​ប្រែ​សម្រួលៈ​បំណង​(​ដេល្លី​ម៉េល​)៖ បុរស​អ៊ីរ៉ង់​អាយុ​៣២​ឆ្នាំ​ម្នាក់​ត្រូវបាន​ចាប់ខ្លួន​នៅ​អាល្លឺម៉ង់ ពី​បទ​សង្ស័យ​ថា​រៀបចំ​ផែន​ការវាយប្រហារ​ដោយ​ប្រើ​សារធាតុ​គីមី នេះ​បើ​តាម​មន្ត្រី​អាល្លឺម៉ង់​បាន​និយាយ​​កាលពី​ថ្ងៃអាទិត្យ​។​

​ប៉ូលីស​និង​រដ្ឋអាជ្ញា​បាន​និយាយថា បុរស​អ៊ីរ៉ង់​និង​មនុស្ស​ម្នាក់​ទៀត​ត្រូវបាន​ចាប់ខ្លួន​កាល​ពី​យប់ថ្ងៃសៅរ៍​នៅ​ទីប្រជុំជន​កា​សត្រូប​-​រ៉ូ​សែល​(Castrop-Rauxel)​ភាគ​ពាយព្យ​ក្រុង ដ​ត​ម៉ុន​(Dortmund)​។​

​នៅក្នុង​សេចក្តីថ្លែងការណ៍​រួមមួយ ពួកគេ​បាន​និយាយថា ក្រោម​ការជំរុញ​ទឹកចិត្ត​ដោយ​ភាពជ្រុលនិយម​អ៊ីស្លាម ជនសង្ស័យ​មាន​ផែនការ​វាយប្រហារ​ធំ​មួយ​ដោយ​ប្រើ​សារធាតុគីមីពុល​ស៊ីយ៉ា​នីត​និង​រីស៊ី​ន​។​

​ទីភ្នាក់ងារ​សារព័ត៌មាន​dpa​អាល្លឺម៉ង់បាន​រាយការណ៍​ថា អ្នក​ឯកទេស​ក្នុង​ឈុត​សម្លៀកបំពាក់​ប្រឆាំង​សារធាតុពុល បាន​ចូល​ឆែកឆេរ​ផ្ទះ​ជនសង្ស័យ នៅពេល​កាសែត​Bild​បាន​និយាយថា អាជ្ញាធរ​​អាល្លឺម៉ង់​បាន​ទទួល​ព័ត៌មាន​សម្ងាត់​មួយ​មក​ពី​ទីភ្នាក់ងារ​ស៊ើបការណ៍​របស់​សម្ពន្ធមិត្ត អំពី​ផែនការ​វាយប្រហារ​ដោយ​ប្រើ​សារធាតុ​គីមី​ពុល​នេះ​។​

​រំលឹកថា កាល​ពី​ប្រាំ​ឆ្នាំមុន ប៉ូលីស​អាល្លឺម៉ង់​ក៏បាន​ចាប់ខ្លួន​បុរស​ទុយ​នេ​ស៊ីម្នាក់​និង​ប្រពន្ធ​របស់គាត់ ចំពោះ​ការសង្ស័យថា​បានរៀបចំ​ផែន​ការវាយប្រហារ​ដោយ​ប្រើ​សារធាតុ​គីមី រី​ស៊ីន​(ricin)​តាងនាម​​អោយ​ក្រុម​រដ្ឋ​អ៊ីស្លាម​។​ពួកគេ​ក្រោយមក​ត្រូវបាន​រកឃើញ​​កំហុស និង​ត្រូវបាន​កាត់ទោស​អោយ​ជាប់គុក​១០​ឆ្នាំ​៕

​ប្រតិបត្តិការ​ឆែកឆេរ​ផ្ទះ​ជនសង្ស័យ​ធ្វើ​ឡើង​ដោយ​ប៉ូលីស​និង​ផ្នែក​អគ្គិភ័យ​បាន​រកឃើញ​សារធាតុ​ពុលកាលពី​ល្ងាច​ថ្ងៃ​៧​មករា​នៅ ទីប្រជុំជន​កា​សត្រូប​-​រ៉ូ​សែ​ល​