ដោយៈ វ៉ៃ​កូ / ស្វាយរៀងៈ លោកស្រី កិត្តិ​សង្គហ​បណ្ឌិត ម៉ែន សំអន ឧបនាយក រដ្ឋមន្ត្រី អនុប្រធាន​គណបក្ស​ប្រជាជន​កម្ពុជា និង​ជា​ប្រធាន​ក្រុមការងារ គណបក្ស ចុះ​មូលដ្ឋាន​ខេត្តស្វាយរៀង បាន​មានប្រសាសន៍ថាៈ យើង​ត្រូវ​រួមគ្នា​អនុវត្ត​កម្មវិធី នយោបាយ របស់​គណបក្ស​ប្រជាជន​កម្ពុជា ឱ្យបាន​សម្រេច​ជោគជ័យ ដើម្បី​បម្រើ ផលប្រយោជន៍​ជាតិ និង​ប្រជាជន​។​

​លោកស្រី កិត្តិ​សង្គហ​បណ្ឌិត ម៉ែន សំអន បាន​ថ្លែង​បែបនេះ នៅពេល​លោកស្រី បាន​អញ្ជើញ​ជា​អធិបតី ក្នុង​កិច្ចប្រជុំ​បូកសរុប​ការងារ របស់​ក្រុមការងារ​គណបក្ស ខេត្តស្វាយរៀង ប្រចាំឆ្នាំ​២០២២ និង​ទិសដៅ ឆ្នាំ​២០២៣ នៅ​ថ្ងៃអាទិត្យ ទី​៨ ខែមករា ឆ្នាំ​២០២៣ ។​

​ថ្លែង​ក្នុងឱកាស​នោះ លោកស្រី បាន​កោតសរសើរ និង​វាយ​យ​តម្លៃ​ខ្ពស់ ចំពោះ លោក លោកស្រី ប្រធាន​ក្រុមការងារ​គណបក្ស​ចុះ​មូលដ្ឋាន ក្រុង​-​ស្រុក ប្រធាន គណបក្ស​ខេត្ត សមាជិក សមាជិកា ព្រឹទ្ធសភា រដ្ឋសភា រួមជាមួយ​ក្រុមការងា​រ គ្រប់​ថ្នាក់ ជាមួយ​ថ្នាក់ដឹកនាំ​គណបក្ស​គ្រប់​ថ្នាក់ ទោះបីជា​ក្នុងដំណាក់កាល​កូ​វីដ ១៩ ក៏​គ្រប់​ថ្នាក់​បាន​យកចិត្តទុកដាក់​យ៉ាងសកម្ម សហការ​បំពេញភារកិច្ច សម្រេចបាន ជោគជ័យ ជា​បន្តបន្ទាប់ ជូន​ខេត្តស្វាយរៀង គួរ​ជាទី​មោទនៈ ។

​លោកស្រី បាន​បន្តទៀតថាៈ ក្រុមការងារ​គណបក្ស​គ្រប់​ថ្នាក់​ ​និង​គណបក្ស​គ្រប់​ថ្នាក់ ត្រូវ​បន្ត​សហការ​រួមគ្នា​ប្រើប្រាស់ ឱ្យអស់​លទ្ធភាព​ទាំង​កម្លាំង​សរុប ម​ធ្យា​បាយ​សរុប​  ក្នុងការ​ចាត់តាំង​អនុវត្ត​ឱ្យមាន​ប្រសិទ្ធភាព​ខ្ពស់ នូវ​សេចក្តីសម្រេច​លេខ ៣៣៣ / ០៨២២/​សស​.​គក របស់​គណៈអចិន្ត្រៃយ៍​គ​ណៈ​ក​ម្មា​ធិ​ការ​កណ្តាល និង​ផែនការ សកម្មភាព លេខ ០០១/២២ ផ​ក​.​គខ របស់ គណៈអចិន្ត្រៃយ៍​គណបក្ស​ខេត្ត ស្តីពី​ផែនការ​រួម ឆ្ពោះទៅកាន់​ការបោះឆ្នោត​ជ្រើសតាំង​តំណាងរាស្ត្រ នីតិកាល​ទី​៧ ឆ្នាំ​២០២៣ ​។

​លោកស្រី ក៏បាន​អំពាវនាវ​ដល់​ថ្នាក់ដឹកនាំ​សាខា​បក្ស មន្ទីរ អង្គភាព និង​ប្រធាន អនុប្រធាន គណៈកម្មាធិការ​គណបក្ស ក្រុង ស្រុក គ្រប់​ថ្នាក់ គ្រប់ផ្នែក និង​មន្ត្រី សមាជិក សមាជិកា នៃ​គណបក្ស​ប្រជាជន​កម្ពុជា សូម​បន្ត​ពង្រឹង​សាមគ្គីភាព ឯកភាព​ផ្ទៃក្នុង​រឹងមាំ ខិតខំ​បន្ត​អនុវត្ត​កម្មវិធី​នយោបាយ និងសេចក្ដីសម្រេច​នានា របស់​គណបក្ស ឱ្យបាន​សម្រេច​ជោគជ័យ ដើម្បី​បម្រើ​ផលប្រយោជន៍​ដ៏​ឧត្តុង្គឧត្តម របស់​ជាតិ និង​ប្រជាជន​៕/V​