​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ តារា​សម្តែង​វ័យក្មេង អូ​ស្ទីន បាត់​ត្លឺ (Austin Butler) រហស្សនាម អែល​វី​ស (Elvis) និង​តារា​សម្តែង​ជើងចាស់ លោកស្រី មី​សែ​ល យ៉ូ (Michelle Yeoh) បានឈ្នះ​ពានរង្វាន់​ភាពយន្ត​កំពូល​នៅ​ឯ​ពិធី​ប្រគល់​ពាន​ផែនដី​មាស (Golden Globes) កាលពី​ថ្ងៃ​អង្គារ​ទី​១០​មករា ខណៈ​ហូលីវូដ​បាន​ត្រឡប់​មក​វិញ​និង​ឱបក្រសោប​យក​កម្មវិធី​មួយ ដែល​ត្រូវបាន​ផ្តាច់ចេញ​ពី​ទូរទស្សន៍​ដោយសារតែ​រឿង​អាស្រូវ​នៃ​ភាព​ចម្រុះ​និង​ក្រមសីលធម៌​។​

​លោក​បាត់​ត្លឺ​អាយុ ៣១ ឆ្នាំ​បាន​ជាប់​ជា​តារា​សម្តែង​ឆ្នើម​នៅក្នុង​រឿង​ភាគ​សម្រាប់​ការ​ដើរតួ​កំពូល​តារាចម្រៀង​រ៉ុក អែល​វី​ស ប្រេ​ស្ល៊ី (Elvis Presley)​ហើយ​ហាក់​ទប់​អារម្មណ៍​រំជើបរំជួល​មិន​​ជាប់​ក្នុង​ពេល​ទទួលពាន​នៅ​ចំពោះ​មុខកំពូល​តារា​ល្បីៗ​ជាច្រើន​នាក់​នៅក្នុង​ឧស្សាហកម្ម​ភាពយន្ត​។​

​លោក​បាត់​ត្លឺ​បាន​និយាយថា “​ខ្ញុំ​នៅ​ក្នុង​បន្ទប់​នេះ​ជាមួយ​វីរបុរស​របស់ខ្ញុំ​ទាំងអស់​។ ខ្ញុំ​សឹង​មិន​ជឿ​ថា​ខ្ញុំ​បាន​នៅ​ទី​នេះ​ទេ​”​។​

“​ប្រ៊ែត ភី​ត​, ខ្ញុំ​ស្រលាញ់​លោក​។ ក្វេ​នទីន ថា​រ៉ា​ន​ទីណូ (Quentin Tarantino) ខ្ញុំ​បាន​ព្រីន​អត្ថបទ​ពីរឿង Pulp Fiction នៅ​ពេល​ខ្ញុំ​មាន​អាយុ ១២ ឆ្នាំ​”​។​

​លោកស្រី​យ៉ូ ដែល​បាន​ទទួលពាន​សម្រាប់​ការដើរ​តួឯក​របស់​លោក​ស្រី​នៅ​ក្នុង​ខ្សែភាពយន្ត​បែប​វាយតប់ “Everything Everywhere All at Once” បាន​ឡើង​ឆាក​បន្ទាប់ពី​ឈ្មោះ​របស់​លោកស្រី​ត្រូវបាន​ហៅ ហើយ​និយាយ​ថា លោកស្រី “​គ្រាន់តែ​ឡើងឈរ​នៅទីនេះ ហើយ​ទទួលយក​អ្វីៗ​ទាំង​អស់​ប៉ុណ្ណោះ​”​។​

​តារា​សម្ដែង​ម៉ាឡេស៊ី​ដើមកំណើត​ចិន​រូបនេះ​បាន​បន្ថែមថា “​ហូលីវូដ​គឺជា​សុបិន​ក្លាយជា​ការពិត​រហូតដល់​ខ្ញុំ​មក​ទីនេះ​” ដោយ​កត់សម្គាល់ថា លោកស្រី​ត្រូវគេ​ហៅថា “​ជនជាតិភាគតិច​” ហើយ​ត្រូវ​គេ​សួរថា​តើ​លោកស្រី​ចេះ​និយាយ​ភាសា​អង់គ្លេស​ឬ​អត់​នៅ​ដើម​អាជីព​ដំបូង​របស់​លោកស្រី​។​

​នៅ​៤០​ឆ្នាំ​ក្រោយមក លោកស្រី​បាន​និយាយថា “​វា​ជា​ដំណើរ​ដ៏​អស្ចារ្យ​និង​ជា​ការតស៊ូ​មិន​គួរ​ឱ្យ​ជឿ​ក្នុង​ការ​មក​ដល់​ទី​នេះ​នៅថ្ងៃនេះ ប៉ុន្តែ​ខ្ញុំ​គិតថា​វា​មាន​តម្លៃ​ណាស់​ចំពោះ​ការតស៊ូ​នេះ​”៕

​លោក​បាត់​ត្លឺ​និង​លោកស្រី​យ៉ូទ​ទួលពាន​ផែនដី​មាស​កាលពី​ថ្ងៃ​អង្គារ