​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ដ្រូ​ន ដែល​ហោះ​ក្នុង​ល្បឿន ១៤៥ គីឡូម៉ែត្រ​ក្នុង​មួយ​ម៉ោង​ឆាប់ៗ​នេះ​អាច​នឹង​ផ្តល់​ជំនួយ​សង្គ្រោះ​ជីវិត​ក្នុងពេល​តែ​ប៉ុន្មាន​នាទី​ប៉ុណ្ណោះ​។​

​ប្រតិបត្តិ​ករ​សង្គ្រោះបន្ទាន់​នឹង​ត្រូវបាន​បណ្តុះបណ្តាល​ដើម្បី​បញ្ជូន​ដ្រូ​ន ដែល​ផ្ទុក​ជាមួយ​ឧបករណ៍ EpiPens ឬ​ឧបករណ៍​សង្គ្រោះ​ដង្ហើម​ភ្លាមៗ​នៅពេលដែល​មាន​នរណា​ម្នាក់​តេ​ទៅលេខ ៩៩៩​។​

​ក្រុមហ៊ុន​អាម៉េរិក Blueflite បាន​និយាយថា ដ្រូ​ន​របស់ខ្លួន ដែល​កំពុង​ហោះ​សាកល្បង​នៅឡើយ គឺ​មាន​បំណង​សម្រាប់ “​ការ​ចែកចាយ​បាន​ទាន់​ចិត្ត​ភ្លាមៗ​”​។​

​ដោយ​ហោះ​ក្នុង​កម្ពស់​ប្រហែល ៤០ ម៉ែត្រ ដ្រូ​ន​បើក​ស្វយ័ត​នេះ​អាច​រុករក​ផ្លូវ​របស់​វា​ទៅកាន់​អ្នកជំងឺ​ក្នុង​រង្វង់​១៦​គីឡូម៉ែត្រ​។​

​នៅ​ពេល​មកដល់ ពួកវា​នឹង​ហោះ​សំកាំង​រួច​ទម្លាក់​ឧបករណ៍​ទៅ​អ្នកជំងឺ ដែល​ពួក​វា​នឹង​កំណត់​អត្តសញ្ញាណ​ដោយ​កាមេរ៉ា​មួយ​។​

​ក្រុមហ៊ុន Blueflite បាន​ប្រកាស​នៅ​ក្នុង​កម្មវិធី​តាំងពិព័រណ៍ CES ក្នុង​ទីក្រុង​ឡាសវេ​ហ្គាស​ថា ខ្លួន​បាន​ចុះ​កិច្ចព្រមព្រៀង​ជាមួយ​ក្រុមហ៊ុន Acadian Ambulance​ដែលជា​ក្រុមហ៊ុន​ដឹក​​ជញ្ជូន​វេជ្ជសាស្ត្រ​ឯកជន​ដ៏​ធំ​បំផុត​មួយ​នៅក្នុង​សហរដ្ឋ​អាម៉េរិក​។​

​ប្រធាន​ផ្នែក​បច្ចេកវិជ្ជា លោក ជែម​ស៍ ម៉ា​ក្លៀ​រិន (James McClearen) បាន​ប្រាប់​កាសែត Daily Mail ថា ក្រុមហ៊ុន​ក៏​កំពុង​បង្ហើយ​កិច្ចព្រមព្រៀង​ជាមួយ​ក្រុមហ៊ុន​មួយ​នៅក្នុង​ប្រទេស​អៀរ​ឡង់​ផងដែរ ហើយ​សង្ឃឹមថា​នឹង​បញ្ជូន​ដ្រូ​ន​នេះ​ទៅ​កាន់​ចក្រភព​អង់គ្លេស​នាពេល​អនាគត​៕

ដ្រូ​ន​ដុកទ័​ររបស់​ក្រុមហ៊ុន Blueflite នឹង​ចែកចាយ​ថ្នាំ​និង​ឧបករណ៍​សង្គ្រោះ​ជីវិត​ក្នុងពេល​អនាគត​ដ៏​ខ្លី​ខាងមុខនេះ