​ប្រែ​សម្រួល : កញ្ញា​ដា​លី​ស (​ស៊ីនហួ​,​ស្ត្រេត​ថែមស៍​) ៖ អ្នកនាំពាក្យ​ក្រសួងការបរទេស​ចិន លោកស្រី ម៉ៅ នី​ង (Mao Ning)​បាន​និយាយ​កាលពី​ថ្ងៃ​សុក្រ​ទី​៦​មករា​ថា​ចិន​បាន​បញ្ជូន​អ្នកជំនាញ​ទៅកាន់​​រដ្ឋ​សមាជិក​អង្គការ​សុខភាព​ពិភពលោក (WHO)​ដើម្បី​សង្ខេប​ជូន​ព័ត៌មាន​កាលពី​ថ្ងៃ​ព្រហស្បតិ៍ ហើយ​បាន​ត្រៀម​ខ្លួន​រួច​ជា​ស្រេច​ក្នុង​ការបង្កើន​កិច្ចសហប្រតិបត្តិការ​ជាមួយ WHO​និង​ប្រទេស​ដទៃ​ទៀត​​លើ​ពិភពលោក​ដើម្បី​ដោះស្រាយ​បញ្ហា​ប្រឈម​កូវី​ដ​ឱ្យ​កាន់តែ​មាន​ប្រសិទ្ធភាព​។​

​លោកស្រី​ម៉ៅ​បាន​ធ្វើ​ការលើកឡើង​បែបនេះ​នៅក្នុង​សន្និសីទ​សារព័ត៌មាន​ជាប្រចាំ​ក្នុង​ការឆ្លើយតប​នឹង​សំណួរ​ពាក់ព័ន្ធ​។​

​លោកស្រី​បាន​និយាយថា អាជ្ញា​ធរមាន​សមត្ថកិច្ច​របស់​ចិន​បាន​ចែករំលែក​ព័ត៌មាន​អំពី​ជំងឺ​រាតត្បាត​ជាមួយ​សហគមន៍​អន្តរជាតិ​ក្នុង​លក្ខណៈ​ទាន់ពេលវេលា បើក​ចំហ​និង​តម្លាភាព​ស្របតាម​ច្បាប់​និង​​រក្សា​ទំនាក់ទំនង​យ៉ាង​ជិតស្និទ្ធ​ជាមួយ WHO ចាប់តាំងពី​ជំងឺ​កូវី​ដ​បានចាប់ផ្តើម​។​

​លោកស្រី​បាន​និយាយ​ថា​តប​តាម​ការអញ្ជើញ​របស់ WHO ចិន​បាន​បញ្ជូន​អ្នកជំនាញ​កាលពី​ថ្ងៃ​ព្រហស្បតិ៍​ទៅកាន់​សន្និសីទ​សង្ខេបរ​បស់​រដ្ឋ​ជា​សមាជិក​របស់ WHO ដែល​ពួកគេ​ពន្យល់​ពី​វិធានការ​ឆ្លើយតប ការត្រួតពិនិត្យ​មេរោគ​បំប្លែង ការចាក់​វ៉ាក់សាំង និង​ការថែទាំ​ព្យាបាល​របស់​ចិន និង​មាន​អន្តរ​កម្ម​យ៉ាងសកម្ម​ជាមួយ​រដ្ឋ​សមាជិក​ផ្សេងទៀត​។​

​លោកស្រី​ម៉ៅ​បាន​និយាយថា “​យើង​បាន​កត់សម្គាល់​ឃើញថា WHO​បាន​និយាយថា ពួកគេ​បាន​ឃើញ​ទិន្នន័យ​បន្ថែម​ទៀត​ស្តីពី​ការញែ​ក​មេរោគ​ដោយ​ប្រទេស​ចិន និង​បង្កើន​ការចូលរួម​ជាមួយ WHO ក្នុង​រយៈពេល​ប៉ុន្មាន​សប្តាហ៍​ចុងក្រោយ​នេះ​ពី​ប្រទេស​ចិន​” ដោយ​បន្ថែម​ថា ចិន​ត្រៀមខ្លួន​ជាស្រេច​ក្នុង​ការបង្កើន​កិច្ចសហប្រតិបត្តិការ​ជាមួយ​WHO​និង​ប្រទេស​ដទៃ​ទៀត​លើ​ពិភពលោក​ដើម្បី​ដោះស្រាយ​​បញ្ហា​ប្រឈម​កូវី​ដ​ឱ្យ​កាន់តែ​មាន​ប្រសិទ្ធភាព និង​ការពារ​អាយុជីវិត​និង​សុខភាព​មនុស្ស​កាន់តែ​ប្រសើរឡើង​”​។

​ទន្ទឹមនេះដែរ ប្រភពបី​បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា ចិន​កំពុង​ពិភាក្សា​ជាមួយ​ក្រុមហ៊ុន Pfizer Inc ដើម្បី​ទទួលបាន​អាជ្ញាប័ណ្ណ​មួយ ដែល​នឹង​អនុញ្ញាត​ឱ្យ​អ្នក​ផលិត​ឱសថ​ក្នុងស្រុក​ផលិត​និង​ចែកចាយ​ថ្នាំ​ប្រឆាំង​កូ​វីដ​របស់​ក្រុមហ៊ុន​អាម៉េរិក Paxlovid នៅក្នុង​ប្រទេស​ចិន​។

​ប្រភព​មួយ​ក្នុងចំណោម​នោះ​ដែល​ដឹង​អំពី​បញ្ហា​នេះ​បាន​និយាយថា និយតករ​ផលិតផល​វេជ្ជសាស្ត្រ​របស់​ចិន គឺ រដ្ឋបាល​ផលិតផល​វេជ្ជសាស្ត្រ​ជាតិ (NMPA) បាន​ដឹកនាំ​កិច្ច​ពិភាក្សា​ជាមួយ​ក្រុមហ៊ុន Pfizer តាំងពី​ចុង​ខែ​មុន​មក​។​

​ប្រភព​ដដែល​បាន​បន្តថា រដ្ឋាភិបាល​ក្រុង​ប៉េកាំង​ចង់​សម្រេច​ឱ្យ​រួចរាល់​នូវ​លក្ខខណ្ឌ​កិច្ចព្រមព្រៀង​អាជ្ញាប័ណ្ណ នៅ​មុន​ថ្ងៃ​ចូលឆ្នាំថ្មី ដែល​នឹង​ចាប់ផ្តើម​នៅ​ថ្ងៃទី ២២ ខែ​មករា​៕

​ចិន​កំពុង​ពិភាក្សា​ជាមួយ​ក្រុមហ៊ុន Pfizer Inc ដើម្បី​ទទួលបាន​អាជ្ញាប័ណ្ណ​មួយ​ដើម្បី​ផលិត​និង​ចែកចាយ​ថ្នាំ Paxlovid នៅក្នុង​ប្រទេស​ចិន