​ប្រែ​សម្រួលៈ​បំណង​(​ស្ត្រេត​ថែមស៍​)៖​រដ្ឋាភិបាល​ក្រុម​តា​លី​បង់​នៅ​អា​ហ្វ​ហ្គានី​ស្ថានបាន​រិះគន់​ព្រះអង្គ​ម្ចាស់ហារី នៃ​ចក្រភព​អង់គ្លេស​ដែល​កំពុង​គង់នៅ​អាម៉េរិក ក្រោយ​ពី​ទ្រង់​បាន​មានបន្ទូល​ក្នុង​សៀវភៅ​​កំណត់​ប្រវត្តិ​មួយ​ថា មនុស្ស​២៥​នាក់​ត្រូវបាន​សម្លាប់​នៅ​អា​ហ្វ​ហ្គានី​ស្ថានពេល​ទ្រង់​បំរើការ​ជា​អ្នកបើក​ឧទ្ធម្ភាគចក្រ​យោធា​មួយ ដោយ​ពណ៌នា​ពួកគេ​ជា​«​កូនអុក​ដែល​ត្រូវ​ដកចេញ​ពី​ក្តារអុក​»​។​

​សៀវភៅ​Spare​ដែល​រៀបរាប់​អំពី​ជីវិត​ឯកជន​ច្រើន​របស់​ហារី​ត្រូវបាន​ចេញលក់​នៅអេ​ស្ប៉ាញ​នៅ​ប៉ុន្មាន​ថ្ងៃមុន​ការដាក់​លក់​វា​ជា​ផ្លូវការ​នៅ​ថ្ងៃ​១០​មករា​។​វា​ទម្លាយ​អោយដឹង​នូវ​ជំរៅ​នៃ​ការបែកបាក់​រវាង​​ព្រះអង្គម្ចាស់​និង​ព្រះរាម​វីលៀម ដែល​ជា​រជ្ជទាយាទ ព្រមទាំង​បាន​បញ្ចេញ​អោយដឹង​រឿងរ៉ាវ​ផ្ទាល់ខ្លួន​ដទៃទៀត ដូចជា​ការសេព​គ្រឿងញៀន​និង​ការបាត់បង់​ភាព​បរិសុទ្ធ​ផ្លូវភេទ​របស់​ទ្រង់​ជាដើម​។​

​សៀវភៅ​Spare​ដែល​រៀបរាប់​អំពី​ជីវិត​ឯកជន​ច្រើន​របស់​ហារី​ត្រូវបាន​ចេញលក់​នៅអេ​ស្ប៉ាញ​នៅ​ប៉ុន្មាន​ថ្ងៃមុន​ការដាក់​លក់​វា​ជា​ផ្លូវការ​នៅ​ថ្ងៃ​១០​មករា​

​នៅ​វគ្គ​មួយ ព្រះអង្គ​ព្រះជន្ម​៣៨​វស្សា​អង្គ​នេះ​បាន​រំលឹក​អំពី​បេសកកម្ម​ពីរ​លើ​ក​របស់​ទ្រង់​នៅ​អា​ហ្វ​ហ្គានី​ស្ថាន ដោយ​ដំបូង​រវាង​ឆ្នាំ​២០០៧-២០០៨ ជា​អ្នកគ្រប់គ្រង​បញ្ជាការ​វាយប្រហារ​តាម​អា​កាស​និង​ម្តង​​ទៀត​នៅ​ឆ្នាំ​២០២១ ជា​អាកាសយានិក​អម​និង​ជា​អ្នក​កាន់​បញ្ជា​កាំភ្លើង​ឧទ្ធម្ភាគចក្រ​Apache​។​

