​ដោយ​: បូកគោ​/​កំពត​: អាជ្ញាធរ និង​មន្ត្រី​ជំនាញ​បាន​អះអាងថា ប្រជាពលរដ្ឋ​គ្រប់​មូលដ្ឋាន​នៅ​ទូទាំង​ខេត្តកំពត​ភាគច្រើន​បានទទួល​វ៉ាក់សាំង​ការពារ​ជំងឺ​កូ​វីដ​-១៩ ដូ​ស​ទី​បួន​។ បច្ចុប្បន្ន​ពលរដ្ឋ​កំពុង​ត្រៀម​ចាក់​ដូ​ស​បន្ទាប់​ខណៈដែល​ដូ​ស​ទី​៦ នឹង​ចាប់ផ្តើម​ចាក់​នា​ថ្ងៃទី​៩ ខែមករា ឆ្នាំ​២០២៣​ខាងមុខ​។ អាជ្ញាធរ​កំពុង​បន្ត​ផ្សព្វផ្សាយ និង​ជំរុញ​ពលរដ្ឋ​ឲ្យ​មក​ទទួល​វ៉ាក់សាំង​គ្រប់​ដូ​ស​តាម​ពេលវេលា​កំណត់​។​

​លោក​នូ ច័ន្ទ​ដា អភិបាលស្រុក​បន្ទាយមាស​បាន​មាន​ប្រសា​ន៍​ថា​ការចាក់​វ៉ាក់សាំង​ការពារ​ជំងឺ​កូ​វីដ​-១៩​ជា​កត្តា​សំខាន់​ដើម្បី​ធានា​ដល់​អាយុជីវិត និង​សេដ្ឋកិច្ច​គ្រួសារ​របស់​ប្រជាពលរដ្ឋ សហគមន៍ និង​សង្គមជាតិ​។ កន្លងមក អាជ្ញាធរ​ស្រុក​បាន​សហការ​យ៉ាងសកម្ម​ជាមួយ​មន្ត្រី​ជំនាញ​ក្នុងការ​ផ្សព្វផ្សាយ និង​ជំរុញ​ប្រជាពលរដ្ឋ​មក​ទទួល​វ៉ាក់សាំង​ឲ្យ​បាន​គ្រ​ប់ដូ​ស​តាម​ពេលវេលា​កំណត់​។ លោក​អភិបាលស្រុក​បានបញ្ជាក់​ថា​បច្ចុប្បន្ន​ប្រជាពលរដ្ឋ​នៅតាម​មូលដ្ឋាន​ប្រមាណ​ជាង​៨០​ភាគរយ​បានទទួល​វ៉ាក់សាំង​ដូ​ស​ទី​៤​។

​ប្រជាពលរដ្ឋ​រស់នៅ​ភូមិ​ព្រែក​ចេក ឃុំ​ទូក​មាស​ខាងលិច ស្រុក​បន្ទាយមាស​បាន​ប្រាប់​ឲ្យ​ដឹងថា​ពួកគាត់​កំពុង​ត្រៀម​ទទួល​វ៉ាក់សាំង​ដូ​ស​ទី​៥ និង​ដូ​ស​បន្តបន្ទាប់​ទៀត​តាម​ការណែនាំ​របស់​អាជ្ញា​ធរ​។ ការទទួល​វ៉ាក់សាំង​នៅក្នុង​មូលដ្ឋាន​មាន​ភាពងាយស្រួល និង​មិន​រំខាន​ដល់​ការងារ​ប្រចាំថ្ងៃ​ឡើយ​។ ប្រជាពលរដ្ឋ​បាន​បញ្ជាក់ថា​ទាំងនេះ​ដោយសារ​ការយកចិត្តទុកដាក់​របស់​អាជ្ញាធរ និង​មន្ត្រី​ជំនាញ​ពាក់ព័ន្ធ​ដោយ​មិន​គិតពី​ពេលវេលា​ផ្ទាល់ខ្លួន​។​
តាម​របាយការណ៍​ពី​មន្ទីរ​សុខាភិបាល​ខេត្តកំពត​បានបញ្ជាក់​ថា​លទ្ធផល​នៃ​ការចាក់​វ៉ាក់សាំង​ជូន​ប្រជាពលរដ្ឋ​ខេត្តកំពត រួមមាន ដូ​ស​ទី​១ ពី​អាយុ​៣​ឆ្នាំ​ឡើង​បាន​ប្រមាណ​ជាង ៥៥​ម៉ឺន​នាក់ ស្មើ​១០៤​ភាគរយ​នៃ​ផែនការ​ប្រជាពលរដ្ឋ​ដែល​ត្រូវ​ទទួល​វ៉ាក់សាំង​។ ដូ​ស​ទី​២​បាន​ជាង​៥២​ម៉ឺន​នាក់ ដូ​ស​ទី​៣​បាន​ជាង​៣៤​ម៉ឺន​នាក់ ដូ​ស​ទី​៤ ពី​អាយុ​៥​ឆ្នាំ​ឡើង​បាន​ជាង​១២​ម៉ឺ​នាក់ និង​ដូ​ស​ទី​៥​បាន​ជាង​២​ម៉ឺ​នាក់​។ ឯ​ការចាក់​វ៉ាក់សាំង​ដូ​ស​ទី​៤​ជូន​កុមារ​អាយុ​៣​ឆ្នាំ និង​ដូ​ស​ទី​៥​ជូន​កុមារ​អាយុ​៥​ឆ្នាំ​ឡើង ព្រមទាំង​ដូ​ស​ទី​៦​នឹង​ចាប់ផ្តើម​បើក​យុទ្ធនាការ​នៅ​ថ្ងៃទី​៩ ខែមករា ឆ្នាំ​២០២៣​ខាងមុខនេះ​៕/R​