​ប្រែ​សម្រួលៈ​បំណង​(​ស្ត្រេត​ថែមស៍​)៖ នៅ​មាន​ការងារ​ត្រូវ​ធ្វើ​ដើម្ប​ធ្វើអោយ​ប្រសើរ​ឡើង​និង​អភិវ​ឌ្ឍ​ប្រទេស​ថៃ នេះ​ជា​អ្វី​ដែល​នាយក​រដ្ឋមន្ត្រី​ប្រា​យុទ្ធ ចាន់ អូ​ចា បាន​និយាយ​កាលពី​ថ្ងៃ​ចន្ទ និង​នេះ​ជាហេតុ​​ផល​ដែល​លោក​ថា​ត្រូវតែ​វិល​មក​កាន់​តំណែង​នាយករដ្ឋមន្ត្រី​វិញ ដើម្បី​បញ្ចប់​កិច្ចការងារ​។​

​ក្នុងការ​ថ្លែង​ជា​សាធារណៈ​លើក​ដំបូង​ក្រោយ​ក្លាយ​ជា​សមាជិក​បក្ស​រួម​ថៃ​សាង​ឆាត​(​រួម​ជាតិ​ថៃ​-UTN) លោក​បាន​និយាយថា​«​ខ្ញុំ​ចង់​នៅ​ជា​នាយករដ្ឋមន្ត្រី មិនមែន​ដោយសារ​ស្រឡាញ់​អំណាច​ឬ​ផល​ប្រ​​យោជន៍​ទេ​…​តែដោយសារ​នៅ​មាន​ការងារ​មិន​ទាន់​សំរេច​…​ប្រទេស​ត្រូវ​ធ្វើ​ដំណើរ​ទៅមុខ​»​។​

​នៅ​ចំពោះមុខ​អ្នកគាំទ្រ​រាប់ពាន់នាក់​ក្នុង​សម្លៀកបំពាក់​ក្រហម ខៀវ និង​សដែលជាសញ្ញាសំគាល់បក្សថ្មីរបស់លោក លោក​ប្រា​យុទ្ធ​បាន​និយាយថា​លោក​ស្ថិតក្នុង​មុខ​តំណែង​ដូច​ថ្ងៃនេះ​ដោយសារ​លោក​គោរព​ដំណើរការ​ប្រជាធិបតេយ្យ​ថៃ​។​លោក​​ក៏​បាន​សន្យា​ដោះស្រាយ​បញ្ហា​ដូចជា​អំពើពុករលួយ និង​ភាពក្រីក្រ តែ​បាន​និយាយថា លោក​មិន​អាច​ដោះស្រាយ​បញ្ហា​ទាំងអស់​នេះ​ដោយ​ខ្លួន​លោក​តែឯង​បាន​ទេ ហេតុ​ដូច្នេះ​ហើយ​បានជា​លោក​ចូលរួម​ជា​​មួយ​គណបក្ស​UTN​។​

​លោក​ប្រា​យុទ្ធ​ត្រូវបាន​ប្រកាស​ជា​សមាជិក​UTN​ក្នុង​ពិធី​កាលពី​ម្សិលមិញ ដែល​វា​ក៏​កត់សំគាល់​ការចាប់ផ្តើម​យុទ្ធនាការ​បោះឆ្នោត​របស់​គណបក្ស​ផង​ដែរ​។​

​ភី​រ៉ា​ផាន សាលី​រ៉ា​ថា​វី​បា​ហ្កា​(Pirapan Salirathavibhaga) មេដឹកនាំ​UTN​និយាយថា​គណបក្ស​សង្ឃឹម​ថា​នឹង​ដឹកនាំ​រដ្ឋាភិបាល​បន្ទាប់​ក្រោម​ការដឹកនាំ​របស់​លោក​ប្រា​យុទ្ធ​។​គណបក្ស​ដែល​ត្រូវ​​បាន​បង្កើតឡើង​ក្នុង​ឆ្នាំ​២០២១មួយនេះ មានបំណង​ស្តារ​ឯកភាព​និង​សន្តិភាព​នៅក្នុង​ប្រទេស​ថៃ​។​

​ការបោះឆ្នោត​សកល​នាពេលខាងមុខ​អាច​នឹង​ត្រូវ​ធ្វើឡើង​នៅ​ថ្ងៃ​៧​ឧសភា បើសិនជា​សភា​មិន​ត្រូវបាន​រំលាយ​នៅមុន​ដំណាច់​អាណត្តិ​របស់​ខ្លួន​នៅ​ចុង​ខែ​មីនា​។​

UTNត្រូវតែ​រក​អោយ​មាន​យ៉ាងតិច​២៥​កៅអី​ក្នុង​ចំណោម​សភា​៥០០​អាសនៈ​ក្នុង​ការបោះឆ្នោត​នេះ​ដើម្បី​អាច​តែងតាំង​លោក​ប្រា​យុទ្ធ​ជា​បេក្ខជន​នាយក​រដ្ឋមន្ត្រី​របស់​ខ្លួន​។​ព្រឹទ្ធសភា​និង​សមាជិកសភា​​នឹង​បោះឆ្នោត​ជ្រើសតាំង​នាយក​រដ្ឋមន្ត្រី​ម្នាក់​ពី​ក្នុងចំណោម​បេក្ខជន​ដែល​តែងតាំង​ឡើង​ដោយ​គណបក្ស​នានា​។​

​កាលពី​ចុងខែ​មុន លោក​ប្រា​យុទ្ធ​បាន​និយាយថា​លោក​នឹង​មិន​ស្វះស្វែង​រក​ការ​កាន់​អំណាច​នៅ​អាណត្តិ​ទី​បី​ជា​នាយករដ្ឋមន្ត្រី​ក្រោម​ស្លាក​UTN​ទេ និង​បញ្ជាក់​លើ​ពាក្យ​ចចាមអារ៉ាម​ជា​យូរ​មក​ហើយ​ថា​​លោក​នឹង​ចាកចេញ​ពី​គណបក្ស​ផា​ឡាង ប្រា​ចា​រ៉ា​ត ដែល​កំពុង​ដឹកនាំ​រដ្ឋាភិបាល​ចំរុះ​បច្ចុប្បន្ន​៕

​ប្រា​យុទ្ធ ថ្លែង​ទៅ​កាន់​អ្នកគាំទ្រ​គណបក្ស​រួម​ថៃ​សាង​ឆាត​ក្នុង​ការជួបជុំ​សមាជិក​បក្ស​លើកដំបូង​មុន​ការចាប់ផ្តើម​យុទ្ធនាការ​បោះឆ្នោត​កាលពី​ថ្ងៃ​៩​មករា​