័ព​អង់គ្លេស ដោយ​ឡើង​ឋានៈ​ដល់​ស័ក្តិ​បី និង​បាន​ពណ៌នា​ពេលវេលា​របស់ទ្រង់​នៅក្នុង​ជួរ​យោធា​ថា​ជា​ឆ្នាំ​ទទួល​ការអប់រំ​បំផុត​។​

​ក្រោយ​ពី​បំពេញ​បេសកកម្ម​នៅ​អា​ហ្វ​ហ្គានី​ស្ថាន ព្រះអង្គម្ចាស់​ហារី​បាន​សម្តែង​ការព្រួយបារម្ភ​អំពី​សន្តិសុខ​របស់​ទ្រង់​ដោយ​មិន​ត្រឹមតែ​ដោយ​សារ​តែ​ទ្រង់​ជា​សមាជិក​រាជវង្ស សំខាន់​ព្រះអង្គ​បាន​ចូលរួម​ប្រយុទ្ធ​​ប្រឆាំង​នឹង​ពួកនិយម​ជ្រុល​អ៊ីស្លាម​៕

​ព្រះអង្គម្ចាស់​ហារី​ក្នុង​បេសកកម្ម​នៅ​អា​ហ្វ​ហ្គានី​ស្ថានក្នុង​ឆ្នាំ​២០០៨​និង​២០១២