ដោយៈ​ ចាន់តូ​/​ភ្នំពេញ​: មន្ត្រីនគរបាល​ម្នាក់​ត្រូវបាន​ប្រពន្ធ​តាម​ទាន់​លួចលាក់​មាន​ស្រី​ថ្មី នៅ​បន្ទប់​ជួល ហើយ​មានទំនាស់​គ្នា​បែកផ្សែង​ប្តឹង​នគរបាល​មូលដ្ឋាន​អោយជួយ​អន្តរាគមន៍ តែ​ស្រី​ស្នេហ៍ និង​បុរស​ជា​ប្តី បាននាំគ្នា​រត់គេចខ្លួន​បាត់ស្រមោល កាលពី​វេលា​ម៉ោង​ប្រមាណ​១២:៣០​នាទី​យប់ ឈានចូល​ថ្ងៃទី​០៦ ខែមករា ឆ្នាំ​២០២៣ នៅ​ចំណុច​បន្ទប់​ជួល​មួយកន្លែង ក្នុងភូមិ​វិមាន​ទ្រុង សង្កាត់​ក្រាំងធ្នង់ ខណ្ឌ​សែន​សុខ រាជធានី​ភ្នំពេញ​។​

​បុរស​ជា​ប្តី ឈ្មោះ​ប្រាក់ សុភា​រ៉ា ភេទ​ប្រុស អាយុ ៣៦ ឆ្នាំ មុខ របរ​ជា​មន្ត្រីនគរបាល​ថ្នាក់​អនុសេនីយ៍ឯក (​ពាក់​ស​ក្ត័​៣) នៅ​រាជបណ្ឌិតសភា​។ ចំណែក​ស្ត្រី​ជា​ប្រពន្ធ ឈ្មោះ សុខ ថាវ​រី អាយុ​២៩​ឆ្នាំ មាន​លំនៅ​ស្នាក់នៅ ភូមិ​៣ ឃុំ​ក្អម​សំណ ស្រុក​លើកដែក ខេត្តកណ្ដាល​។ មានកូន​ស្រី​តូច​ម្នាក់​រស់នៅ​ក្នុងបន្ទុក​។ ដោយឡែក នារី​ជា​ស្រី​ស្នេហ៍ ពុំ​ត្រូវបាន​ស្គាល់​អត្តសញ្ញាណ​ឡើយ​។​

​តាម​ស្ត្រី​ជា​ប្រពន្ធ បានអោយដឹងថា គាត់​នឹង​ប្តី បានរួម​រស់នៅ​ជាមួយគ្នា ជា​ប្តី​ប្រពន្ធ​រយៈពេល ៤​ឆ្នាំ មកហើយ ដោយ​ពុំបាន​រៀបការ​ឡើយ​បានត្រឹមតែ​សែនព្រេន និង​បាន​ចុះ​អេ​តា​ស៊ីវិល​ត្រឹមត្រូវ​។ ការរស់នៅ​ជាមួយគ្នា បានកូន​ស្រី​មួយ ។​នៅពេល​ថ្មីៗ គាត់​២​នាក់​ប្តី ប្រពន្ធ មិនសូវ​ចុះសម្រុង​គ្នា ហើយ ប្តី តែងតែ បង្ក​ជំលោះ​ក្នុង​គ្រួសារ និង​ប្រើ​ហឹ​ង្សា​ជា​ញឹកញាប់ និង​បានគេច​មិន​ចូល​ផ្ទះ​។​

​តាម​ស្ត្រី​ជា​ប្រពន្ធ​បាន​អោយដឹងទៀតថា ដោយមាន​ការសង្ស័យ​គាត់​ក៍បាន​ជួល​គេ​ឲ្យ​តាមដាន​ប្តី និង​ដឹង​ដំណឹង​ថា ប្តី​មាន​ស្រី និង​បើករថយន្ត​ស្លាក​លេខ នគរបាល មក​ដេក​នៅផ្ទះ​ជួល​ជាមួយ​ស្រី​ស្នេហ៍ ខាងលើ​។ បន្ទាប់មក​គាត់​ក៍បាន​នាំ ម្តាយ និង​កូនស្រី​ជួល​រថយន្ត​គេ​ជិះ​មកពី​ស្រុកកំណើត​តាមរក​ប្ដី​ហើយ បាន​ប្រទះឃើញ ប្តី នៅក្នុង​បន្ទប់​ជួល​ជាមួយ​ស្រី​ស្នេហ៍ ក៏មាន​ទំនាស់​គ្នា បង្ក​អោយ​ផ្អើល​ពេញ​ភូមិ ។ ខណៈនោះ បុរស​ជា​ប្តី បាន​គំរាមកំហែង​ប្រុង​ប្រើ​ហឹ​ង្សា​មកលើ​ស្ត្រី​ជា​ប្រពន្ធ​ទៀតផង​៕/R​