​ប្រែ​សម្រួល : កញ្ញា​ដា​លី​ស (​អេ​ស៊ាវ័ន​) ៖ អតីត​ប្រធានាធិបតី​ស្តាំនិយម​ប្រេ​ស៊ីល លោក ជែរ បូល​សូ​ណារ៉ូ (Jair Bolsonaro) ត្រូវបាន​បញ្ជូន​ទៅ​មន្ទីរពេទ្យ​ក្នុង​រដ្ឋ​ផ្លរីដា​កាលពី​ថ្ងៃ​ចន្ទ ទី​៩​មករា​ដោយ​​សារ​ឈឺពោះ ខណៈ​អ្នកគាំទ្រ​របស់គាត់​ចំនួន ១.៥០០ នាក់​ត្រូវបាន​ចាប់ខ្លួន​នៅ​រដ្ឋធានី​ប្រា​ស៊ី​លី​យ៉ា បន្ទាប់ពី​បាន​លុកលុយ​អគារ​សំខាន់ៗ​ក្នុង​រដ្ឋធានី​កាលពី​ចុង​សប្តាហ៍​។​

​ប្រធានាធិបតី ល្វីស អ៊ី​ណា​ស៊ី​អូ លូ​ឡា ដា ស៊ី​ល​វ៉ា (Luiz Inacio Lula da Silva)​ជា​ជន​ឆ្វេង​និយម​ដែល​បាន​ចូល​កាន់តំណែង​នៅ​ថ្ងៃទី ១​ខែ​មករា​បន្ទាប់ពី​បាន​ផ្តួល​លោក​បូល​សូ​ណារ៉ូ​ក្នុងការ​​បោះឆ្នោត​ខែតុលា បាន​ប្តេជ្ញា​ថា​នឹង​នាំ​ខ្លួន​អ្នក​ទទួលខុសត្រូវ​មក​កាត់ទោស​។​

​លោក​បាន​ចោទ​ក្រុម​កុបក​រថា​បាន​ព្យាយាម​ផ្តួលរំលំ​លទ្ធិប្រជាធិបតេយ្យ ហើយ​បាន​ចោទសួរ​ថា​ហេតុអ្វី​បាន​ជា​កងទ័ព​មិន​បង្អាក់​ការអំពាវនាវ​ឱ្យ​មាន​រដ្ឋប្រហារ​យោធា​នៅក្រៅ​បន្ទាយ​របស់​ពួកគេ​។​

​កាលពី​ថ្ងៃអាទិត្យ ហ្វូង​មនុស្ស​ដែល​មាន​កំហឹង​បាន​លុកលុយ​ពេញ​សភា តុលាការ​កំពូល និង​ការិយាល័យ​ប្រធានាធិបតី ដោយ​វាយ​កម្ទេច​បង្អួច គ្រឿងសង្ហារិម​និង​ស្នាដៃ​សិល្បៈ​នានា​នៅ​ក្នុងការ​វាយ​​ប្រហារ​ដ៏​អាក្រក់​បំផុត​លើ​ស្ថាប័នរដ្ឋ​ចាប់តាំងពី​ការវិលត្រឡប់​របស់​ប្រេ​ស៊ីល​ទៅ​កាន់​លទ្ធិប្រជាធិបតេយ្យ​ក្នុង​ទសវត្សរ៍​ឆ្នាំ ១៩៨០​។​

​លោក​បូល​សូ​ណារ៉ូ ដែល​បាន​ហោះ​ទៅ​សហរដ្ឋ​អាម៉េរិក​ប៉ុន្មាន​ថ្ងៃ​មុន​ពេល​អាណត្តិ​របស់​គាត់​បានបញ្ចប់ បាន​ទៅ​មន្ទីរពេទ្យ​ក្នុង​ទីក្រុងអ័​រលែ​នដូ (Orlando)​កាលពី​ថ្ងៃ​ចន្ទ​ដោយ​ត្អូញត្អែរ​ពី​ការ​ឈឺពោះ​​វៀន ដែល​ទាក់ទង​នឹង​ការចាក់​គាត់​របួស​ក្នុងអំឡុង​យុទ្ធនាការ​បោះឆ្នោត​ឆ្នាំ ២០១៨​។​

​វេជ្ជបណ្ឌិត​របស់គាត់​បាន​និយាយថា គាត់​មាន​បញ្ហា​ស្ទះ​ពោះវៀន​មិន​ធ្ងន់ធ្ងរ ហើយ​ទំនងជា​មិន​ត្រូវការ​ការវះកាត់​ទេ​។​

​នៅក្នុង​បទសម្ភាសន៍​ជាមួយ​ទូរទស្សន៍ CNN Brasil លោក​បូល​សូ​ណារ៉ូ​បាន​និយាយថា លោក​មាន​គម្រោង​ស្នាក់នៅ​សហរដ្ឋ​អាម៉េរិក​រហូតដល់​ចុង​ខែ​មករា​ប៉ុន្តែ​ឥឡូវ​នេះ​មាន​គម្រោង​ត្រឡប់​ទៅប្រ​​ទេស​ប្រេ​ស៊ីល​វិញ​ក្នុងពេ​លឆាប់ៗ​ដើម្បី​ជួប​គ្រូពេទ្យ​៕

​លោក​បូល​សូ​ណារ៉ូ​មាន​បញ្ហា​ស្ទះ​ពោះវៀន​មិន​ធ្ងន់ធ្ងរ ហើយ​ទំនងជា​មិន​ត្រូវការ​ការវះកាត់​ទេ​