​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ក្រុម​មាន់​ខ្នាយ​មាស Tottenham ថ្ងៃ​សៅរ៍​នេះ​មាន​សង្ឃឹម​ឈ្នះ​ខ្ពស់​ជាងគេ​ក្នុង​ការប្រកួត FA Cup ដែល​មាន​សរុប ៣១ គូ​នៅ​ចុង​សប្តាហ៍​នេះ​នៅ​ពេល​​ពួក​គេ​ស្វាគមន៍​គីឡូ​ស្រាល Portsmouth​។ ដោយឡែក Real Madrid និង Juventus ក៏​ជា​ក្រុម​រំពឹង​ឈ្នះ​ផង​ដែរ​នៅ​លី​កអេ​ស្ប៉ាញ​និង​អ៊ីតាលី​រៀងៗ​ខ្លួន​។​

– Tottenham vs Portsmouth

​ត្រឹម​តែ​បី​ថ្ងៃ​បន្ទាប់ពី​ការប្រកួត Derby ក្នុង​ទីក្រុង​ឡុង​ដ៍​ទល់​នឹង​ក្រុម Crystal Palace ក្រុម​មាន់​ខ្នាយ​មាស Tottenham Hotspur នឹង​ធ្វើ​ការប្រកួត​ក្នុង​ជុំ​ទី​បី​នៃ​ពានរង្វាន់ FA Cup ។​

​កូនក្រុម​របស់លោក Antonio Conte នឹង​លេង​ធ្វើជា​ម្ចាស់ផ្ទះ​ទទួល​ក្រុម Portsmouth នៃ​ក្របខណ្ឌ League One ក្នុង​ការប្រកួត FA Cup នៅ​ថ្ងៃ​សៅរ៍​នេះ​។​

​ដោយ​នេះ​ជា​ការប្រកួត​តូច យើង​រំពឹងថា​អ្នក​ចាត់ការ​ទូទៅ​សញ្ជាតិ​អ៊ីតាលី​រូបនេះ​នឹងដាក់​ឈុត​តូច​ឱ្យ​លេង​នៅ​ថ្ងៃ​សៅរ៍​នេះ ជាពិសេស​ដោយ​ដឹងថា Spurs ជា​គីឡូ​ធ្ងន់​ស្រាប់​នៅទីនេះ ទោះ​ដាក់​បម្រុង​ឈុត​ទី​ប៉ុន្មាន​ក៏ដោយ​។​

​ទោះយ៉ាងណា យើង​ត្រូវតែ​និយាយ​ដោយ​ត្រង់​ថា ទម្រង់​លេង​នា​ពេល​ថ្មីៗ​នេះ​របស់ Tottenham មិន​គួរឱ្យ​ចាប់អារម្មណ៍​នោះទេ​។ កូនក្រុម​របស់លោក Conte បាន​របូត​គ្រាប់​បាល់​២​គ្រាប់​ក្នុង​ប្រកួត​នី​មួយៗ​នៃ Premier League ពីរ​លើក​ចុងក្រោយ បន្ទាប់​ពី​ការ​សម្រាក​វើល​ខា​ប់​។​

​ពួកគេ​ដណ្តើម​បាន​តែ​មួយ​ពិន្ទុ​ប៉ុណ្ណោះ​ក្នុង​ដំណើរការ​នេះ ដោយ​លេង​ស្មើ ២-២ នៅ​ទឹកដី Brentford និង​ចាញ់ ០-២ នៅផ្ទះ​របស់ Aston Villa ។​

​លោក Conte មាន​បញ្ហា​ធំ​ណាស់ ដោយ​កីឡាករ​ជាច្រើន​នាក់​បាន​រងរបួស ខណៈ​កីឡាករ Dejan Kulusevski ថ្មីៗ​នេះ​បាន​ចូលរួម​ក្នុង​បញ្ជី​របួស​ពេល​ចាញ់ Villa​។​

​ជា​សំណាងល្អ​សម្រាប់ Spurs និង​អ្នក​គាំទ្រ​របស់​ពួកគេ ពួកគេ​ត្រូវ​លេង​ទល់នឹង​ក្រុម​ធ្លាក់​ជើង​មកពី League One​។ Portsmouth មិន​ខ្វល់​ពី​ការប្រកួត FA Cup សូម្បី​តែ​បន្តិច ព្រោះ​ឥឡូវ​ពួកគេ​កំពុង​ស្ថិត​ក្នុង​តំបន់​គ្រោះថ្នាក់ បន្ទាប់​ពី​ការប្រកួត​លី​ក​ចំនួន ៩ លើ​ក​ជាប់ៗ​គ្នា ដោយ​មិន​ទទួល​ជ័យជម្នះ​សោះ​។​

Portsmouth រក​បាន​មិន​លើស​ពី​ពីរ​ពិន្ទុ​ទេ​ក្នុង​ការប្រកួត League One ៥​លើកចុងក្រោយ​។ ពួកគេ​ក៏​ស៊ុត​មិន​ចូល​ទី​គេ​នោះ​ដែរ​នៅ​៥​ប្រកួត​ក្រៅ​ទឹកដី​ចុងក្រោយ​។​

