​ដោយៈ បាយ័ន / សៀមរាបៈ នៅ​ចុង​សប្តាហ៍​ទី​១ ខែមករា ឆ្នាំ​២០២៣ នេះ នៅ​សាលា​ខេត្តសៀមរាប មាន​ពិធី​សំណេះសំណាល និង​ប្រគល់​រង្វាន់​ម៉ូតូ ដើម្បី​លើកទឹកចិត្ត ដល់​សិស្សានុសិស្ស ប្រឡង​ជាប់​សញ្ញាបត្រ​មធ្យមសិក្សា ទុតិយភូមិ ឆ្នាំ​២០២១-២០២២ ដែល​ទទួលបាន​និទ្ទេស A ចំនួន ១១១ នាក់ នៅ​ខេត្តសៀមរាប ក្រោម​អធិបតីភាព​សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ និង​ជា​ប្រធាន​ក្រុមការងារ​រាជ រដ្ឋាភិបាល ចុះជួយ​មូលដ្ឋាន​ខេត្តសៀមរាប​។​

​ក្នុងឱកាស​នោះ ក៏មាន​ការអញ្ជើញ​ចូលរួម​ពី លោក​-​លោកស្រី សមាជិក​ព្រឹទ្ធសភា តំណាងរាស្ត្រ​មណ្ឌល​សៀមរាប សមាជិក ក្រុមការងារ​រាជរដ្ឋាភិបាល​ចុះជួយ មូលដ្ឋាន​ខេត្តសៀមរាប និង​ប្រតិភូ​ក្រសួងការពារជាតិ ព្រមទាំង​សមាជិក​ក្រុមប្រឹក្សា ខេត្ត គណៈ​អភិបាលខេត្ត ប្រធាន​មន្ទីរ អង្គភាព និង​អាណាព្យាបាល​សិស្ស ផងដែរ​។

​លោក លី ប៊ុន​ណា ប្រធាន​មន្ទីរអប់រំ យុវជន និង​កីឡា​ខេត្ត បានបញ្ជាក់​ឲ្យ​ដឹងថាៈ សម័យ​ប្រឡង​សញ្ញាបត្រ មធ្យមសិក្សា​ទុតិយភូមិ ឆ្នាំ​២០២១.២០២២ នៅ​ថ្ងៃទី ០៥ ខែធ្នូ ឆ្នាំ​២០២២ នៅ​ខេត្តសៀមរាប មាន​មណ្ឌល​ប្រឡង​ចំនួន ១៤ មណ្ឌល ស្មើនឹង ៤១៨ បន្ទប់ ដែលមាន​បេក្ខជន​ប្រឡង សរុប ១០.៣៧៣ នាក់ ស្រី ៥.៩៣៣ នាក់ ក្នុងនោះ ថ្នាក់​វិទ្យាសាស្ត្រ ៥ មណ្ឌល ស្មើនឹង ១៣១ បន្ទប់ ចំនួន ៣.២៣៣ នាក់ ស្រី ២.០៥១ នាក់ និង វិទ្យាសាស្ត្រ​សង្គម មាន ៩ មណ្ឌល មាន ២៨៧ បន្ទប់ មាន​ចំនួន ៧.១៤០ នាក់ ស្រី ៣.៨៨២ នាក់ ។ ក្នុងនោះ បេក្ខជន​មក​ប្រឡង សរុប​ចំនួន ១០.២២៩ នាក់ ស្រី ៥.៨៦១ នាក់ ថ្នាក់​វិទ្យាសាស្ត្រ សរុប ៣.២១៣ នាក់ ស្រី ២.០៣៨ នាក់ , ថ្នាក់​វិទ្យាសាស្ត្រ​សង្គម សរុប ៧.០១៦ នាក់ ស្រី ៣.៨២៣ នាក់ ។ បេក្ខជន​ចំណេះ​ទូទៅ ៩.០៣៥ នាក់ ស្រី ៣.៨២៣ នាក់ , បេក្ខជនស្វ័យរិន​ចំណេះ​ទូទៅ សរុប ៩០៥ នាក់ ស្រី ៤៧៨ នាក់ , បេក្ខជន​បំពេញវិជ្ជា ១៣២ នាក់ ស្រី ៦៦ នាក់ , បេក្ខជនស្វ័យរិន​បំពេញវិជ្ជា ១៥៧ នាក់ ស្រី ៦៨ នាក់ ។​

​ជា​លទ្ធផល​នៃ​ការប្រឡង​ជាប់ សញ្ញាបត្រ​មធ្យមសិក្សា​ទុតិយភូមិ ឆ្នាំ​២០២១-២០២២ ទូទាំង​ខេត្ត សរុប ៨.១១១ នាក់ ស្រី ៤.៨៤២ នាក់ ដែលមាន​សិស្ស ជាប់​និទ្ទេស A ចំនួន ១១១ នាក់ ស្រី ៦១ នាក់ , និ​ទេ្ទ​ស B ចំនួន ៦៥៤​នាក់ ស្រី ៤៣៦ នាក់ , និទ្ទេស C ចំនួន ១.៧៧៦ នាក់ ស្រី ១.១២៣ នាក់ , និទ្ទេស D ចំនួន ២.៨៨១ នាក់ ស្រី ១.៧៧៣ នាក់ និង​និទ្ទេស E ចំនួន ២.៦៨៩ នាក់ ស្រី ១៤៣ នាក់​។​

