​ដោយ​: បាយ័ន​/​សៀមរាប​: កាលពី​ថ្ងៃទី​១០ ខែមករា ឆ្នាំ​២០២៣​នេះ រដ្ឋបាល​ខេត្តសៀមរាប​រៀបចំ​កិច្ចប្រជុំ​សាមញ្ញ​លើក​ទី​៤៤ របស់​ក្រុមប្រឹក្សា​ខេត្តសៀមរាប​បានរៀបចំ​កិច្ចប្រជុំ​សាមញ្ញ​លើក​ទី​៤៤ អាណត្តិ​ទី​៣ តាម​ប្រតិទិន​ដែល​បាន​គ្រោងទុក​ក្រោម​អធិបតីភាព​របស់ លោក អ៊ា​ន ឃុន ប្រធាន​ក្រុមប្រឹក្សា​ខេត្ត និង​លោក ទៀ សីហា អភិបាល នៃ​គណៈ​អភិបាលខេត្ត​សៀមរាប ដោយមាន​ការអញ្ជើញ​ចូលរួម​ពី លោក លោកស្រី សមាជិក​ក្រុមប្រឹក្សា​ខេត្ត លោក លោកស្រី អភិបាលរង​ខេត្ត អាជ្ញាធរ​ជាតិ​អប្សរា លោក នាយក​រដ្ឋបាល​សាលាខេត្ត លោក លោកស្រី នាយក នាយករង​ទីចាត់ការ អង្គភាព​ចំណុះឱ្យ​សាលាខេត្ត ថ្នាក់ដឹកនាំ​មន្ទីរ​-​អង្គភាព អាជ្ញាធរ ក្រុង ស្រុក​។​

បន្ទាប់ពី​អនុម័ត​លើរ​បៀ​វារៈ​មួយចំនួន ដែល​បានគ្រោង​រួចមក ក្នុងនោះដែរ​សមាជិក​នៃ​ក្រុមប្រឹក្សា​ខេត្ត បានធ្វើការ​ពិនិត្យ ពិភាក្សា ព្រមទាំង​បាន​លើក​នូវ​ចំណុច​មួយចំនួន​ពាក់ព័ន្ធ​នឹង​ការបន្ត​ពង្រឹង​ការអនុវត្ត​ច្បាប់​ចរាចរណ៍​ផ្លូវគោក ការកំណត់​ផ្លូវ​ឯកទិស ការរៀបចំ​សណ្តាប់ធ្នាប់​ផ្សារលើ​ធំថ្មី​ឡើងវិញ ការរៀបចំ​គូស​គំនូស​ឆ្លងផ្លូវ​នៅតាម​ភ្លើង​សញ្ញា​ចរាចរណ៍​តាម​គោលដៅ​សំខាន់ៗ ការគ្រប់គ្រង​សុខ​សុវត្ថិភាព​សណ្តាប់ធ្នាប់​ការលក់​ប្រេងឥន្ធនៈ ការគ្រប់គ្រង​បរិស្ថាន​នៅ​ទីកន្លែង​សក្ការៈ​ព្រះអង្គ​ចេក​ព្រះអង្គ​ចម ការជួសជុល​ផ្លូវ​កូរ៉េ (​ចាប់ពី​ផ្លូវ ៣០​ម៉ែត្រ​រហូតដល់​ផ្លូវ​មុខ​បា​ឡុង​) និង​ការរៀបចំ​កែលម្អ​សោ​ភណ្ឌ​ភាព​នៅ​រង្វង់​មូល​ជ័យ​វរ្ម័នទី​៧ និង​រង្វង់​មូល​រំដួល​។ ជាមួយនឹង​ការលើកឡើង​ខាងលើ លោក អភិបាលខេត្ត លោក អគ្គនាយករង​អាជ្ញាធរ​ជាតិ​អប្សរា និង​លោក ប្រធាន​មន្ទីរ​-​អង្គភាព​ពាក់ព័ន្ធ បានធ្វើការ​បកស្រាយ​បំភ្លឺ និង​ទទួលយក​កិច្ចការ​ទាំងនេះ​យកទៅ​បន្ត​អនុវត្ត​ដើម្បី​ដោះស្រាយ​។​

