​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកគាំទ្រ​អតីត​ប្រធានាធិបតី​ប្រេ​ស៊ី​លលោក ជែរ បូល​សូ​ណារ៉ូ (Jair Bolsonaro) ដែល​បដិសេធ​មិន​ទទួលស្គាល់​បរាជ័យ​ក្នុង​ការបោះឆ្នោត​របស់​គាត់ បាន​សម្រុកចូល​សភា តុលាការ​កំពូល និង​វិមាន​ប្រធានាធិបតី​ក្នុង​រដ្ឋធានី​កាលពី​ថ្ងៃអាទិត្យ​ទី​៨​មករា គឺ​មួយ​សប្តាហ៍​បន្ទាប់ពី​ការ​ស្បថ​កាន់​អំណាច​របស់​គូ​ប្រជែង​ឆ្វេងនិយ​ម​របស់គាត់​គឺ​ប្រធានាធិបតី ល្វីស អ៊ី​ណា​ស៊ី​អូ លូ​ឡា ដា ស៊ី​ល​វ៉ា (Luiz Inácio Lula da Silva) ។​

​បាតុករ​រាប់ពាន់​នាក់​បាន​ឆ្លងកាត់រ​បាំង​សន្តិសុខ ឡើង​លើដំបូល វាយកម្ទេច​បង្អួច និង​លុកលុយ​អគារ​ទាំងបី ដែល​គេ​ជឿ​ថា​នៅ​ទំនេរ​ភាគច្រើន ហើយ​អង្គុយ​នៅលើ​ទីលាន​អំណាច​ទាំង​បី (Three Powers Square) ដ៏​ធំ​របស់​រដ្ឋធានី​ប្រា​ស៊ី​លី​យ៉ា (Brasilia)​។​

​ពួកគេ​មួយ​ចំនួន​បាន​អំពាវនាវ​ឱ្យមាន​អន្តរាគមន៍​យោធា​ដើម្បី​ស្តារ​លោក​បូល​សូ​ណារ៉ូ​ស្តាំ​និយមឱ្យ​ឡើងកាន់អំណាច​ឡើងវិ​ញ ឬ មិន​អ៊ីចឹង​បណ្តេញ​លោក​លូ​ឡា​ចេញពី​តំណែង​ប្រធានាធិបតី​។​

​នៅក្នុង​សន្និសីទ​សារព័ត៌មាន​ពី​រដ្ឋ​សៅ​ប៉ូ​ឡូ លោក​លូ​ឡា​បាន​និយាយថា លោក​បូល​សូ​ណារ៉ូ​បាន​លើកទឹកចិត្ត​ដល់​ការ​បះបោ​រដោយ​ក្រុម​មនុស្ស ដែល​លោក​ហៅថា “​ពួក​ជ្រុលនិយ​មហ្វា​ស៊ីស​”​ហើយ​លោក​បាន​​អាន​ក្រឹត្យ​ដែល​ទើប​ចុះហត្ថលេខា​ថ្មីថ្មោង​សម្រាប់​រដ្ឋាភិបាល​សហព័ន្ធ​ដើម្បី​គ្រប់គ្រង​សន្តិសុខ​នៅក្នុង​រដ្ឋធានី​។​

​លោក​លូ​ឡា​បាន​និយាយថា “​វា​គ្មាន​ហេតុការណ៍​ជា​គំរូ​សម្រាប់​អ្វី​ដែល​ពួកគេ​បាន​ធ្វើ​នោះទេ ហើយ​មនុស្ស​ទាំងនេះ​ត្រូវតែ​ទទួលទោស​”​។​

​ប៉ុស្តិ៍​ទូរទស្សន៍ Globo News បានបង្ហាញ​ក្រុមបាតុករ​ពាក់​ខោអាវ​ពណ៌​បៃតង​និង​លឿង​នៃ​ទង់ជាតិ​ប្រេ​ស៊ីល ដែល​បាន​ក្លាយជា​និមិត្តរូប​នៃ​ចលនា​អភិរក្សនិយម​របស់​ប្រទេស​ផង​ដែរ​និង​ត្រូវបាន​​យកមក​ប្រើប្រាស់​ដោយ​អ្នកគាំទ្រ​លោក​បូល​សូ​ណារ៉ូ​។​

​អតីត​ប្រធានាធិបតី​រូបនេះ​បាន​វាយប្រហារ​ម្តង​ហើយ​ម្តងទៀត​លើ​ចៅក្រម​តុលាការ​កំពូល ហើយ​បន្ទប់​ដែល​ពួកគេ​ធ្វើ​សវនាការ​ត្រូវ​បាន​កម្ទេច​ចោល​ដោយ​ក្រុម​កុបករ​។ ពួកគេ​បាន​បាញ់​បំពង់​ពន្លត់​អគ្គិភ័យ​នៅក្នុង​អគារ​សភា និង​វាយ​កម្ទេច​ការិយាល័យ​នៅ​វិមាន​ប្រធានាធិបតី​។ បង្អួច​បាន​ខូចខាត​នៅក្នុង​អគារ​ទាំងអស់​។​

​លោក​បូល​សូ​ណារ៉ូ ដែល​ហោះ​ទៅ​រដ្ឋ​ផ្លរីដា​នៅ​មុន​ថ្ងៃ​ស្បថ​កាន់​អំណាច​របស់​លោក​លូ​ឡា មិនបាន​ធ្វើ​អត្ថាធិប្បាយ​លើ​ព្រឹត្តិការណ៍​កាលពី​ថ្ងៃអាទិត្យ​នោះទេ​។​

​ប៉ូលិស​បាន​បាញ់​ឧស្ម័ន​បង្ហូរទឹកភ្នែក​ក្នុង​កិច្ចខិតខំ​ប្រឹងប្រែង​របស់​ពួកគេ​ដើម្បី​ដណ្តើម​អគារម​ក​វិញ ហើយ​រដ្ឋមន្ត្រីក្រសួង​យុត្តិធម៌ លោក ផ្លា​វី​អូ ឌី​ណូ (Flavio Dino)​បាន​និយាយ​នៅក្នុង​សន្និសីទ​​កាសែត​ថា មកទល់​ក្បាល​ព្រលប់​ថ្ងៃ​អាទិត្យ ការគ្រប់គ្រង​អគារ​នានា​ត្រូវបាន​ស្តារ​ឡើងវិញ​ហើយ ដោយ​មនុស្ស​ប្រហែល ២០០ នាក់​ត្រូវបាន​ចាប់ខ្លួន​ហើយ​ក្រុមមន្ត្រី​បន្ត​បាញ់​ឧស្ម័ន​បង្ហូរទឹកភ្នែក​​បន្ថែមទៀត​ដើម្បី​បណ្តេញ​ក្រុមអ្នកតវ៉ា​សេសសល់​ចេញពី​តំបន់​នោះ​៕

​បាតុករ​អុកឡុក​អគារ​សភា តុលាការ​កំពូល និង​វិមាន​ប្រធានាធិបតី​ក្នុង​រដ្ឋធានី​កាលពី​ថ្ងៃអាទិត្យ​ទី​៨​មករា​