​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ព្រះ​នាង​មេ​ហ្គាន​ត្រូវបាន​ព្រះមហាក្សត្រិ​យានី​សួរ​យោបល់​របស់​ទ្រង់​អំពី​លោក​ដូណាល់ ត្រាំ នៅពេល​ដែល​ស្ត្រី​ទាំងពីរ​បាន​ជួបគ្នា​ជា​លើកដំបូង នេះ​បើ​យោង​​តាម​ការ​លាតត្រដាងរ​បស់​ព្រះអង្គម្ចាស់​ហារី​នៅក្នុង​សៀវភៅ​ជីវប្រវត្តិ​ដ៏​ចម្រូងចម្រាស​របស់​ទ្រង់​។​

​ការជួប​គ្នា​ដ៏​សំខាន់​របស់​ព្រះ​នាង​មេហ្គា​ន​និង​ទ្រង់​ហារី​ជាមួយ​ម្ចាស់​ក្សត្រិយ៍​សោយ​ទិវង្គត​ថ្មីៗ​នេះ​ត្រូវបាន​ធ្វើឡើង​នៅឯ​ដំណាក់ Royal Lodge របស់​ព្រះអង្គ​ម្ចាស់អេន​ឌ្រូ (Andrew) ប៉ុន្តែ​ព្រះ​នាង​មេ​ហ្គាន​មិនស្គាល់​ព្រះអង្គម្ចាស់​អេន​ឌ្រូ​ទេ នៅពេល​ដែល​ទ្រង់​អេន​ឌ្រូ​បាន​ចូលរួម​ជាមួយ​ពួក​ទ្រង់ ហើយ​នឹកស្មានថា​បុត្រា​របស់​ម្ចាស់​ក្សត្រិយ៍​គឺ​ជា​ជំនួយការ​របស់​ទ្រង់​។​

​វគ្គ​នេះ​ត្រូវបាន​លាតត្រដាង​នៅក្នុង​សៀវភៅ Spare របស់​ទ្រង់​ហា​រី ដែល​ឥឡូវនេះ​មាន​លក់​នៅ​តាម​ហាង​លក់​សៀវភៅ​នានា ដែល​បាន​បង្ក​ការ​ខឹងសម្បា​ចំពោះ​ការអះអាង​របស់​ទ្រង់​ថា​ព្រះអង្គម្ចាស់​​វី​លលៀម​បាន​វាយដំ​រាងកាយ​ទ្រង់ ខណៈ​ការសារភាព​របស់​ទ្រង់​ថា​បានសម្លាប់​សមាជិក​តា​លី​បង់ ២៥ នាក់​ក្នុងអំឡុង​សង្គ្រាម​អា​ហ្វ​ហ្គានី​ស្ថាន បាន​បង្ក​ឱ្យមាន​ការតវ៉ា​នៅក្នុង​ខេត្ត​ហ៊ែ​ល​មែន (Helmand) នៅ​អា​ហ្វ​ហ្គានី​ស្ថាន​កាលពី​ចុង​សប្តាហ៍​។​

​សៀវភៅ​នោះ​លា​ត្រដាង​ថា ម្ចាស់​ក្សត្រិយ៍​ខា​មី​ល​ឡា ដែល​ពណ៌នា​ដោយ​ទ្រង់​ហារី​ក្នុង​បទសម្ភាសន៍​ថា​ជា “​ស្ត្រី​គ្រោះថ្នាក់​” និង​ត្រូវបាន​រិះគន់​ចំពោះ​ការប៉ុនប៉ង​ស្តារ “​មុខមាត់​”​របស់​ទ្រង់​ឡើងវិញ​ដោយ​​ការ​កម្ចាត់​ហារី បាន​ស្នើ​ឱ្យ​ទ្រង់​ហារី​ក្លាយជា​អភិបាល​កោះ​បឺ​មូ​ដា (Bermuda) ដើម្បី​គេច​ចេញពី​ចំណាប់អារម្មណ៍​សារព័ត៌មាន “​ដ៏​វឹកវរ​”​។​

​សៀវភៅ​ក៏​លាតត្រដាង​ផងដែរ​អំពី​ការអះអាង​អំពី​ទំនាក់ទំនង​ប្រេះស្រាំ​រវាង​ស្តេច​ឆាល​និង​ព្រះ​នាង​ដាយ​អាណា ដោយ​ទ្រង់​ហារី​បាន​រំលឹក​ពី​របៀប​ដែល​ទ្រង់​វី​លលៀម​ខណៈ​កំពុង “​ពិបាក​ចិត្តខ្លាំង​” បាន​ទូរស័ព្ទ​ប្រាប់​ទ្រង់​ថា “​ប៉ា​ប៉ា​និង​មនុស្ស​របស់​ខា​មី​ល​ឡា​បាន​ប្រឌិត​រឿងរ៉ាវ​អំពី​ទ្រង់ និង ព្រះ​នាង​ឃេត និង កូនៗ​ដទៃទៀត​”​។​

​ទ្រង់​ហារី​បាន​ណែនាំ​ព្រះ​នាង​មេ​ហ្គាន​កុំឱ្យ​ឈរ​ថតរូប​នៅមុ​ខ​ប្រាសាទ Taj Mahal ដូច​ដែល​ម្ចាស់​ក្សត្រិយ៍​ដាយ​អាណា​ធ្លាប់​ធ្វើ​យ៉ាង​ល្បីល្បាញ​ក្នុង​ឆ្នាំ ១៩៩២​នៅពេលដែល​អាពាហ៍ពិពាហ៍​របស់​​ទ្រង់​ត្រូវបាន​បែកបាក់ ដើម្បី​ជៀសវាង​ការចោទប្រកាន់​ថា​ព្រះ​នាង​កំពុង​ព្យាយាម​ធ្វើ​ត្រាប់​តាម​មាតា​របស់​ហារី​៕

ម្ចាស់​ក្សត្រិយ៍​អេ​លីហ្សា​បេ​ត​ធ្លាប់​សួរ​ព្រះ​នាង​មេ​ហ្គាន​អំពីលោ​កត្រាំអំឡុងពេល​ទ្រង់​ទាំង​ពីរ​ជួបគ្នា​ជា​លើកដំបូង