​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ព្រះអង្គម្ចាស់​ហារី​នៅ​ថ្ងៃ​ចន្ទ​នេះ​បាន​បើក​ការវាយប្រហារ​ដ៏​អស្ចារ្យ​មួយ​ទៀត​លើ​មហេសី​របស់​ស្តេច​ឆា​ល គឺ​ម្ចាស់​ក្សត្រិយ៍​ខា​មី​ល​ឡា (Camilla)​ដោយ​ចាត់ទុក​​ទ្រង់​ជា “​ស្រី​គ្រោះថ្នាក់​” និង “​ស្រី​បិសាច​” ខណៈ​ទ្រង់​បន្ត​ការផ្សព្វផ្សាយ​ជា​សាធារណៈ​សម្រាប់​សៀវភៅ​ជីវប្រវត្តិ Spare ដ៏​កក្រើក​របស់​ទ្រង់​។​

​ទ្រង់​ហារី ព្រះជន្ម ៣៨ វស្សា​បាន​ផ្តោត​ការវាយប្រហារ​លើ​ម្ចាស់​ក្សត្រិយានី ខណៈ​កំពុង​មាន​បន្ទូល​ជាមួយ​ពិធីករ​កម្មវិធី 60 Minutes របស់​ទូរទស្សន៍ CBS News​លោក អាន់​ឌឺ​សុន ឃូ​ភើ (Anderson Cooper) ដែល​បាន​សួរ​ទ្រង់​ហារី​អំពី​ការចោទប្រកាន់​ដ៏​អាក្រក់​ជា​ច្រើន ដែល​ទ្រង់​បាន​ធ្វើ​ឡើង​អំពី​ម្ចាស់​ក្សត្រិយ៍​ខា​មី​ល​ឡា​នៅ​ក្នុង​ទំព័រ​សៀវភៅ​។​

​ដោយ​សំដៅលើ​បទសម្ភាសន៍​ឆ្នាំ ១៩៩៥ ដែល​ក្នុងនោះ​មាតា​របស់​ទ្រង់​គឺ​ព្រះ​នាង​ដាយ​អាណា ដែល​សំដៅ​ទៅ​ខា​មី​ល​ឡា​ជា “​មនុស្ស​ទី​បី​ក្នុង​អាពាហ៍ពិពាហ៍​របស់​ទ្រង់​” ព្រះអង្គ​ហារី​បាន​មានបន្ទូលថា​ការ​បក​​អាក្រាត​មួយ​នេះ​បានប្រែក្លាយ​ម្ចាស់​ក្សត្រិយ៍​បច្ចុប្បន្ន​ទៅជា “​បិសាច​” ដោយ​បន្ថែម​ថា “​ទ្រង់​ត្រូវការ​ការស្តារ​មុខមាត់​របស់​ទ្រង់​ឡើងវិញ​”​។​

​យោង​តាម​ហារី ដែល​បាន​បង្ហាញ​នៅក្នុង​សៀវភៅ​របស់​ទ្រង់​ដែរ​ថា​ទ្រង់​និង​វី​លលៀម “​បាន​អង្វរ​”​បិតា​របស់​ពួក​ទ្រង់​កុំឱ្យ​រៀប​អភិសេក​ជាមួយ​ខា​មី​ល​ឡា​បំណងប្រាថ្នា​ដើម្បី​ផ្លាស់ប្តូរ​មុខមាត់​សាធារណៈ​របស់​​ទ្រង់​មួយ​នេះ​បាន​ធ្វើឱ្យ​ទ្រង់ “​ក្លាយជា​មនុស្ស​គ្រោះថ្នាក់​”​។​

​ទ្រង់​ចោទប្រកាន់​មាតា​ចុង​របស់​ទ្រង់​អំពី “​ការដោះដូរ​ព័ត៌មាន​” ជាមួយ​សារព័ត៌មាន​ក្នុង​គោលបំណង​ដើម្បី​ទទួលបាន​សាច់​រឿង​វិជ្ជមាន​បន្ថែមទៀត​អំពី​ខ្លួន​ទ្រង់ មុន​ពេល​លើកឡើងថា “​ទំនាក់ទំនង​” របស់​ទ្រង់​ជាមួយ​ប្រព័ន្ធ​ផ្សព្វផ្សាយ​នឹង​បញ្ចប់​ដោយ “​មនុស្ស​រស់ ឬ​មិន​អ៊ីចឹង​សាកសព ដែល​ទុក​ចោល​លើ​ដងផ្លូវ​”​។​

​ទ្រង់​បាន​មានបន្ទូល​ប្រាប់​លោកឃូ​ភើ​ថា “​តម្រូវការ​របស់​ទ្រង់​ដើម្បី​ស្តារ​មុខមាត់​របស់​ទ្រង់​ឡើងវិញ​បាន​ធ្វើឱ្យ​ទ្រង់​ក្លាយជា​មនុស្ស​គ្រោះថ្នាក់​ដោយសារ​តែ​ទំនាក់ទំនង​ដែល​ទ្រង់​កំពុង​បង្កើតឡើង​នៅ​​ក្នុង​សារព័ត៌មាន​អង់គ្លេស​”​។

“​ហើយ​មាន​ឆន្ទៈ​បើកចំហ​ទាំង​សង​ខាង​ក្នុង​ការដោះដូ​រ​ព័ត៌មាន​គ្នា​។ ហើយ​ដោយសារ​គ្រួសារ​មួយ ដែល​បាន​កសាងឡើង​តាម​ឋានានុក្រម​និង​ជាមួយ​ទ្រង់ ដែល​នឹង​ក្លាយ​ជា​ព្រះ​មហាក្សត្រិយានី​នោះ​​ច្បាស់​ជា​នឹង​មាន​មនុស្ស ឬ​សាកសព​ទុក​ចោល​នៅ​លើ​ផ្លូវ ដោយសារតែ​រឿង​នេះ​”៕

​ទ្រង់​ហារី​និង​ម្ចាស់​ក្សត្រិយ៍​ខា​មី​ល​ឡា