ដោយៈ សុក្ខារិន / ពោធិសាត់ៈ លោក ខូយ រីដា ប្រធានគណបក្សខេត្ត អភិបាលខេត្តពោធិសាត់ និងជាប្រធានក្រុមការងារចុះជួយក្រុងពោធិ៍សាត់ បានថ្លែងថា សន្តិភាព ស្ថិរភាពនយោបាយ ជាមូលដ្ឋានគ្រឹះ សម្រាប់ការអភិវឌ្ឍ និងការរស់នៅ ដ៏សុខដុមរមនា របស់ប្រជាពលរដ្ឋ ត្រូវតែរួមគ្នារក្សាការពារ និង សាមគ្គីយ៉ាងរឹងមាំ ជុំវិញរាជរដ្ឋាភិបាល ស្របតាមគោលការណ៍ អរគុណសន្តិភាព អរគុណនយោ បាយឈ្នះ ឈ្នះ បានក្លាយជាស្មារតីដ៏ខ្លាំងក្លា និងរស់រវើក នៅក្នុងដំណើរការកសាង និងការពារមាតុភូមិ។
លោក ខូយ រីដា បានថ្លែងបែបនេះ នៅក្នុងឱកាសអញ្ជើញជាអធិបតី អបអរសាទរ ខួបលើកទី៤៤ ទិវាជ័យជំនះ ៧ មករា ឆ្នាំ១៩៧៩ និង ៧ មករា ២០២៣ នៅសាលប្រជុំគណបក្សខេត្ត ស្ថិតក្នុងសង្កាត់ព្រៃញីក្រុងពោធិ៍សាត់ នៅថ្ងៃទី៧ ខែមករា ឆ្នាំ២០២៣ ដោយមានអ្នកចូលរួមយ៉ាងច្រើនកុះករ។
តាមរយៈនេះផងដែរ លោក ខូយ រីដា បានបញ្ជាក់ថាៈ នៅសល់តែ ៧ ខែទៀត ការបោះឆ្នោតជ្រើតាំងតំណាងរាស្ត្រ នីតិកាលទី៧ គឺជាព្រឹត្តការណ៍ជាប្រវត្តិសាស្ត្រ និងមានអត្ថន័យយ៉ាងធំធេង ចំពោះជោគវាសនារបស់ជាតិ និងប្រជាជន ដែលកន្លងមក បានឆ្លងកាត់ការបោះឆ្នោតសកលថ្នាក់ជាតិ ចំនួន ៦ លើក និង ការបោះឆ្នោតថ្នាក់ឃុំ សង្កាត់ ៥ លើករួចមកហើយ ពិតជាមានការយល់ដឹង និងមានបទពិសោធន៍គ្រប់គ្រាន់ ក្នុងការអនុវត្តនូវសិទ្ធិសេរីភាពរបស់ ខ្លួនច្បាស់ លាស់ត្រឹមត្រូវ។
នៅក្នុងបរិការណ៍នេះ ក្នុងនាមជាប្រធានគណបក្សប្រជាជនកម្ពុជាខេត្តលោកបានអំពាវនាវដល់សមាជិក សមាជិកាបក្សគ្រប់រូប គ្រប់ផ្នែក និងគ្រប់ថ្នាក់ តែងតែគាំទ្រ និងជឿជាក់លើការដឹកនាំ របស់គណបក្សប្រជា ជនកម្ពុជារយៈពេល ៤៤ ឆ្នាំ កន្លងមកនេះ អាចបំពេញបេសកកម្ម បម្រើជាតិ មាតិភូមិ ប្រកបដោយជោគជ័យ៕/V/សរន