​មានប្រសាសន៍​សំណេះសំណាល​នោះដែរ សម្តេច​ពិជ័យ​សេនា ទៀ បាញ់ បាន​ថ្លែងអំណរគុណ នយោបាយ​ឈ្នះ ឈ្នះ អរគុណ​សន្តិភាព អរគុណ​ស្ថាបនិក សន្តិភាព ស្ថិតក្រោម​ម្លប់​សន្តិភាព នៃ​កិច្ចដឹកនាំ​របស់​សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បានធ្វើ​ឲ្យ​ប្រទេស​កម្ពុជា មានការ​អភិវឌ្ឍន៍ លើ​គ្រប់​វិស័យ ពិសេស​ខេត្តសៀមរាប មានការ​អភិវឌ្ឍន៍​លើ គ្រប់​វិស័យ ក្រោម​បរិយាកាស​សន្តិសុខ សុវត្ថិភាព សណ្តាប់ធ្នាប់​សាធារណៈ បានល្អ​ប្រសើរ ជូន​ប្រជាពលរដ្ឋ ភ្ញៀវទេសចរ​ជាតិ អន្តរជាតិ ដែល​ចូលមក​ទស្សនា កម្សាន្ត នៅតាម​តំបន់​រមណីយដ្ឋាន​អង្គរ និង​រមណីយដ្ឋាន​ធម្មជាតិ ។

​សម្តេច​ពិជ័យ​សេនា ទៀ បាញ់ ក៏បាន​វាយតម្លៃ​ខ្ពស់ ចំពោះ​ចៅៗ ជា​សិស្សានុសិស្ស ក៏ដូចជា​លោកគ្រូ​អ្នកគ្រូ សាស្ត្រាចារ្យ និង​មាតាបិតា អាណាព្យាបាល​សិស្ស ទាំងអស់ ដែល​បាន​ចូលរួមចំណែក ក្នុងការ​បណ្តុះបណ្តាល​ធ​ន​ធាន​មនុស្ស បានល្អ​នៅ​កម្ពុជា សំខាន់​ក្នុង​ខេត្តសៀមរាប ទាំង​នៅ​គ្រឹះស្ថាន​រដ្ឋ និង​ឯកជន​។​

​សម្តេច​ពិជ័យ​សេនា ទៀ បាញ់ បានបញ្ជាក់​ថាៈ ដោយសារ​វិបត្តិ​ជំងឺ​កូ​វីដ​-១៩ វិស័យ​អប់រំ បាន​បង្រៀន​តាមបែប​ឌីជីថល ដូចនេះ​ចូរ​ក្មួយៗ ខិតខំ​សិក្សា​ស្វែងយល់ ឱ្យទាន់ នា​សម័យ​ទំនើប​នេះ បន្ទាប់ពី​បញ្ចប់​មធ្យមសិក្សា​ទុតិយភូមិ​នេះ ក្មួយៗ ចៅៗ ត្រូវ​បន្ត​នូវ​ថ្នាក់​មហាវិទ្យាល័យ សាកលវិទ្យាល័យ នូវ​មុខវិជ្ជា​ដែល​ខ្លួន​ចង់បាន ពីព្រោះ​ក្មួយៗ ចៅៗ ជាស​រស​ស្តម្ភ​ដ៏​រឹងមាំ និង​ជា​ធនធានមនុស្ស​បន្តវេន ក្នុង​កិច្ចអភិវឌ្ឍន៍​ប្រទេស ឱ្យមាន​ការរីកចំរើន ដូច​បណ្តា​ប្រទេស​ជឿនលឿន លើ​សកលលោក​។ ម្យ៉ាងទៀត ក្មួយៗ ចៅៗ​ទាំងអស់ ពេល​បើកបរ ត្រូវគោរព ច្បាប់​ចរាចរណ៍ និង​ជៀស​ឲ្យ​ឆ្ងាយ​ពី​គ្រឿងញៀន ដោយ​ចៅៗ​ទាំងអស់ ជា​មូលដ្ឋានគ្រឹះ នៃ​ប្រទេសជាតិ ទៅ​អនាគត ។​

​សម្តេច​ពិជ័យ​សេនា ទៀ បាញ់ បាន​ឧបត្ថម្ភ​ដល់​សិស្សានុសិស្ស ជាប់​និទ្ទេស A ទាំង ១១១ នាក់ សិស្ស​ម្នាក់ៗ ទទួលបាន​ម៉ូតូ​ម៉ាក​ហុងដា វ៉េវ ១​គ្រឿង ភ្ជាប់​ដោយ ស្លាក​លេខ មួកសុវត្ថិភាព ១ ប្រេងសាំង ៥០ លីត្រ និង លិខិត​ស​សើរ ផងដែរ ៕/V​