​ប្រែ​សម្រួលៈ​បំណង​(​ស្ត្រេត​ថែមស៍​)៖ ចិន​បាន​ច្រាន​ចោល​ការសុំ​ផ្តល់​វ៉ាក់សាំង​ទំនើប​ម្តង​ជា​ពីរ​ដង​នៅ​ពេល​រដ្ឋាភិបាល​ទីក្រុង​ប៉េកាំង​កំពុង​ខិតខំ​ទប់ទល់​នឹង​រលក​កូវី​ដ​១៩​ដ៏​រាលដាល​ចំ​ពេល​ពួក​មន្ត្រី​​អាម៉េរិក​ព្រួយបារម្ភ​អំពី​ការ​ផ្ទុះ​ឡើង​វិញ​ជំងឺ​កូវី​ដ​១៩​នៅ​ចិន​។​

​អាម៉េរិក​សុំ​ផ្តល់​វ៉ាក់សាំង​ទំនើប​ប្រឆាំង​កូវី​ដ​១៩ ដល់​ចិន​តាម​បណ្តាញ​មិន​ផ្លូវការ​

​ដោយ​បារម្ភ​អំពី​ការកកើតឡើង​នៃ​វីរុស​បំប្លែង​ខ្លួន​ថ្មីនិង​ផល​របស់​វា​លើ​សេដ្ឋកិច្ច​ចិន អាម៉េរិក​ម្តង​ហើយ​ម្តងទៀត​បាន​សុំ​ផ្តល់​វ៉ាក់សាំង​ប្រើ​បច្ចេកវិទ្យា​mRNA​និង​ជំនួយ​ដទៃ​ទៀត​ទៅ​កាន់​រដ្ឋាភិបាល​របស់​​ប្រធានាធិបតី​ស៊ី ជីន​ភីង តាម​បណ្តាញ​ឯកជន នេះ​បើ​តាម​ការ​អោយ​ដឹង​ពី​មន្ត្រី​អាម៉េរិក​ដែល​សុំ​មិន​បញ្ចេញ​ឈ្មោះ​។​

​ពួក​មន្ត្រី​អាម៉េរិក​ក៏​បាន​ស្នើ​បង្កើត​ផ្លូវ​មិនផ្ទាល់​ដើម្បី​ផ្គត់ផ្គង់​វ៉ាក់សាំង​ក្នុង​កិច្ច​ខិតខំសម្រួល​ភាព​រសើប​ផ្នែកនយោបាយ​នៅ​ចិន​ចំពោះ​ការទទួល​ជំនួយ​អាម៉េរិក​។​

​ការសុំ​ផ្តល់​របស់​អាម៉េរិក​ធ្វើឡើង​ដោយ​មន្ត្រី​ការទូត​ជាន់ខ្ពស់ រួម​មាន​ក្នុងអំឡុង​ដំណើរ​ទស្សនកិច្ច​របស់​អនុ​រដ្ឋមន្ត្រីការបរទេស​អាម៉េរិក ដា​នៀល គ្រី​ថិ​ន​ប្រ៊ី​ង​(Daniel Kritenbrink)​និង​នាយក​​ជាន់ខ្ពស់​នៃ​ក្រុមប្រឹក្សា​សន្តិសុខ​ជាតិ​អាម៉េរិក លួ​រ៉ា រ៉ូ​សិន​ប៊ឺ​ហ្គ័​រ​(Laura Rosenberger)​កាលពី​ខែ​ធ្នូ ព្រម​ទាំង​តាមរយៈ​មន្ត្រី​សុខាភិបាល​និង​អន្តរការី​។​

​ក្រសួងការបរទេស​ចិន​មិន​បាន​ឆ្លើយតប​នឹង​សំណួរ​អ្នកកាសែត​ភ្លាមៗ​នៅឡើយ​ទេ តែ​គេ​ថា​រដ្ឋាភិបាល​ទីក្រុង​ប៉េកាំ​ង​បាន​ច្រាន​ចោល​ម្តង​ជា​ពីរ​ដង​សំណើ​របស់​អាម៉េរិក​និង​ថា ខ្លួន​«​មាន​វ៉ាក់សាំង​គ្រប់​​គ្រាន់​»ហើយ​។​

​ពួក​អ្នកវិភាគ​និយាយថា ការព្រម​ទទួលយក​វ៉ាក់សាំង​mRNA​ពី​អាម៉េរិក​នឹង​បង្ហាញ​ថា ចិន​បរាជ័យ​ក្នុង​ការអភិវឌ្ឍ​និង​ផលិត​វ៉ាក់សាំង​កូវី​ដ​១៩​តាម​បច្ចេកវិទ្យា​mRNAផ្ទាល់​របស់​ខ្លួន​ចំ​ពេល​ដែល​ចិន​ជំរុញ​​ការ​ពឹង​លើ​ខ្លួនឯង ក្នុង​យុទ្ធសាស្ត្រ​ធំ​មួយ​ដើម្បី​ទប់ទល់​នឹង​យុទ្ធនាការ​រាំងខ្ទប់​ពី​អាម៉េរិក​មិន​អោយ​ចិន​ងើបផុតខ្លួន​។​

​សូមបញ្ជាក់​ថា ចិន​រំពឹងថា​នឹង​មាន​កំណើន​នៃ​ការធ្វើដំណើរ​ក្នុងអំឡុង​រដូវចូលឆ្នាំ​ចិន​នាពេលខាងមុខ ដោយ​ការធ្វើដំណើរ​ប្រហែលជា​២,១​ទ្រី​លាន​ជើង នឹងធ្វើឡើងតាម​ផ្លូវគោក អា​កាស​និង​ផ្លូវទឹក ដោយ​កើន​លើស​​ពេល​ដូច​គ្នា​កាលពី​ឆ្នាំមុន​។​ការបន្ធូរបន្ថយ​ការគ្រប់គ្រង​កូវី​ដ​កាលពីពេល​ថ្មីៗ​និង​ការបើក​ព្រំដែន​ឡើងវិញ​ចាប់ពី​ចុង​សប្តាហ៍​នេះ​ទៅ​វា​នឹង​ជំរុញ​អោយ​មនុស្ស​វិល​ទៅ​ស្រុក​និង​ចេញ​ទៅ​ក្រៅប្រទេស​តែ​វា​កំពុង​បង្កការ​ព្រួយបារម្ភ​អំពី​ការនាំ​មេ​រោគកូ​វីដ​១៩​ទៅ​ពាសពេញ​ផ្ទៃ​ប្រទេស​ដោយ​មិន​អាច​គ្រប់គ្រង​បាន​៕

​ការធ្វើដំណើរ​របស់​ប្រជាជន​ចិន​ក្នុងអំឡុងពេល​ចូលឆ្នាំថ្មី​២១-២៧​មករា ត្រូវ​រំពឹងថា​នឹង​កើន​ទ្វេ រហូត​ល់​២,១​ទ្រី​លាន​ជើង