​ប្រែ​សម្រួល : កញ្ញា​ដា​លី​ស (​ណេ​សិន​) ៖ បង្គន់​ឆ្លាត​វៃ​តម្លៃ ១០.០០០ ដុល្លារ ដែល​មាន​ភ្ជាប់​មក​ជាមួយ​កម្មវិធី Amazon Alexa ពន្លឺ​សម្រាប់​ប្តូរ​អារម្មណ៍ និង​កៅអី​លើក​ដាក់​ចុះ​ឡើង​ដោយ​ស្វ័យប្រវត្តិ បាន​កំពុង​ធ្វើឱ្យ​មាន​ការភ្ញាក់ផ្អើល​នៅ​ឯ​ពិព័រណ៍ CES នៅ​ទីក្រុង​ឡាសវេ​ហ្គាស​។​

​បង្គន់​ឆ្លាត Numi 2.0 របស់​ក្រុមហ៊ុន​អាម៉េរិក Kohler ក៏​អាច​ចាក់​តន្ត្រី ព័ត៌មាន និង​របាយការណ៍​អាកាសធាតុ ព្រមទាំង​បំពាក់​នូវ​ក្បាល​រ៉ូ​ប៊ីណេ​ទឹកបាញ់​សម្អាត​គូទ កៅអី​សម្អាត​ញើស ម៉ាស៊ីន​សម្ងួត និង​ម៉ាស៊ីន​សម្អាត​ដោយ​ខ្លួនឯង ដែល​ប្រើ​ពន្លឺ UV ដើម្បី​សម្លាប់​បាក់តេរី​និង​មេរោគ​ផងដែរ​។​

​លោក អេន​ឌ្រូ វ៉ាន់ ហ្គ័​រ​ដិន (Andrew Van Gorden) អ្នកគ្រប់គ្រង​ផ្នែក​ទីផ្សារ​ផលិតផល​របស់​ក្រុមហ៊ុន Kohler នៅឯ​ស្តង់​ពិព័រណ៍ CES របស់​ក្រុមហ៊ុន​នៅ​ឡាសវេ​ហ្គាស បាន​ពន្យល់ថា “​អ្នក​នឹង​មិន​ទុក​គម្រប​ចំហ​ចោល​ម្តងទៀត​នោះ​ទេ​។ វា​ជា​បទពិសោធន៍​ដែល​មិន​ចំ​បាច់​យកដៃ​ប៉ះ ដែល​បិទ​និង​បង្ហូរ​ដោយ​ស្វ័យប្រវត្តិ នៅ​ពេល​អ្នក​ចេញ​ពី​បន្ទប់ទឹក​”​។​

​មុខងារ​ទាំង​អស់​របស់​បង្គន់ Numi 2.0 អាច​គ្រប់គ្រង​បាន​យ៉ាង​ងាយស្រួល​តាមរយៈ​កម្មវិធី Amazon Alexa ដែល​មាន​ស្រាប់ ឬ​ឧបករណ៍​បញ្ជា​ពី​ចម្ងាយ ដែល​ភ្ជាប់​លើ​ជញ្ជាំង​។​

​លោក​វ៉ាន់ ហ្គ័​រដិន​បាន​និយាយថា “Amazon Alexa ត្រូវបាន​បំពាក់​នៅក្នុង​បង្គន់ ដូច្នេះ​វា​ត្រូវបាន​បង្កប់​នៅក្នុង Numi 2.0 ។ វា​អនុញ្ញាតឱ្យ​អ្នក​ចូល​ប្រើ​មុខងារ​ពិសេស​មួយចំនួន​ដូចជា លាង​បង្គន់​របស់​អ្នក ឬ​ចាប់ផ្តើម​បទពិសោធន៍​សម្អាត​គូទ​ជា​មួយ​ក្បាល​រ៉ូ​ប៊ីណេ​”​។​

​លោក​បាន​បន្ថែមថា “​វា​ក៏​អនុញ្ញាត​ឱ្យ​អ្នក​ចាក់​តន្ត្រី ចាក់​ចម្រៀង​តាម​អន​ឡាញ​របស់​អ្នក​តាមរយៈ​ឧបករណ៍​ផ្ទះ​ឆ្លាត​វៃរ​បស់​អ្នក​ផងដែរ​។ វា​អាច​ចាក់​ផត​ខា​ស (Podcast) ដែល​អ្នក​ចូលចិត្ត និង​ឆែក​មើល​ព័ត៌មាន​។ ខណៈ​អ្នក​កំពុង​ត្រៀមខ្លួន​ចេញ​ធ្វើការ​នៅ​ពេល​ព្រឹក វា​នឹង​ពិនិត្យមើល​អាកាសធាតុ​ជូន​អ្នក មុន​ពេល​អ្នក​ចាកចេញ​ពី​ផ្ទះ​”៕

​បង្គន់ Numi 2.0 អាច​គ្រប់គ្រង​បាន​យ៉ាង​ងាយស្រួល​តាមរយៈ​កម្មវិធី Amazon Alexa ដែល​មាន​ស្រាប់ ឬ​ឧបករណ៍​បញ្ជា​ពី​ចម្ងាយ ដែល​ភ្ជាប់​លើ​ជញ្ជាំង