​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ខ្យល់ព្យុះ​ឥតឈប់ឈរ​បាន​វាយលុក​រដ្ឋ​កាលីហ្វ័​រញ៉ា​ម្តង​ទៀត​កាលពី​ថ្ងៃ​អង្គា​រ​ទី​១០​មករា ដែល​ជា​ការបំផ្លិចបំផ្លាញ​ចុងក្រោយ​បំផុត​ក្នុង​សប្តាហ៍​នៃ​អាកាសធាតុ​ធ្ងន់ធ្ងរ ដែល​បណ្តាលឱ្យ​ស្លាប់​មនុស្ស​យ៉ាង​តិច ១៦ នាក់ និង​បង្ក​ការបំផ្លិចបំផ្លាញ​នៅ​តំបន់​ដ៏​ធំ​ទូលាយ​។​

​ភ្លៀង​ធ្លាក់​ខ្លាំង​បាន​បណ្តាលឱ្យ​មាន​ទឹកជំនន់​ភ្លាមៗ បិទ​ផ្លូវ​ហាយវេ​សំខាន់ៗ ដួលរលំ​ដើមឈើ និង​អូស​យក​អ្នកបើកបរ​និង​អ្នកដំណើរ រួម​ទាំង​ក្មេង​ប្រុស​អាយុ​ប្រាំ​ឆ្នាំ​ម្នាក់​ដែល​នៅតែ​បាត់​ខ្លួន​នៅ​កណ្តាល​​រដ្ឋ​កាលីហ្វ័​រញ៉ា ខណៈ​ភ្លៀង​និង​ព្រិល​កាន់តែ​ច្រើន​បន្ត​វាយប្រហារ​រដ្ឋ​ដែល​មាន​ប្រជាជន​ច្រើន​បំផុត​របស់​អាម៉េរិក​មួ​យ​នេះ​។​

​យោង​តាម​វេបសាយ​តាមដាន​ថាមពល Poweroutage.us បានឱ្យដឹងថា ផ្ទះ​និង​អាជីវកម្ម​នៅ​រដ្ឋ​កាលីហ្វ័​រញ៉ា​ប្រហែល ១៦០.០០០ ខ្នង​គឺ​គ្មាន​ថាមពល​ប្រើ​កាលពី​ថ្ងៃ​អង្គារ​។​

​សេវា​អាកាសធាតុ​ជាតិ (NWS) បាន​និយាយថា ព្យុះ​ថ្មី​មួយ​គ្រោង​នឹង​វាយប្រហារ​រដ្ឋ​នេះ​ជាមួយនឹង​ភ្លៀង​ថ្មី​រហូត​ដល់​កម្រិត ៧ អ៊ី​ញ (១៨ សង់ទីម៉ែត្រ​) នៅ​ភាគ​ខាងជើង​រដ្ឋ​កាលីហ្វ័រ​ញ៉ា​នៅ​ថ្ងៃ​ពុធ និង ព្រិល​កម្រាស់​ក្រាស់ៗ​បន្ថែម​ទៀត​នៅ​លើ​ភ្នំ​សៀ​រ៉ានេ​វ៉ា​ដា (Sierra Nevada) ។​

NWS បាន​ពណ៌នា​អំពី “​ការវាយលុក​គ្មាន​ទីបញ្ចប់​នៃ​ព្រឹត្តិការណ៍​បរិយាកាស​ទន្លេ​” ដែល​ជា​ប្រព័ន្ធ​ព្យុះ​ដ៏​មាន​ឥទ្ធិពល​បំផុត ចាប់តាំងពី​ឆ្នាំ​២០០៥​។​

​ទីប្រជុំជន​ម៉ុន​តេ​ស៊ីតូ (Montecito) ដែល​ជា​លំនៅ​របស់​ព្រះអង្គម្ចាស់​ហារី​របស់​ច​ក្រ​ភព​អង់គ្លេស និង​មហេសី​មេហ្គា​ន ម៉ា​កិល (Meghan Markle) ត្រូវ​បាន​វាយប្រហារ​ដោយ​ភ្លៀង ដោយ​គំរាម​បង្ក​ការ​រអិល​បាក់​ដី​ដ៏​គ្រោះថ្នាក់​នៅ​តាម​ភ្នំ ដែល​មាន​ដី​ជ្រាយ​រួច​ទៅហើយ​ដោយសារ​ភ្លៀង​ធ្លាក់​អស់​ជាច្រើន​សប្តាហ៍ និង​បង្ក​ឱ្យមាន​ការជម្លៀស​ម​នុស្ស​ចេញ​។​

​អ្នកស្រុក ឈ្មោះ ដា​នី​ញែល ដេ​មូ​យើ (Daniel DeMuyer) បាន​ប្រាប់​ទីភ្នាក់ងារ​សារព័ត៌មាន AFP ថា “​ដោយសារ​តែ​ភ្នំ​នៅ​ទីនោះ ចឹង​នៅ​ពេល​ភ្លៀង​ធ្លាក់​មក​ក្នុង​អត្រា​ខ្ពស់​…​វា​ពិតជា​គ្រោះថ្នាក់​ណាស់​”៕

​ផ្នែក​ភាគច្រើន​នៃ​រដ្ឋ​កាលីហ្វ័រ​ញ៉ាជ​ន់​លិច​ដោយសារ​ព្យុះ​ភ្លៀង​