​ក្រុម​ទាំង​ពីរ​ខាន​ជួបគ្នា​ជាង​១០​ឆ្នាំ​មកហើយ ប៉ុន្តែ​ប្រវត្តិ​ជួប​គ្នា​គឺ Spurs ឈ្នះ ១០ ស្មើ ៧ ចាញ់ ៤ ដូច្នេះ​ត្រឹម​គីឡូ​បម្រុង​របស់ Spurs ក៏​ពួកគេ​អាច​យកឈ្នះ​ក្រុម Portsmouth ដែល​គ្មាន​ទឹកចិត្ត​លេង​នោះដែរ​។

​លទ្ធផល​ព្យាករណ៍ Spurs ឈ្នះ ៤-១​។​

– Villarreal vs Real Madrid

​ក្រុម​ស្តេច​ស Real Madrid បាន​ទាញយក​ប្រយោជន៍​ពី​ការ​ភ្លាត់ស្នៀត​របស់ Barcelona កាលពី​ចុង​សប្តាហ៍​មុន ដើម្បី​ស្មើ​ពិន្ទុ​គ្នា​ជាមួយនឹង​ក្រុម Catalans នៅលើ​កំពូល​តារាង La Liga បន្ទាប់ពី​ទទួល​ជ័យជម្នះ ០-២ លើ Valladolid ។​

​ស្តេច​ស​លេង​មិនបាន​ល្អ​ទេ​នៅ​ប្រកួត​ទី​១​ក្រោយ​វើល​ខាប់​។ ពួកគេ​ជួប​ការលំបាក​ក្នុងការ​ទម្លុះ​សំណាញ់​ទី ហើយ​ពួកគេ​អាច​ស៊ុត​ចូល​ទី​បាន បន្ទាប់​ពី Valladolid សល់​គ្នា​១០​នាក់​នៅលើ​ទីលាន (​កាត​ក្រហម​សម្រាប់​កីឡាករ Sergio Leon) ។​

Karim Benzema បានបង្ហាញ​ថា​ជា​អ្នក​សង្គ្រោះ​សម្រាប់​ក្រុម​របស់​លោក Carlo Ancelotti ម្តងទៀត​។ កីឡាករ​សញ្ជាតិ​បារាំង​រូបនេះ​បាន​ស៊ុត​បញ្ចូល​ទី​ក្នុង​រយៈពេល ៧ នាទី​ចុង​ក្រោយ​នៃ​ការប្រកួត​ដើម្បី​ផ្តល់​ឱ្យ​ក្រុម​របស់​គាត់​នូវ​បី​ពិន្ទុ​យ៉ាងសំខាន់​។​

​បច្ចុប្បន្ន Real Madrid មាន​ជ័យជម្នះ​៧​លើក​នៅ​ក្រៅ​ទឹកដី​ក្នុង​រដូវ​កាល​នេះ​។ កំណត់ត្រា​ដ៏​គួរឱ្យ​ចាប់អារម្មណ៍​បែប​នេះ​នឹង​ស្ថិត​ក្នុង​គ្រោះថ្នាក់​នៅ​ថ្ងៃ​សៅរ៍​នេះ នៅ​ពេល​ពួកគេ​ជួប Villarreal ក្នុង​ជុំ​ទី ១៦ នៃ La Liga ។​

Villarreal ក៏​នឹង​ចូល​ក្នុង​ការប្រកួត​នេះ​ជាមួយ​ស្មារតី​ខ្ពស់​ផង​ដែរ​។ ពួកគេ​បាន​ទទួល​ជ័យជម្នះ ២-១ លើ​ក្រុម Valencia កាលពី​ចុង​សប្តាហ៍​មុន ជាមួយនឹង​គ្រាប់​បាល់​ស៊ុត​បញ្ចូល​ទី​ពី​កីឡាករ Samu Chukwueze និង Juan Foyth ។​

​វា​ជា​ការ​ឈ្នះ La Liga លើក​ទី​ពីរ​ជាប់ៗ​គ្នា​សម្រាប់ Villarreal ដែល​នាំ​ឱ្យ​ពួកគេ​ឡើង​មក​ចំណាត់​លេង ៧ ។ ប្រសិនបើ​យើង​រាប់​ការប្រកួត​ទាំងអស់ កូនក្រុម​របស់លោក Quique Setien គឺ​លេង​ឈ្នះ ៦ លើ​ក​ជាប់ៗ​គ្នា​ហើយ​។​

​តែ​ទោះ​យ៉ាងណា គិត​ត្រឹម​ជំនួប ១០ លើក​ចុងក្រោយ​នេះ គឺ Villarreal មិន​ដែល​ឈ្នះ Real Madrid ម្តងណា​ឡើយ ហើយ​មិន​អាច​ស៊ុត​ចូល​ទី​របស់​ស្តេច​ស​សូម្បី​មួយ​គ្រាប់​។

