​ប្រែ​សម្រួលៈ​បំណង​(​ដេល្លី​ម៉េល​)៖ នាយករដ្ឋមន្ត្រី​ម៉ាឡេស៊ី​ថ្មី លោក​អាន់​វ៉ា អ៊ីប្រាហ៊ីម​(Anwar Ibrahim)​បាន​ជួបពិភាក្សា​ជាមួយ​ប្រធានាធិបតី​ឥណ្ឌូនេស៊ី​កាលពី​ថ្ងៃ​ចន្ទ​ទី​៩​មករា ក្រោយ​ទទួលបាន​​ការជឿ​ទុកចិត្ត​ក្នុង​ការបោះឆ្នោត​ក្នុង​សភា​និង​ពង្រឹង​អំណាច​របស់​លោក​កាលពី​ខែ​មុន​ក្រោយ​ការបោះឆ្នោត​សកលមួយ ដែលមិនបានផ្តល់អោយនរណាម្នាក់ឈ្នះ​​ដាច់​។​

​លោក​អាន់​វ៉ា អ៊ីប្រាហ៊ីម ដែល​ជា​មេដឹកនាំ​ប្រឆាំង​យូរអង្វែង​ម្នាក់​នៅ​ម៉ាឡេស៊ី បាន​ស្បថ​ចូលកាន់​តំណែង​នាយករដ្ឋមន្ត្រី​ទី​ដប់រ​បស់​ម៉ាឡេស៊ី​កាលពី​ថ្ងៃ​២៤​វិច្ឆិកា​ដើម្បី​ដឹកនាំ​រដ្ឋាភិបាល​បង្រួបបង្រួម​ជាតិ​​មួយ​ក្នុង​ការចង​សម្ពន្ធភាព​មិន​ជា​មាំទាំ​មួយ​ជាមួយ​គណបក្ស​ជាប់​ពាក់ព័ន្ធ​នឹង​អំពើ​ពុករលួយ​ដែល​ធ្លាប់ជា​គូប្រជែង​នយោបាយ​របស់​លោក​។​

​លោក​បាន​ជួប​ប្រធានាធិបតី​ឥណ្ឌូនេស៊ី ចូកូ វី​ដូ​ដូ​(Joko Widodo)​ដើម្បី​ពិភាក្សា​គ្នា​នៅ​វិមាន​ប្រធានាធិបតី​នៅ​ក្រុង​បូ​ហ្គ័​រ​(Bogor)​នៅ​ខាងត្បូង​ក្រុង​ហ្សា​ការតា ។​

​លោក​អាន់​វ៉ា និង​ភរិយា ចេញដំណើរ​ទៅ​កាន់​ឥណ្ឌូនេស៊ី ក្នុង​ដំណើរ​ចេញ​ក្រៅប្រទេស​លើកដំបូង​របស់​លោក

​មេដឹកនាំ​ទាំង​ពីរ​ត្រូវ​រំពឹងថា​នឹង​ពិភាក្សា​បញ្ហា​តំបន់​និង​សកល រួម​មាន​ពាណិជ្ជកម្ម ឧស្សាហកម្ម​ដូងប្រេង ជម្លោះ​ព្រំដែន​និង​ស្ថានការណ៍​ក្នុងប្រទេស​មី​យ៉ាន់​ម៉ា ។​

​ពួក​លោក​ក៏​នឹង​ពិភាក្សា​សិទ្ធិ​របស់​កម្មករ​ចំណាកស្រុក​ក្រោយពី​ឥណ្ឌូនេស៊ី​កាលពី​ឆ្នាំមុន​បាន​ដាក់​បំរាម​បណ្តោះអាសន្ន​មួយ​លើ​ការបញ្ជូន​កម្មករ​ពល​ករ​ទៅកាន់​ម៉ាឡេស៊ី ក្រោយ​មាន​សេចក្តីរាយការណ៍​អំពី​​ការរំលោភ​សិទ្ធិ​កម្មក​រព​លករ​ពី​សំណាក់និយោជក​និង​ម្ចាស់ផ្ទះ​ម៉ាឡេស៊ី​។​

​ក្នុង​ដំណើរ​ទស្សនកិច្ច​នេះ ក្រុមហ៊ុន​ម៉ាឡេស៊ី​ចំនួន​ប្រាំបី​ក៏​បាន​ចុះហត្ថលេខា​លើ​អនុស្សរណៈ​នៃ​ការយោគយល់​គ្នា​ជាមួយ​ក្រុមហ៊ុន​ឥណ្ឌូនេស៊ី ដែល​មាន​ទឹកប្រាក់ដល់​ទៅ​១,៦៦​ពាន់​លាន​រីង​ហ្គី​ត​៕