​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សេត​វិមាន​បាន​ប្រកាស​កាលពី​ថ្ងៃ​សុក្រ​ទី​៦​មករា​ថា សហរដ្ឋ​អាម៉េរិក​នឹង​បញ្ជូន​អាវុធ​យោធា​និង​ជំនួយ​ផ្សេង​ទៀត​តម្លៃ ៣,៧៥​ពាន់​លាន​ដុល្លារ​ដល់​អ៊ុ​យក្រែន​​និង​ប្រទេស​ជិតខាង​របស់​ខ្លួន​នៅ​ប៉ែក​ខាងកើត​របស់​អង្គការ​ណា​តូ ខណៈ​ការឈ្លានពាន​របស់​រុស្ស៊ី​លើ​អ៊ុយ​ក្រែន​កំពុងបន្ត​។​

​ជំនួយ​ចុងក្រោយ​បំផុត​នេះ​នឹង​រួមបញ្ចូល​ជា​លើកដំបូង​នូវ​រថពាសដែក Bradley​សម្រាប់​អ៊ុ​យក្រែន​។ រថពាសដែក​នេះ​ត្រូវបាន​ប្រើ​ដើម្បី​ដឹក​កងទ័ព​ទៅ​ប្រយុទ្ធ និង​ត្រូវ​គេ​ស្គាល់​ថា​ជា​”​អ្នក​ពិឃាដរ​ថ​​ក្រោះ​” ដោយសារ​តែ​មី​ស៊ី​ល​ប្រឆាំង​រថក្រោះ​ដែល​វា​អាច​បាញ់​ចេញ​។​

​កញ្ចប់​ជំនួយ​ដ៏​ធំ​បំផុត​របស់​អាម៉េរិករ​ហូត​មកដល់​បច្ចុប្បន្ន​សម្រាប់​រដ្ឋាភិបាល​ក្រុង​គៀវ​នេះ​គឺ​រួម​មាន​ការដក​នូវ​ទឹកប្រាក់​ចំនួន ២,៨៥ ពាន់​លាន​ដុល្លារ​ពី​កញ្ចប់​ជំនួយ​យោធា​របស់​មន្ទីរ​បញ្ច​កោ​ណ ដែល​នឹង​ត្រូវ​បញ្ជូន​ដោយ​ផ្ទាល់​ទៅ​អ៊ុ​យក្រែន និង ២២៥ លាន​ដុល្លារ​ជា​ហិរញ្ញប្បទាន​យោធា​បរទេស​ដើម្បី​កសាង​សមត្ថភាព​រយៈពេល​វែង​និង​គាំទ្រ​ទំនើបកម្ម​យោធា​របស់​អ៊ុ​យក្រែន នេះ​បើ​យោងតាម​​សេត​វិមាន​។ វា​ក៏​រួមបញ្ចូល​ផងដែរ​នូវ​ការផ្តល់​ហិរញ្ញប្បទាន​យោធា​បរទេស​ចំនួន ៦៨២ លាន​ដុល្លារ​សម្រាប់​សម្ពន្ធមិត្ត​អឺរ៉ុប​ដើម្បី​ជួយ​បំពេញ​ការបរិច្ចាគ​សម្ភារៈ​យោធា​ដែល​ពួកគេ​បាន​ផ្តល់​ឱ្យ​អ៊ុ​យក្រែន​។​

​អ្នកនាំពាក្យ​សេត​វិមាន នាង ការី​ន ហ្សង់​ព្យែរ (Karine Jean-Pierre) បាន​និយាយ​នៅក្នុង​ការប្រកាស​អំពី​ជំនួយ​នេះ​ថា “​សង្គ្រាម​កំពុងស្ថិត​នៅ​ចំណុច​សំខាន់​ហើយ​យើង​ត្រូវតែ​ធ្វើ​អ្វី​គ្រប់​យ៉ាង​​ដែល​យើង​អាច​ធ្វើបាន​ដើម្បី​ជួយ​អ៊ុយ​ក្រែន​ទប់ទល់​នឹង​ការឈ្លានពា​ន​របស់​រុស្ស៊ី​”​។​

​ជំនួយ​ផ្ទាល់​សម្រាប់​អ៊ុយ​ក្រែន​នេះ​រួម​មាន​រថពាសដែក Bradley ៥០ គ្រឿង ព្រមទាំង​មី​ស៊ី​ល​ប្រឆាំង​រថក្រោះ ៥០០ ដើម និង​គ្រាប់កាំភ្លើង​ចំនួន ២៥០.០០០ សម្រាប់​រថពាសដែក​នេះ​។ ​សហរដ្ឋ​អាម៉េរិក​ក៏​នឹង​បញ្ជូន​រថពាសដែក M113 ចំនួន ១០០ គ្រឿង រថពាសដែក​ទប់ទល់​នឹង​គ្រាប់មីន ឬ MRAPS ចំនួន ៥៥ គ្រឿង និង រថយន្ត Humvees ចំនួន ១៣៨​គ្រឿង​ក៏​ដូចជា​គ្រាប់​​សម្រាប់​ប្រព័ន្ធ​គ្រាប់​រ៉ុក្កែត​ចល័ត​ការពារ​អាកាស HMARS ព្រមទាំង​អាវុធ​ផ្សេងទៀត និង​កាំភ្លើង​ធំ​រាប់ពាន់​គ្រាប់​ផង​ដែរ នេះ​បើ​តាម​មន្ទីរ​បញ្ច​កោណ​៕

​រថពាសដែក Bradley ៥០ គ្រឿង​នឹង​រួម​បញ្ចូល​ក្នុង​កញ្ចប់​ជំនួយ​ថ្មី​របស់​អាម៉េរិក​ដល់​អ៊ុ​យក្រែន