​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ការប៉ុនប៉ង​ដំបូង​ក្នុង​ការបាញ់​បង្ហោះ​ផ្កាយរណប​ពី​អឺរ៉ុប​ខាងលិច​ហាក់​បរាជ័យ​កាលពី​ព្រឹក​ថ្ងៃ​អង្គារ​នេះ នៅពេល​ដែល​ក្រុមហ៊ុន Virgin Orbit​បាន​រាយ​​ការណ៍​ពី “​ភាពមិនប្រក្រតី​មួយ​” ដែល​បាន​រារាំង​រ៉ុក្កែត​របស់ខ្លួន​ពី​ការ​ទៅដល់​គន្លង​គោចរ​។​

​បេសកកម្ម​នេះ​បាន​បាញ់​បង្ហោះ​ចេញពី​ទីក្រុង​ឆ្នេរសមុទ្រ​ញូ​វ​ក្វេ (Newquay) ភាគ​និរតី​ប្រទេស​អង់គ្លេស ដោយ​រ៉ុក្កែត LauncherOne របស់​ក្រុមហ៊ុន Virgin​បាន​ដឹក​នៅក្រោម​ស្លាប​នៃ​យន្ត​​ហោះ​កែច្នៃ Boeing 747 ហើយ​ក្រោយមក​បាន​បញ្ចេញ​នៅលើ​មហាសមុទ្រ​អា​ត្លង់​ទិក​។​

​ក្រុមហ៊ុន​បាន​និយាយថា “​យើង​ទំនងជា​មាន​ភាពខុសប្រក្រតី​មួយ​ដែល​បាន​រារាំង​យើង​ពី​ការឈាន​ដល់​គន្លង​។ យើង​កំពុង​វាយ​តម្លៃ​ព័ត៌មាន​”​។​

​បរាជ័យ​ជាក់ស្តែង​នេះ​បាន​វាយ​សំពង​បន្ថែមទៀត​ដល់​មហិច្ឆតា​អវកាស​អឺរ៉ុប បន្ទាប់​ពី​បេសកកម្ម​រ៉ុក្កែត Vega-C ផលិត​ដោយ​អ៊ីតាលី បាន​បរាជ័យ​បន្ទាប់ពី​បាញ់​បង្ហោះ​ចេញពី​កោះ French Guiana កាលពី​ចុង​ខែ​ធ្នូ​។​

​រ៉ុក្កែត​នោះ​ត្រូវបាន​ទុកចោល​ក្នុង​ឃ្លាំង​ហើយ​ចាប់តាំងពី​ពេលនោះ​មក​។​

​ក្រុមហ៊ុន Virgin Orbit ដែល​កាន់កាប់​មួយ​ផ្នែក​ដោយ​មហាសេដ្ឋី​អង់គ្លេស​លោក រី​ឆាត ប្រ៊ែន​សុន (Richard Branson)​បាន​គ្រោង​ដាក់​ពង្រាយ​ផ្កាយរណប​តូចៗ​ចំនួន​ប្រាំបួន​ទៅក្នុង​គន្លង​​ផែនដី​ទាប (LEO) នៅក្នុង​បេសកកម្ម​ដំបូង​របស់​ខ្លួន​នៅ​ខាងក្រៅ​មូលដ្ឋាន​សហរដ្ឋ​អាម៉េរិក​របស់ខ្លួន​។​

​មន្ត្រី​ទទួលបន្ទុក​បាញ់​បង្ហោះ​មិនទាន់​អាច​ទាក់ទង​បាន​ភ្លាមៗ​សម្រាប់​ការអត្ថាធិប្បាយ​បន្ថែម​នោះ​ទេ​។ ក្រុមហ៊ុន​បាន​និយាយ​នៅ​លើ Twitter ថា រ៉ុក្កែត LauncherOne បាន​ទៅ​ដល់​គន្លង​ផែនដី ប៉ុន្តែ​ក្រោយមក​សារ​នោះ​ក៏​បាន​លុបចោល​វិញ​៕ 

​រ៉ុក្កែត LauncherOne របស់​ក្រុមហ៊ុន Virgin Orbit ដែល​ភ្ជាប់​ទៅ​នឹង​ស្លាបរ​បស់​យាន Cosmic Girl​ដែល​ជា​យន្តហោះ​កែច្នៃ Boeing 747-400 នៅ​អាកាសយានដ្ឋាន Newquay នៅ​ថ្ងៃទី ៩ ខែ​មករា ឆ្នាំ ២០២៣

​រ៉ុក្កែត LauncherOne​គ្រោង​នឹង​ព្រលែង​ផ្កាយរណ​បនៅពេល​វា​ទៅដល់​គន្លង​ទាប​នៃ​ផែនដី តែ​ភាពមិនប្រក្រតី​រារាំង​ការងារ​នេះ​

​របៀប​ដែល​យន្តហោះ​Boeing 747-400 ចេញ​ដំណើរ​និង​ព្រលែង​រ៉ុក្កែត LauncherOne​