​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ទាហាន​អ៊ុយ​ក្រែន​ប្រហែល ១០០ នាក់​នឹង​ធ្វើដំណើរ​ទៅកាន់​បន្ទាយ​ហ្វ​ត​ស៊ីល (Fort Sill)​របស់​រដ្ឋ​អូ​ក្លា​ហូ​ម៉ា​នៅ​សប្តាហ៍​ក្រោយ​ដើម្បី​ចាប់ផ្តើម​ការហ្វឹកហ្វឺន​​លើ​ប្រព័ន្ធ​កាំ​ជ្រួច Patriot ដែល​នេះ​នឹង​ធ្វើឱ្យ​រដ្ឋាភិបាល​ក្រុង​គៀវ​កាន់តែ​ខិត​ទៅជិត​ការទទួលបាន​ខែល​ការពារ​អាកាស​ដើម្បី​ប្រឆាំង​នឹង​ការវាយប្រហារ​ដោយ​មី​ស៊ី​ល​របស់​រុស្ស៊ី​។​

​អស់​រយៈពេល​ជាច្រើន​ខែ​មក​នេះ​អ៊ុយ​ក្រែន​បាន​ស្នើសុំ​ឱ្យ​សហរដ្ឋ​អាម៉េរិក​ផ្តល់​ប្រព័ន្ធ​ការពារ​មី​ស៊ី​ល​នាំ​ផ្លូវ​បាញ់​ពី​ដី​ទៅ​អាកាស Patriot ព្រោះ​វា​អាច​កំណត់​គោលដៅ​លើ​យន្តហោះ មី​ស៊ី​ល​នាំ​ផ្លូវ​និង​​មី​ស៊ី​ល​ផ្លោង​រយៈ​ចម្ងាយ​ខ្លី​។ ក្នុងអំឡុង​ដំណើរ​ទស្សនកិច្ច​ចុង​ខែ​ធ្នូ​ទៅកាន់​សហរដ្ឋ​អាម៉េរិក ប្រធានាធិបតី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​លេន​ស្គី បាន​និយាយថា​ប្រព័ន្ធ​នេះ​នឹង​ធ្វើឱ្យ​មាន​ភាពខុស​​ប្លែក​គ្នា​យ៉ាងខ្លាំង​ក្នុង​ការពង្រឹង​ការការពារ​របស់​ទីក្រុង​គៀវ​ប្រឆាំងនឹង​ការឈ្លានពាន​របស់​រុស្ស៊ី​។​

​អ្នកនាំពាក្យ​របស់​មន្ទី​រ​បញ្ច​កោណ លោក​ឧត្តមសេនីយ៍ ផាត់ រ៉ា​យ​ឌឺ (Pat Ryder)​បាន​និយាយ​កាលពី​ថ្ងៃ​អង្គារ​ទី​១០​មករា​ថា​ចំនួន​ទាហាន​អ៊ុយ​ក្រែន​ដែល​មក​បន្ទាយ​ហ្វ​ត​ស៊ី​ល​គឺ​ប្រហែល​នឹង​​ចំនួន​ដែល​ត្រូវការ​ដើម្បី​ដំណើរការ​ជើង​ទម្រ​បាញ់​មួយ ហើយ​ពួកគេ​នឹង​ផ្តោត​លើ​ការរៀន​ធ្វើ​ប្រតិបត្តិការ និង​ថែទាំ​ប្រព័ន្ធ Patriot​ផងដែរ​។​

​ការសម្រេចចិត្ត​របស់​រដ្ឋាភិបាល​ក្រុង​គៀវ​ក្នុង​ការយក​កងទ័ព​ចេញពី​សមរភូមិ​ដើម្បី​ហ្វឹកហាត់​ឆ្លងកាត់​មហាសមុទ្រ​អា​ត្លង់​ទិក​នៅ​សហរដ្ឋអាម៉េរិក​គឺជា​រឿង​មិន​ធម្មតា​បើទោះបី​ជា​អ៊ុយ​ក្រែន​បាន​បញ្ជូន​​កងកម្លាំង​សម្រាប់​ការហ្វឹកហ្វឺន​រយៈពេល​ខ្លី​នៅឯ​មូលដ្ឋាន​អឺរ៉ុប​សម្រាប់​ប្រព័ន្ធ​ស្មុគស្មាញ​ផ្សេងទៀត​ដែល​ខ្លួន​បានទទួល ដូចជា​ប្រព័ន្ធ​រ៉ុក្កែត​កាំភ្លើង​ធំ​ចល័ត​កម្រិត​ខ្ពស់​ឬ HMARS​។​

​លោក​រ៉ា​យ​ឌឺ​បាន​និយាយថា ការហ្វឹកហាត់​ប្រើ​ប្រព័ន្ធ Patriot ជាធម្មតា​អាច​ចំណាយ​ពេល​ច្រើន​ខែ ប៉ុន្តែ “​ការ​ដែល​កងទ័ព​នៅ​កាន់តែ​ឆ្ងាយ​ពី​សមរភូមិ​ពួកគេ​នឹង​មិន​បាន​ចូលរួម​ជួយ​ដល់​ការធ្វើ​​សង្គ្រាម​ទេ​” ដូច្នេះ​ការហ្វឹកហាត់​នឹង​ត្រូវ​បន្ថយ​ពេលវេលា​។​

​លោក​រ៉ា​យ​ឌឺ​និយាយថា បន្ទាយ​ហ្វ​តស៊ី​ល​ត្រូវ​បាន​ជ្រើសរើស​ព្រោះ​វា​ដំណើរការ​សាលា​បណ្តុះបណ្តាល Patriot រួចហើយ​៕

​កងទ័ព​អ៊ុ​យក្រែន​១០០​នាក់​នឹង​ហ្វឹកហាត់​របៀប​ប្រើ​ប្រព័ន្ធ Patriot នៅ​រដ្ឋ​អូ​ក្លា​ហូ​ម៉ា