​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប៉ូលិស​និង​មន្ត្រី​សាលា​ក្នុង​ទីក្រុង​ញូ​វ​ផ​តញូវ​ស៍ (Newport News) បាន​និយាយថា សិស្ស​អាយុ ៦​ឆ្នាំ​ម្នាក់​បាន​បាញ់​របួស​អ្នកគ្រូ​ម្នាក់​នៅ​រដ្ឋ​វើជី​នៀ​(Virginia)​កាលពី​ថ្ងៃ​សុក្រ​ទី​៦​មករា​ក្នុងអំឡុងពេល​ផ្ទុះ​ជម្លោះ​នៅក្នុង​បន្ទប់រៀន​ថ្នាក់​ទី​១​។​

​ប៉ូលិស​បាន​និយាយថា​មិនមាន​សិស្ស​ណា​រងរបួស​ក្នុង​ការបាញ់ប្រហារ​នៅ​សាលាបឋមសិក្សា​រី​ចណេ​ក (Richneck) នោះទេ​។ អ្នកគ្រូ​ប​អាយុ​៣០​ឆ្នាំ​ប្លាយ​បាន​រងរបួស​ធ្ងន់ធ្ងរ ដែល​គំរាម​ដល់​អាយុជីវិត ។ មេ​ប៉ូលិស​ក្រុង​ញូ​វ​ផ​តញូវ​ស៍ លោក ស្ទីវ ឌ្រូ (Steve Drew) បាន​ប្រាប់​អ្នកយកព័ត៌មាន​ថា ស្ថានភាព​របស់​អ្នកគ្រូ​បាន​ប្រសើរ​បន្តិច​ហើយ​នៅ​រសៀល​ថ្ងៃ​សុក្រ​។​

​ប៉ូលិស​បាន​និយាយថា ក្មេង​នោះ​មាន​កាំភ្លើងខ្លី​មួ​យ​ដើម​នៅក្នុង​ថ្នាក់រៀន ហើយ​បាន​ចាប់ខ្លួន​សិស្ស​នោះ​ទៅ​ឃុំ​ហើយ​។​

​លោកឌ្រូ​បាន​ប្រាប់​អ្នកយកព័ត៌មាន​ថា “​យើង​គ្មាន​ស្ថានភាព​ដែល​មនុស្ស​ដើរ​បាញ់​បោះ​ជុំវិញ​សាលា​នោះ​ទេ​។ យើង​មាន​ស្ថានភាព​នៅ​ទីតាំង​ជាក់លាក់​មួយ ដែល​មាន​ការ​បាញ់កាំភ្លើង​មួយ​គ្រាប់​”​។​

​លោក​បាន​បន្ថែមថា ការបាញ់ប្រហារ​នេះ​មិនមែន​ជា​ឧបទ្ទវហេតុ​ទេ​។​

​សាលា​សាធារណៈញូវ​ផ​តញូវ​ស៍ (Newport News Public Schools) បាន​សរសេរ​នៅលើ Facebook ថា ឪពុក​ម្តាយ​និង​សិស្ស​បាន​ជួបជុំគ្នា​នៅ​មាត់ទ្វារ​កន្លែង​ហាត់ប្រាណ​មួយ​។​

​ញូ​វ​ផ​តញូវ​ស៍គឺ​ជា​ទីក្រុង​មួយ​ដែល​មាន​មនុស្ស​ប្រហែល ១៨៥.០០០ នាក់​នៅ​ភាគ​អាគ្នេយ៍​នៃ​រដ្ឋ​វើជី​នៀ ដែល​ល្បី​ខាង​កន្លែង​ផលិត​នាវា​ដែល​បាន​សាងសង់​នាវា​ផ្ទុក​យន្តហោះ​របស់​ប្រទេស​និង​នាវា​​ផ្សេង​ទៀត​របស់​កងទ័ព​ជើង​ទឹក​អាម៉េរិក​។​

​សាលា​រី​ចណេ​កមាន​សិស្ស​ប្រហែល ៥៥០ នាក់ ដែល​រៀន​ថ្នាក់​មត្តេយ្យ​ដល់​ថ្នាក់ទី ៥ នេះ​បើ​យោង​តាម​វេបសាយ​របស់​មន្ទីរ​អប់រំ​រដ្ឋ​វើជី​នៀ​។​មន្ត្រី​សាលា​បាន​និយាយ​រួចហើយ​ថា​នឹង​មិន​មាន​ថ្នាក់រៀន​នៅ​​សាលា​នៅ​ថ្ងៃ​ចន្ទ​នោះទេ​៕

​ប៉ូលិស​ចេញ​អន្តរាគមន៍​ក្រោយ​មាន​ករណី​សិស្ស​បាញ់​គ្រូ​នៅ​សាលាបឋមសិក្សា​រី​ចណេ​ក​កាលពី​ថ្ងៃ​សុក្រ