ប្រែ​សម្រួលៈ​បំណង​(​ដេល្លី​ម៉េល​)៖ ឥណ្ឌូនេស៊ី​និង​ម៉ាឡេស៊ី​នៅ​ថ្ងៃ​ចន្ទ​ទី​៩​មករា​នេះ​បាន​ព្រមព្រៀង​គ្នា​ថា​នឹង​ពង្រឹង​តួនាទី​អាស៊ាន​នៅក្នុង​ការ​ដើរតួ​លើ​កិច្ចការ​អន្តរជាតិ​។​

​ប្រធានាធិបតី​ឥណ្ឌូនេស៊ី​លោក ចូកូ វី​ដូ​ដូ និង​នាយករដ្ឋមន្ត្រី​ម៉ាឡេស៊ី អាន់​វ៉ា អ៊ីប្រាហ៊ីម ក៏​បាន​អំពាវនាវ​អោយ​យោធា​មី​យ៉ាន់​ម៉ា​អនុវត្ត​ផែនការ​សន្តិភាព ដែល​ផ្តួចផ្តើម​បង្កើតឡើង​ដោយ​ក្រុម​តំបន់​នេះ​។​​ក្រោយ​ជំនួប​នៅ​វិមាន​រដ្ឋ​ក្នុង​ទីក្រុង​បូ​ហ្គ័​រ ក្រៅ​ទីក្រុង​ហ្សា​ការតា លោក​វី​ដូ​ដូ បាន​និយាយថា​«​យើង​បាន​យល់​ស្រប​ថា អាស៊ាន​ត្រូវតែ​បន្ត​តួនាទី​កណ្តាល​មួយ​ក្នុង​ការធ្វើអោយ​តំបន់​ឥណ្ឌូ​ប៉ាស៊ីហ្វិក​មាន​សន្តិ​​ភាព វិបុលភាព​និង​មាន​ស្ថិរភាព​»​។​

​លោក​បាន​បន្ថែមថា «​អំពី​បញ្ហា​មី​យ៉ាន់​ម៉ា ឥណ្ឌូនេស៊ី​និង​ម៉ាឡេស៊ី​មាន​ទស្សនៈ​ដូចគ្នា​ស្តី​ពី​សារសំខាន់​នៃ​ការអនុវត្ត​កុងសង់ស៊ីស​ប្រាំ​ចំណុច​។​យើង​ទទូច​សុំ​របប​យោធា​មី​យ៉ាន់​ម៉ា​អនុវត្ត​កុង​សង់​ស៊ី​ប្រាំ​​ចំណុច​នេះ​»​។​

​មេដឹកនាំ​ទាំង​ពីរ​ក៏​បញ្ជាក់​អះអាង​ឡើងវិញ​ទំនាក់ទំនង​រវាង​ប្រទេស​ទាំង​ពីរ ហើយ​លោក​អាន់​វ៉ា​បាន​អរគុណ​លោក​វី​ដូ​ដូ​ចំពោះ​ការទទួល​ស្វាគមន៍​លោក​និង​គណៈប្រតិភូ​របស់​លោក​។​

​ដំណើរ​ទស្សនកិច្ច​រយៈ​ពេល​ពីរ​ថ្ងៃ​របស់លោក​អាន់​វ៉ា​នៅ​ឥណ្ឌូនេស៊ី​ជា​ដំណើរ​ចេញ​ក្រៅប្រទេស​លើកដំបូង​របស់​លោក​ចាប់តាំងពី​លោក​បាន​ស្បថ​ចូលកាន់​តំណែង​កាលពី​ថ្ងៃ​២៤​វិច្ឆិកា​។​លោក​ត្រូវបាន​អម​​ដំណើរ​ដោយ​រដ្ឋមន្ត្រី​ជាច្រើនរូប​។​

​ក្នុងអំឡុងពេល​ទស្សន​កិច្ច​នេះ អនុស្សរណៈ​នៃ​ការយោគយល់​គ្នា​ចំនួន​ប្រាំបីរ​វាង​វិស័យ​ឯកជន​ម៉ាឡេស៊ី​និង​ឥណ្ឌូនេស៊ី​ត្រូវបាន​ចុះហត្ថលេខា ជាមួយនឹង​គំរោង​មាន​តំលៃ​សរុប​១,១៦​ពាន់​លាន​រីង​ហ្គី​ត​។​

​ឥណ្ឌូនេស៊ី​និង​ម៉ាឡេស៊ី ដែល​ជា​ប្រទេស​ដាំ​ដូងប្រេង​និង​ផលិត​ប្រេងឆា​ធំ​បំផុត​ក្នុង​លោក​កាលពី​ថ្ងៃ​ចន្ទ​ក៏បាន​ព្រមព្រៀង​គ្នា​ថា​នឹង​ធ្វើការ​រួមគ្នា​ដើម្បី​ប្រយុទ្ធប្រឆាំង​នឹង​«​ការរើសអើង​»​ប្រឆាំង​នឹង​ទំនិញ​​ប្រេងឆា​របស់ខ្លួន​។​

​ក្រោយ​ជួបប្រជុំ​ជាមួយ​មេដឹកនាំ​ម៉ាឡេស៊ី លោក​វី​ដូ​ដូ បាន​និយាយថា ប្រទេស​ទាំង​ពីរ​នឹង​ប្រយុទ្ធប្រឆាំង​នឹង​ការរើសអើង​ប្រឆាំង​នឹង​ប្រេងឆា​ផ​លិ​ពី​ដូងប្រេង​របស់​ប្រទេស​ទាំង​ពីរ ហើយ​«​ពង្រឹង​កិច្ច​សហ​​ការ​តាម​រយៈ​ក្រុមប្រឹក្សា​របស់​ប្រទេស​ផលិត​ប្រេងឆា​មក​ពី​ដូងប្រេង​» ដើម្បី​ដោះស្រាយ​ការព្រួយបារម្ភ​៕

​លោក​អាន់​វ៉ា និង​ប្រធានាធិបតី​ឥណ្ឌូនេស៊ី ជួប​គ្នា​នៅក្នុង​ទីក្រុង​បូ​ហ្គ័​រ កាលពី​ថ្ងៃ​ចន្ទ​