​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ក្រុមហ៊ុន Ant Group បាន​និយាយ​នៅ​ថ្ងៃ​សៅរ៍​ទី​៧​មករា​នេះ​ថា ស្ថាបនិក​ក្រុមហ៊ុន Ant Group លោក ជែក ម៉ា​នឹង​លែង​គ្រប់គ្រង​ក្រុមហ៊ុន​បច្ចេកវិជ្ជា​​ហិរញវត្ថុ​យក្ស​របស់​ចិន​នេះ​ទៀតហើយ បន្ទាប់ពី​ម្ចាស់​ភាគហ៊ុន​របស់​ក្រុមហ៊ុន​បាន​យល់ព្រម​អនុវត្ត​ការកែតម្រូវ​ជា​បន្តបន្ទាប់ ដែល​នឹង​ធ្វើឱ្យ​គាត់​បោះបង់ចោល​សិទ្ធិ​បោះឆ្នោត​ភាគច្រើន​របស់​គាត់​។​

​ចំណាត់ការ​នេះ​គឺជា​ការវិវឌ្ឍ​ដ៏​ធំ​មួយ​ទៀត​បន្ទាប់ពី​អាជ្ញាធរ​ចិន​ធ្វើការ​បង្ក្រាប​ផ្នែក​បទ​ប្បញ្ញត្តិ ដែល​បាន​កម្ទេច​ចោល IPO​របស់​ក្រុមហ៊ុន Ant​ចំនួន ៣៧ ពាន់​លាន​ដុល្លារ​នៅ​ចុងឆ្នាំ ២០២០​ហើយ​បាន​នាំ​​ឱ្យមាន​ការរៀបចំ​រចនា​សម្ព័ន្ធ​ឡើងវិញ​ដោយ​បង្ខំ​លើ​ក្រុមហ៊ុន​បច្ចេកវិជ្ជា​ហិរញ្ញវត្ថុ​នេះ​។​

​ខណៈ​លោក​ម៉ា​កាន់កាប់​ភាគហ៊ុន​ត្រឹមតែ ១០ ភាគរយ​នៅក្នុង​ក្រុមហ៊ុន Ant ដែល​ជា​សាខា​របស់​ក្រុមហ៊ុន​ពាណិជ្ជកម្ម​អេឡិចត្រូនិក​យក្ស Alibaba Group Holding Ltd​គាត់​បាន​ប្រើប្រាស់​​ការគ្រប់គ្រង​លើ​ក្រុមហ៊ុន​នេះ​តាមរយៈ​អង្គភាព​ពាក់ព័ន្ធ នេះ​បើ​យោង​តាម​សៀវភៅ​ណែនាំ IPO របស់​ក្រុមហ៊ុន Ant​ដែល​បាន​ដាក់​ជាមួយ​ផ្សារ​ហ៊ុន​នៅ​ឆ្នាំ ២០២០​។​

​សៀ​ភៅ​ណែនាំ​នោះ​បង្ហាញថា ក្រុមហ៊ុន Hangzhou Yunbo ដែល​ជា​ការវិនិយោគ​ខាង​យានជំនិះ​សម្រាប់​លោក​ម៉ា មាន​ការគ្រប់គ្រង​លើ​អង្គភាព​ពីរ​ផ្សេង​ទៀត ដែល​មាន​ភាគហ៊ុន ៥០,៥​ភាគរយ​នៃ​​ក្រុមហ៊ុន Ant រួម​បញ្ចូល​គ្នា​។​

​ក្រុមហ៊ុន Ant បាន​និយាយថា លោក​ម៉ា​និង​ម្ចាស់​ភាគហ៊ុន​ធំ​ចំនួន​ប្រាំ​បួនរូប​ផ្សេង​ទៀត​របស់​ខ្លួន​បាន​យល់ព្រម​ថា​នឹង​លែង​ធ្វើ​សកម្មភាព​នៅក្នុង​កិច្ចព្រមព្រៀង​នៅ​ពេល​អនុវត្ត​សិទ្ធិ​បោះឆ្នោត​​របស់​ពួកគេ​ហើយ​នឹង​បោះឆ្នោត​ដោយ​ឯករាជ្យ​តែប៉ុណ្ណោះ​។​

​លោក​ម៉ា​ពីមុន​មាន​សិទ្ធិ​បោះឆ្នោត​ជាង ៥០ ភាគរយ​នៅ​ក្រុមហ៊ុន Ant ប៉ុន្តែ​ការផ្លាស់ប្តូរ​នេះ​នឹង​មានន័យថា ភាគហ៊ុន​របស់​គាត់​ធ្លាក់ចុះ​មក​នៅត្រឹម ៦,២ ភាគរយ នេះ​បើ​យោង​តាម​ការ​គណនា​របស់​ទីភ្នាក់ងារ​សារព័ត៌មាន​រ៉​យ​ទ័រ​។​

Ant ក៏​និយាយ​ដែរ​ថា ខ្លួន​នឹង​បន្ថែម​នាយក​ឯករាជ្យ​ទី​៥​ទៅក្នុង​ក្រុមប្រឹក្សាភិបាល​របស់ខ្លួន ដូច្នេះ ពួក​នាយក​ឯករាជ្យ​នឹង​មាន​សំឡេង​ភាគច្រើន​ក្នុង​ក្រុមប្រឹក្សាភិបាល​របស់​ក្រុមហ៊ុន​។ បច្ចុប្បន្ន​ក្រុមហ៊ុន​មាន​ប្រធាន​ក្រុមប្រឹក្សា​ចំនួន​ប្រាំបី​រូប​។​

​ក្រុមហ៊ុន​និយាយ​នៅក្នុង​សេចក្តីថ្លែងការណ៍​របស់​ខ្លួន​ថា “​ជា​លទ្ធផល​នឹង​លែង​មាន​ស្ថានភាព​ដែល​ម្ចាស់​ភាគហ៊ុន​ដោយ​ផ្ទាល់​ឬ​ដោយ​ប្រយោល មាន​ការគ្រប់គ្រង​រួមគ្នា​លើ​ក្រុមហ៊ុន Ant Group ទៀតហើយ​”៕

លោក​ម៉ា​នឹង​បោះបង់​ចោល​ការគ្រប់គ្រង​ក្រុមហ៊ុន Ant Group