​លោក អភិបាល នៃ​គណៈ​អភិបាលខេត្ត ក៏បាន​ជំរុញ​បន្ថែម​ដល់​មន្ទីរ​-​អង្គភាព​ជុំវិញ​ខេត្ត កងកម្លាំងប្រដាប់អាវុធ​ទាំងបី បន្ត​យកចិត្តទុកដាក់​អនុវត្ត​តួនាទី ភារកិច្ច​របស់ខ្លួន​ដែល​លោក លោកស្រី សមាជិក​ក្រុមប្រឹក្សា​ខេត្ត​បានលើកឡើង​នាពេលនេះ​។ ជាមួយនេះ រដ្ឋបាលខេត្ត​នៅមាន​ភាព​មមាញឹក​ក្នុងការ​រៀបចំ​កិច្ចការ​ផ្លាស់​លំនៅឋាន​របស់​ប្រជាពលរដ្ឋ​ដែល​ស្ថិតនៅក្នុង​តំបន់​គ្រប់គ្រង​ដោយ​អាជ្ញាធរ​ជាតិ​អប្សរា ជាពិសេស​ត្រូវ​រៀបចំ​ផ្លាស់ប្តូរ​ជីវភាព​ឡើងវិញ និង​ព្យាយាម​ស្វែងរក​និ​យោគិន ដើម្បី​ធ្វើការ​វិនិយោគ​នៅក្នុង​តំបន់​អភិវឌ្ឍន៍​ធម្មជាតិ​រុន​តា​ឯក និង​តំបន់​ពាក់​ស្នែង ក្នុងការ​បង្កើត​មុខរបរ​បន្ថែមទៀត​ជូន​ដល់​ពួកគាត់​។

​ដោយឡែក​ចំពោះ​ដី​ដែល​នៅ​ទំនេរ​បន្ទាប់ពី​បងប្អូន​ប្រជាពលរដ្ឋ​បាន រដ្ឋបាលខេត្ត និង​អាជ្ញាធរ​ជាតិ​អប្សរា នឹង​រៀបចំ​ប្រជុំពិភាក្សា​ដើម្បី​រៀបចំ​ឡើងវិញ​។ លោក អភិបាលខេត្ត បានស្នើ​សុំ​ដល់​អង្គប្រជុំ​ជួយ​បន្ត​ផ្សព្វផ្សាយ​ជូន​ដល់​ប្រជាជន​ក្នុង​ខេត្ត ដើម្បី​មក​ទទួល​ចាក់​វ៉ាក់សាំង​ការពារ​ជំងឺ​កូ​វីដ​-១៩ និង​ការធ្វើ​អត្តសញ្ញាណប័ណ្ណ ព្រមទាំង​ធ្វើ​ទុតិយតា​សម្រាប់​ប្រជាពលរដ្ឋ​ដែល​បាន​បាត់​អត្តសញ្ញាណប័ណ្ណ ឬ​សុពលភាព​សល់​រយៈពេល ៩០​ថ្ងៃ និង​ផុត​សុពលភាព ដើម្បី​បាន​ចូលរួម​បោះឆ្នោត​ជ្រើសតាំង​តំណាងរាស្ត្រ នីតិកាល​ទី​៧ នៃ​រដ្ឋសភា​ដែល​ប្រព្រឹត្តទៅ​នាពេលខាងមុខ​នេះ​។

​លោក អ៊ា​ន ឃុន ប្រធាន​ក្រុមប្រឹក្សា​ខេត្ត បាន​ថ្លែង​នូវ​អំណរគុណ​ចំពោះ​គណៈ​អភិបាលខេត្ត​ក្រោម​ការដឹកនាំ​របស់ លោក ទៀ សីហា អភិបាល នៃ​គណៈ​អភិបាលខេត្ត និង​ជា​ប្រធាន​គណៈបញ្ជាការ​ឯកភាព​រដ្ឋបាលខេត្ត បាន​ដឹកនាំ​អនុវត្ត​កិច្ចការ​សំខាន់ៗ​ជាច្រើន​ដើម្បី​បម្រើសេវា​ជូន​ប្រជាពលរដ្ឋ ក៏ដូចជា​ការដោះស្រាយ បញ្ហា​ផ្សេងៗ ព្រមទាំង​សភាពការណ៍​ជាក់ស្តែង​ដែល​កើតមានឡើង​ក្នុង​ខេត្ត ពិសេស​កិច្ចសហការ​ការពារ​ស​ន្តិ​សុខ សណ្តាប់ធ្នាប់ ជូន​ថ្នាក់ដឹកនាំ​ជាន់ខ្ពស់​។ ម្យ៉ាងទៀត​ជា​មោទនភាព​បន្ថែមទៀត គឺ​កិច្ចការពារ​សន្តិសុខ សណ្តាប់ធ្នាប់​ក្នុងឱកាស​ឆ្លង​ឆ្នាំ​សកល ២០២៣ ដែលមាន​លក្ខណៈ​ល្អប្រសើរ​ក្រៃលែង និង​មាន​ការងារ​មួយចំនួនទៀត​។​

​លោក ប្រធាន​ក្រុមប្រឹក្សា​ខេត្ត បាន​បន្ថែមថា ឆ្នាំនេះ​ខេត្តសៀមរាប​នឹង​សហការ​ជាមួយ​សហភាព​សហព័ន្ធ​យុវជន​កម្ពុជា​ដើម្បី​រៀបចំ​ព្រឹត្តិការណ៍​អង្គរ​សង្ក្រាន្ត​ក្រោម​ប្រធានបទ «​ក្តី​ស្រមៃ និង​ក្តីសង្ឃឹម​» ដើម្បី​ទាក់ទាញ​ភ្ញៀវទេសចរ​មក​ទស្សនា​ខេត្តសៀមរាប​បន្ថែមទៀត​៕​/R