​ប្រែ​សម្រួលៈ​បំណង​(​ស្ត្រេត​ថែមស៍​)៖ ថៃ​នៅ​ថ្ងៃ​ចន្ទ​នេះ​បាន​លុបចោល​វិញ​ច្បាប់​មួយ​ដែល​ខ្លួន​បាន​ប្រកាស​កាលពី​ចុង​សប្តាហ៍​ថា​នឹង​តំរូវ​អោយ​អ្នកដំណើរ​ចូល​ថៃ​ត្រូវ​បង្ហាញ​ភស្តុតាង​ថា​បាន​ចាក់​វ៉ាក់សាំង​​គ្រប់គ្រាន់ នេះ​បើ​តាម​ការអះអាង​របស់​រដ្ឋមន្ត្រី​សុខាភិបាល​របស់​ប្រទេស​។​

​លោក​អានុ​ទីន ឆាន​វី​រ៉ា​គុល​(Anutin Charnvirakul)​បាន​ប្រាប់​អ្នកយកព័ត៌មាន​ថា មិន​ចាំបាច់​ត្រូវការ​ភស្តុតាង​នៃ​ការចាក់​វ៉ាក់សាំង​ទេ ដោយសារ​តែ​ភាពស៊ាំ​នឹង​ជំងឺ​កូវី​ដ​១៩​មាន​នៅ​ទូទាំង​​ពិភពលោក ដូច្នេះ​អ្នក​មិន​បាន​ចាក់​វ៉ាក់សាំង​ការពារ​ក៏​ត្រូវ​អនុញ្ញាត​អោយ​ចូល​ថៃ​ដោយ​គ្មាន​ការ​រឹតបន្តឹងដែរ​។​

​រដ្ឋ​មន្ត្រី​សុខាភិបាល​ថៃ​លោក​អានុ​ទីន ឆាន​វី​រ៉ា​គុល បាន​លុបចោល​ច្បាប់​ថ្មី​ដែល​តំរូវ​អោយ​បង្ហាញ​ភស្តុតាង​ចាក់​វ៉ាក់សាំង​ដោយ​លោក​ថា ពិភពលោក​មាន​ភាពស៊ាំ​នឹង​ជំងឺ​កូវីដ១៩គ្រប់គ្រាន់​ហើយ​

​ការសំរេចចិត្ត​នេះ​នឹង​ជំនួស​ច្បាប់​ថ្មី ដែល​ប្រកាស​កាលពី​ថ្ងៃ​សៅរ៍​ដោយ​ការី​អាកាសចរណ៍​ថៃ​នៅ​មួយ​ថ្ងៃ​គត់​មុន​ចិន​បើក​ព្រំដែន​របស់​ខ្លួន​ឡើងវិញ​។​

​មុន​នេះ​រដ្ឋាភិបាល​ថៃ​បាន​និយាយថា ខ្លួន​កំពុង​ពិនិត្យមើល​ឡើងវិញ​ការចេញ​ប្រើ​ច្បាប់​ថ្មី​ភ្លាមៗ​ដែល​តំរូវ​អ្នក​មក​ពី​បរទេស​ត្រូវ​តែ​បង្ហាញ​ឯកសារ​បញ្ជាក់​ថា​បាន​ចាក់​វ៉ាក់សាំង​យ៉ាងតិច​ពីរ​លើក បន្ទាប់​ពី​​ការី​ទេសចរណ៍​កោះភូ​កេត បាន​ត្អូញត្អែរថា​ច្បាប់​ថ្មី​នេះ​បណ្តាលអោយ​អ្នក​ទេសចរណ៍​ជាច្រើន​លុបចោល​ផែនការ​ធ្វើ​ដំណើរ​មក​កាន់​កោះ​នេះ​។​

​រដ្ឋមន្ត្រី​ទេសចរណ៍​និង​កីឡា​ថៃ លោក ភី​ផាត រ៉ា​ត​ចា​គីត​ប្រា​កាន​(Phiphat Ratchakitprakarn)​បាន​និយាយ​កាលពី​ថ្ងៃ​ចន្ទ​ថា លោក​បាន​ស្នើសុំ​រដ្ឋមន្ត្រី​សុខាភិបាល​អោយ​កែសម្រួល​ច្បាប់​តំរូវ​​អោយ​ចាក់​វ៉ាក់សាំង​ពីរ​ដូសនេះ​សំរាប់​ភ្ញៀវទេសចរ​បរទេស​។​លោក​បាន​ធ្វើ​អន្តរាគមន៍​ក្រោយ​ពី​សមាគម​ទេសចរណ៍​ភូ​កេត​ផ្ញើលិខិត​មួយ​មក​រដ្ឋាភិបាល​ដោយ​ត្អូញត្អែរ​ប្រាប់​ថា ច្បាប់​ថ្មី​គំរាម​ការ​រើប​រើ​ឡើង​​នៃ​វិស័យ​ទេសចរណ៍​ចំពេល​ភ្ញៀវ​ចិន​ត្រៀម​មកកាន់​ថៃ​។​

​សមាគម​ទេសចរណ៍​ភូ​កេត​បាន​និយាយថា ខ្លួន​បាន​ទទួល​ប្រតិកម្ម​អវិជ្ជមាន​មកពី​ការី​ទេសចរណ៍​បរទេស ដែល​សម្តែង​ការស្រឡាំងកាំង​ចំពោះ​ការផ្លាស់ប្តូរ​វិធានការ​ភ្លាមៗ​សំរាប់​ភ្ញៀវ​ចូល​ថៃ​។​

​នៅ​អាល្លឺម៉ង់ ក្រុមហ៊ុន​ទេសចរណ៍​ជាច្រើន​បាន​និយាយថា​ការ​តំរូវ​អោយ​ចាក់​វ៉ាក់សាំង​បែបនេះ​បង្កប​បញ្ហា​មួយ​និង​កាត់បន្ថយ​ជំនឿ​ចិត្ត​លើ​ទេសចរណ៍​ថៃ ដោយ​ការ​កក់​បន្ទប់​ចំនួន​ជាង​១.០០០​ត្រូវបាន​​លុបចោល នេះ​បើ​តាម​កាសែត​បាងកក​ប៉ុស្តិ៍​៕

​ទេសចរណ៍​ថៃ​រំពឹង​រើប​រើ​ខ្លាំង​បន្ទាប់​ពី​ចិន​បើក​ព្រំដែន​ឡើងវិញ​