ដោយៈ ស​រិ​ទ្ធ / ភ្នំពេញៈ រថយន្ត​កុងតឺន័រ បាន​បើក​បុក​ម៉ូតូ​កម្មករសំណង់​ម្នាក់ ពីក្រោយ កិន​អូស​ជាច្រើន​ម៉ែត្រ បណ្តាលឱ្យ​បែកក្បាល ធ្លាយ​ខួរ​ស្លាប់​ភ្លាមៗ នៅនឹងកន្លែង​កើតហេតុ ចំណែក​ម៉ូតូ​របស់​ជនរងគ្រោះ​វិញ ត្រូវ​កៀប​ជាប់​ក្រោម រថយន្ត ។​

​ហេតុការណ៍​នេះ បានកើត​ឡើង កាលពី​វេលា​ម៉ោង ១១:៣០​នាទី យប់​ថ្ងៃទី​៧ ខែមករា ឆ្នាំ​២០២៣ ស្ថិតនៅតាម​បណ្តោយ​ផ្លូវជាតិ​លេខ​៦A សង្កាត់​ព្រែកលៀប ខណ្ឌ​ជ្រោយចង្វារ រាជធានី​ភ្នំពេញ​។​

​សព​ជនរងគ្រោះ មានឈ្មោះ យឹម អាត ភេទ​ប្រុស អាយុ​ជាង ៣០ ឆ្នាំ ជា​កម្មករ សំណង់ ។​

​បើ​យោងតាម​ការបញ្ជាក់​ពី​ពលរដ្ឋ នៅ​កន្លែងកើតហេតុ បាន​ប្រាប់​ឱ្យដឹងថាៈ មុន​កើតហេតុ គេ​ឃើញ​ម៉ូតូ​ម៉ាក​ហុងដា ឌ្រី​ម សង់​ពណ៌​ខ្មៅ មួយគ្រឿង ពាក់​ផ្លាកលេខ ង 8901 .​ភព​1 ជិះ​ដោយ​បុរស​ម្នាក់ ធ្វើដំណើរ​តាម​បណ្តោយ​ផ្លូវជាតិ លេខ​៦A ក្នុងទិសដៅ​ពី​ខាងកើត មក​ខាងលិច ក្នុង​ល្បឿន​មធ្យម លុះ​មកដល់ ចំណុច កើតហេតុ​ខាងលើ ស្រាប់​តែមាន​រថយន្ត​កុងតឺន័រ មួយគ្រឿង ពាក់​ស្លាក​លេខ ត្បូងឃ្មុំ 3A1831 បើកបរ​ដោយ​បុរស​ម្នាក់ ធ្វើដំណើរ​ស្រប​ទិស​គ្នា ពី​ខាងកើត មក​ខាងលិច ក្នុង​ល្បឿន​លឿន​។​

​លុះ​មកដល់​ចំណុចកើតហេតុ ពុំ​ដឹងថា មាន​បញ្ហា​អ្វី​នោះទេ ក៏​ជាន់​ហ្គែ​រ ទៅបុក​ម៉ូតូ ពីក្រោយ យ៉ាង​ពេញទំហឹង រួច​កិន​ពីលើ​បុរសរងគ្រោះ ចំក្បាល បណ្តាលឱ្យ​បែក​ខួរ ខ្ទាត​ពេញ​ផ្លូវស្លាប់​មួយ​រំពេច ចំណែក​រថយន្ត​បង្ក​បន្ត​ល្បឿន បើក​រត់​ទៅមុខ​ទាំង​ម៉ូតូ អូស​ជាប់​ក្រោម​រថយន្ត ជាច្រើន​ម៉ែត្រ ទើប​កម្លាំង​សមត្ថកិច្ច ប្រដេញ​ពីក្រោយ ឃាត់​បានតែ​រថយន្ត ចំណែក​តៃកុង បាន​រត់​គេចខ្លួនបាត់​ស្រមោល​។​

​បន្ទាប់ពី​កើតហេតុ សមត្ថកិច្ច​មូលដ្ឋាន​ប៉ុស្តិ៍នគរបាល​រដ្ឋបាល សង្កាត់​ព្រែកលៀប បាន​ចុះ​មកដល់ រួច​ក៏​ទំនាក់ទំនង​ទៅ​ផ្នែក​ជំនាញ​ចរាចរណ៍​បន្ត ដើម្បីឱ្យ​ចុះមក វាស់វែង និង​ធ្វើ​កំណត់ហេតុ យក​រថយន្ត​បង្ក និង​ម៉ូតូ​ជនរងគ្រោះ ទៅ​រក្សាទុក​នៅ ការិយាល័យ​ចរាចរណ៍​ផ្លូវគោក នៃ​ស្នងការដ្ឋាន​នគរបាល​រាជធានី​ភ្នំពេញ ដើម្បី​រង់ចាំ​ឲ្យ​ភាគី​ម្ចាស់​រថយន្ត​បង្ក ចូលខ្លួន​មក​ដោះស្រាយ នៅពេល​ក្រោយ​។ ចំណែកឯ​សព សមត្ថកិច្ច ធ្វើ​កំណត់ហេតុ​ប្រគល់​ឱ្យទៅ​ក្រុមគ្រួសារ មក​ទទួលយក ទៅធ្វើ​បុណ្យ​តាម​ប្រពៃណី​។​

​សមត្ថកិច្ច​ជំនាញ បាន​អំពាវនាវ​ថា សូម​បើកបរ​ដោយ​ការប្រុងប្រយ័ត្ន គ្រប់ពេលវេលា គោរព​ជីវិត​អ្នកដទៃ ឲ្យ​ដូច​គោរព​ស្រលាញ់​ជីវិត​ខ្លួនឯង​៕/V​