​លទ្ធផល​ព្យាករណ៍ Real Madrid ឈ្នះ ១-០​។​

– Juventus vs Udinese

Juventus បាន​បន្ត​ការ​ឈ្នះ​របស់​ពួកគេ​កាលពី​ថ្ងៃ​ពុធ ដោយ​ដណ្តើមបាន​ជ័យជម្នះ​ក្នុង​លី​ក​ជា​លើក​ទី​ប្រាំពីរ​ជាប់ៗ​គ្នា​ក្នុង​ការប្រកួត​ដំបូង​បន្ទាប់​ពី​ការ​សម្រាក​វើល​ខាប់​។​

​ក្រុម​សេះបង្កង់​បាន​យក​ឈ្នះ Cremonese ០-១ នៅ​ក្រៅ​ទឹកដី​ដោយសារ​គ្រាប់​បាល់​នាទី​៩០​ពី​កីឡាករ Arkadiusz Milik ។ ដូច្នេះ អតីត​ខ្សែប្រយុទ្ធ​របស់ Napoli រូបនេះ​បាន​ស៊ុត​បញ្ចូល​ទី​សរុប​ចំនួន ៥ គ្រាប់​ហើយ​សម្រាប់​រដូវ​កាល​នេះ​។​

​ខ្សែប្រយុទ្ធ​ប៉ូឡូញ​រូប​នេះ​ត្រូវ​គេ​រំពឹងថា​នឹង​ដឹកនាំ​តំបន់​ប្រយុទ្ធ​សម្រាប់ Juventus ជាថ្មី​ម្តងទៀត​នៅ​ថ្ងៃ​សៅរ៍​នេះ​ទល់នឹង Udinese ដោយហេតុ​ថា​អ្នក​ស៊ុត​បញ្ចូល​ទី​ច្រើនជាងគេ​របស់​ក្រុម គឺ​កីឡាករ Dusan Vlahovic នៅ​មិនទាន់​ជា​ពីរ​បួស​។​

Juventus នៅតែ​ស្ថិត​ក្នុង​ចំណាត់ថ្នាក់​លេខ ៣ ក្នុង​តារាង Serie A ប៉ុន្តែ​ពួកគេ​បាន​កាត់បន្ថយ​គម្លាត​ពី​ក្រុម​នាំមុខ Napoli មក​ត្រឹម ៧ ពិន្ទុ​បន្ទាប់​ពី​ពួកគេ​ចាញ់​នៅ​ទឹកដី Inter Milan កាល​ពី​បី​ថ្ងៃមុន​។​

​កូនក្រុម​របស់លោក Massimiliano Allegri ឥឡូវ​នេះ​នឹង​ត្រូវ​ប្រឈមមុខ​នឹង​ការងារ​លំបាក​ជាង​ការងារ​ដែល​ពួកគេ​បាន​សម្រេច​កាលពី​ថ្ងៃ​ពុធ ព្រោះ​ពួកគេ​ត្រូវ​ជួប​ជាមួយ Udinese ដែល​ជា​គីឡូ​ពាក់កណ្តាល​តារាង​។​

Udinese កំពុង​ឈរ​នៅ​លេខ​៨​ក្នុង​តារាង Serie A ។ ពួក​គេ​លេង​ល្អ​ណាស់​បន្ទាប់ពីវើល​ខា​ប់ ប៉ុន្តែ​បាន​ត្រឹម​ស្មើ​ក្នុងផ្ទះ​ទល់នឹង Empoli កាលពី​ថ្ងៃ​ពុធ ត្បិត​លេង​ល្អ​ខ្លាំង​ក៏ដោយ​។​

​ក្រុម​ដែល​ដឹកនាំ​ដោយ​លោក Andrea Sottill បាន​ស៊ុត ២១ ជើង​ក្នុងឱកាស​នោះ ប៉ុន្តែ​ចុងបញ្ចប់​បាន​ត្រឹម​ស្មើ ១-១ យ៉ាង​ខកចិត្ត​បំផុត​។​

​វា​គឺជា​ការ​ស្មើ​លើក​ទី ៤ ក្នុង​ការប្រកួត​លី​ក​ចំនួន ៥ លើកចុងក្រោយ​សម្រាប់ Udinese និង​ជា​ការប្រកួត Serie A ទី​៨​ជាប់ៗ​គ្នា​របស់​ពួកគេ​ដោយ​គ្មាន​ជ័យជម្នះ​។​

​ផ្អែក​តាម​ប្រវត្តិ Juventus ឈ្នះ ៣៩ ស្មើ ៩ និង​ចាញ់ ៩ ទល់នឹង Udinese ហើយ​ជួប​គ្នា​៤​លើក​ចុងក្រោយ​គឺ Juventus ឈ្នះ ២ ស្មើ​២ និង​ស៊ុត​ចូល​ជា​មធ្យម ២ គ្រាប់​។​

​លទ្ធផល​ព្យាករណ៍ Juventus ឈ្នះ ២-០៕

Real Madrid ដែល​មាន​កំណត់ត្រា​ល្អ​ក្រៅ​ទឹកដី នៅតែ​មាន​សង្ឃឹម​ឈ្នះ​នៅ​ទឹកដី Villarreal ដើម្បី​ប្រជែង​លេខ​១​ជាមួយ Barcelona​