​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សម្តេច​ប៉ាប​ហ្វ្រង់​ស៊ីស កាលពី​ថ្ងៃ​ចន្ទ​ទី​៩​មករា បាន​ទម្លាយ​ភាព​ស្ងៀមស្ងាត់​របស់​ទ្រង់​អំពី​ការតវ៉ា​ទូទាំងប្រទេស ដែល​ធ្វើឱ្យ​អ៊ីរ៉ង់​ច្របូកច្របល់​ដោយ​ថ្កោលទោស​​ការកាត់ទោស​ប្រហារជីវិត​នៅ​ទីនោះ និង​ហាក់​ចាត់ទុកថា​ស្រប​ច្បាប់​ចំពោះ​បាតុកម្ម “​ដែល​ទាមទារ​ឱ្យ​មាន​ការ គោរព​កាន់តែ​ច្រើនឡើង​ចំពោះ​សេចក្តីថ្លៃថ្នូរ​របស់​ស្ត្រី​”​។​

​សម្តេច​ប៉ាប​ហ្វ្រង់​ស៊ីស​បាន​មានបន្ទូល​បែបនេះ​នៅក្នុង​សុន្ទរកថា​ប្រចាំឆ្នាំ​ទៅកាន់​ក្រុម​ឯកអគ្គរដ្ឋទូត ដែល​មាន​សា​តាំងនៅ​បុរី​វ៉ា​ទី​កង់ ជា​សុន្ទរកថា​គោលនយោបាយ​ការបរទេស​ដែល​សម្តេច​ប៉ាប​ថ្លែង​​នៅ​ដើមឆ្នាំ​នី​មួយៗ ដោយ​រៀបរាប់​ពី​ផ្នែក​នៃ​ក្តីបារម្ភ​បំផុត​សម្រាប់​បុរី​មួយ​នេះ​។​

​នៅក្នុង​សុន្ទរកថា​សម្តេច​ប៉ាប​បាន​ភ្ជាប់​ការប្រឆាំង​របស់​បុរី​វ៉ា​ទី​កង់​ចំពោះ​ការ​រំលូតកូន​ទៅនឹង​ការប្រឆាំង​របស់​ខ្លួន​ចំពោះ​ការកាត់ទោស​ប្រហារជីវិត​ដោយ​ព្រះអង្គ​មានបន្ទូល​ថា​រឿង​ទាំងពីរ​នេះ​គឺជា​ការ​​រំលោភ​លើ​សិទ្ធិ​ជា​មូលដ្ឋាន​នៃ​ការរស់រានមានជីវិត​។ សម្តេច​ប៉ាប​ហ្វ្រង់​ស៊ីស​បាន​ផ្លាស់ប្តូរ​ការបង្រៀ​ន​នៅ​ព្រះវិហារ​ស្តីពី​ការកាត់ទោស​ប្រហារជីវិត ដោយ​សម្រេច​ថា ការប្រហារជីវិត​”​គឺ​មិន​អាច​ទទួលយក​​បាន​” នៅ​គ្រប់​កាលៈទេសៈ​ទាំងអស់​។​

​សម្តេច​ប៉ាប​មានបន្ទូល​ទៀត​ថា “​សិទ្ធិ​រស់រាន​មានជីវិត​ក៏​ត្រូវបាន​គំរាមកំហែង​ផង​ដែរ​នៅ​កន្លែង​ទាំងឡាយណា​ដែល​ការកាត់ទោស​ប្រហារជីវិត​បន្ត​អនុវត្ត ដូច​ករណី​ក្នុង​ប៉ុន្មាន​ថ្ងៃ​ថ្មីៗ​នេះ​ក្នុងប្រទេស​អ៊ីរ៉ង់ បន្ទាប់​ពី​បាតុកម្ម​នាពេល​ថ្មីៗ​នេះ​ដែល​ទាមទារ​ការគោរព​កាន់តែ​ខ្លាំង​ឡើង​ចំពោះ​សេចក្តីថ្លៃថ្នូរ​របស់​ស្ត្រី​។ ទោស​ប្រហារជីវិត​មិន​អាច​ប្រើ​សម្រាប់​ប្រព័ន្ធយុត្តិធម៌​របស់​រដ្ឋ​មួយ​បាន​ទេ​ព្រោះ​វា​មិនមែនជា​​ការរារាំង​ឬ​ការបង្ហាញ​យុត្តិធម៌​ដល់​ជនរងគ្រោះ​ទេ ប៉ុន្តែ​គ្រាន់តែ​ជួយ​បញ្ឆេះ​ការស្រេកឃ្លាន​សម្រាប់​ការ​សងសឹក​ប៉ុណ្ណោះ​”៕

សម្តេច​ប៉ាប​ថ្កោលទោស​ការប្រហារជីវិត​បាតុករ​នៅ​អ៊ីរ៉ង់​ក្នុងអំឡុង​សុន្ទរកថា​ប្រចាំឆ្នាំ​នៅ​បុរី​វ៉ា​ទី​កង់​កាលពី​ថ្ងៃ​ចន្ទ​