​ព្រះអង្គម្ចាស់​បាន​មានបន្ទូលថា​បាន​សម្លាប់​មនុស្ស​មួយចំនួន និង​ថា​«​វា​មិន​ជា​រឿង​មោទនភាព​និង​ភាពអាម៉ាស​ទេ​។​ពេល​ខ្ញុំ​ធ្លាក់​ចូល​ក្នុង​កំដៅ​និង​ភាពច្របូកច្របល់​នៃ​ជម្លោះ ខ្ញុំ​មិន​បាន​គិតថា​អ្នក​២៥​នាក់​នោះ​ជា​មនុស្ស​ទេ​។​ពួកគេ​ប្រៀបដូចជា​កូនអុក​ដែល​ត្រូវបាន​ដកចេញ​ពី​ក្តារ​អុក​។​មនុស្ស​អាក្រក់​ត្រូវ​កំចាត់​ចោល​មុន​ព្រះ​សម្លាប់​ពួក​គេ​»​។​

​លោក អាប់​ឌុល កា​ហា បាល់​ឃី​(Abdul Qahar Balkhi)​អ្នកនាំពាក្យ​ក្រសួងការបរទេស​របស់​តា​លីបង់ បាន​រិះគន់​សម្តី​នេះ​។​លោក​បាន​និយាយថា​«​ការកាន់កាប់​របស់​លោក​ខាង​លិច​លើ​អា​ហ្វ​ហ្គានី​​ស្ថាន​ជា​ព្រឹត្តិការណ៍​និង​ពេល​ដ៏​គួរអោយ​ស្អប់ខ្ពើម​ក្នុង​ប្រវត្តិសាស្ត្រ​មនុស្ស និង​សម្តី​របស់​ហារី តំណាង​អោយ​ផ្នែក​តូច​មួយ​នៃ​ការបង្ក​ស្នាម​របួស​លើ​ប្រជាជន​អា​ហ្វ​ហ្គានី​ស្ថាន​ក្រោ​យដៃកម្លាំង​កាន់កាប់​ដែ​ល​​បានសម្លាប់​ជនស្លូតត្រង់​ដោយ​គ្មាន​ការទទួលខុសត្រូវ​»​។​

​នៅពេល​ត្រូវ​បាន​សួរ​អំពី​បន្ទូល​របស់​ព្រះអង្គម្ចាស់​ហារី អ្នកនាំពាក្យ​ម្នាក់​នៃ​ក្រសួង​ការពារជាតិ​អង់គ្លេស​បាន​និយាយថា​«​យើង​មិន​និយាយ​លម្អិត​អំពី​ប្រតិបត្តិការ​នេះ​ទេ ដោយ​ហេតុផល​សន្តិសុខ​»​។​

​ការចេញលក់​សៀវភៅ​ពី​សមាជិក​រាជវង្ស​​តែងតែ​ត្រូវបាន​គ្រប់គ្រង​យ៉ាង​តឹង​តឺង ជា​ពិសេស​ពាក់ព័ន្ធ​នឹង​ព័ត៌មាន​របស់​រាជវង្ស ។តែវាកើត​ឡើង​ក្រោយ​ព្រះអង្គម្ចាស់​ហារី និង​ប្រពន្ធ​ជា​ជនជាតិ​អាម៉េរិក​នាង ​មេហ្កា​ន ម៉ាខ​ល​( Meghan Markle)​ចាកចេញ​ព្រះរាជតួនាទី​និង​រាជកិច្ច​អង់គ្លេស​នៅ​ឆ្នាំ​២០២០ ហើយ​រើ​ទៅ​រស់នៅ​សាង​ជីវិត​ថ្មី​នៅក្នុង​រដ្ឋ​កាលីហ្វ័​រញ៉ា​។​ចាប់តាំងពី​ពេលនោះ​មក ប្តី​ប្រពន្ធ​នេះ​បាន​​បញ្ចេញ​ការរិះគន់​បន្តបន្ទាប់​លើ​រាជវង្ស​និង​សារព័ត៌មាន​អង់គ្លេស​៕

ហារីត្រូវបានបញ្ជូនទៅបំពេញបេសកកម្មនៅអាហ្វហ្គានីស្ថានពីរលើក