ដោយ៖ដេប៉ូ/ភ្នំពេញ៖ស្លឹកគ្រៃ (Citronella oil)ក្រៅពីប្រើបំបាត់ក្លិនឆ្អាបហើយ តាមការស្រាវជ្រាវបានបង្ហាញថា ស្លឹកគ្រៃនៅជារុក្ខជាតិដែលជនជាតិខ្មែរបានចេះយកមកប្រើប្រាស់ធ្វើជាឱសថព្យាបាលរោគជាច្រើនមុខដូចជា ព្យាបាលរលាកទងសួត អាការដេកមិនលក់ ជួយរំលាយអាហារ និង បញ្ចុះកម្តៅទៀតផង។

យោងតាមទំព័រហ្វេសប៊ុករបស់ក្រសួងបរិស្ថានបានឱ្យដឹងថា៖តាមធម្មតាស្លឹកគ្រៃ មានកម្ពស់ ០,៨០-១,៥ម ស្លឹកដុះចេញពីក្តៀង មានក្លិនក្រអូបឈ្ងុយ សំប៉ែតវែងស្រួចចុង មានរោមខ្លីហើយរឹង នៅផ្ទៃក្រោម ផ្ទៃលើរលីង គែមស្លឹកមានរោមខ្លីៗ ហើយរឹងអាចមុត ស្លឹកមានទ្រនុងកណ្តាលក្រាស់ហើយរឹង។ រុក្ខជាតិផ្កាឈ្មោលមានទង ផ្លែស្ងួតរាងទ្រវែង មិនបែក មានគ្រាប់តែមួយជាប់នឹងសម្បកស្តើង។ ដើមមានក្លិនក្រអូបប្រហើរ បន្តពូជដោយបំបែកកូនដើមចេញពីគល់ ដុះលើគ្រប់ស្ថានភាពដីនៅតំបន់មានអាកាសធាតុក្តៅបង្គួរ។

សម្រាប់ការប្រើប្រាស់បានជា គ្រឿងទេស និងឱសថ៖

-គ្រឿងទេស: បង្កើនរសជាតិ និងក្លិនឈ្ងុយ ឬកាត់ក្លិនឆ្អាប។

ឱសថ: ស្លឹកគ្រៃដាំទឹកផឹកព្យាបាលរលាកទងសួត ជំងឺដេកមិនលក់ ជួយរំលាយអាហារ បញ្ចុះកម្តៅ។ ​

គួរបញ្ជាក់ថា៖បើតាមការស្រាវជ្រាវផ្សេងទៀតក៏បានបង្ហាញដែរស្លឹកគ្រៃក៏មានសារជាតិដែលអាច​បំបាត់​ការឈឺ​ចុកចាប់ តាមផ្លូវ​រំលាយ​អាហារ​,កាត់បន្ថយ​សម្ពាធ​ឈាម​,ជួយឱ្យ​អារម្មណ៍​ស្រស់ស្រាយ​,និង បំបាត់​ការវិល​មុខ ឬ​ចង្អោរ​ ជាដើម៕/R