​ដោយ​:​ពៅ​និមល​/​ភ្នំពេញ​៖ ការកំណត់ថ្លៃ​លក់រាយ​ប្រេងឥន្ធនៈ គិត​ចាប់ពី​ថ្ងៃទី​១១ ដល់ទី​២០ ខែមករា ឆ្នាំ​២០២៣ សម្រាប់​ប្រេងម៉ាស៊ូត ឃើញថា​បាន​ធ្លាក់​ពី ៤.៥៥០​រៀល មក​ត្រឹម ៤.៤០០​រៀល ក្នុង​១​លីត្រ​។ រីឯ​ប្រេងសាំង​ធម្មតា​រក្សា​ថ្លៃ​នៅ​ដដែល គឺ ៤.២០០ រៀល នៅក្នុង​១​លីត្រ បើ​ធៀប​នឹង​រយៈពេល​ដូចគ្នា​នៅ​ដើមខែ​មករា​។​

​យោងតាម​សេចក្តីជូនដំណឹង ស្តីពី​ថ្លៃ​លក់រាយ​ប្រេងឥន្ធនៈ​នៅតាម​ស្ថានីយ៍ នៅ​រសៀល​ថ្ងៃនេះ បាន​ឲ្យ​ដឹងថា ផ្អែក​តាម​តម្លៃ​មធ្យម​ប្រេងឥន្ធនៈ​លើ​ទីផ្សារ​អន្តរជាតិ ថ្លៃ​លក់រាយ​ប្រេងឥន្ធនៈ​ពីថ្ងៃ​ទី​១១ ដល់ទី​២០ ខែមករា ឆ្នាំ​២០២៣ នឹងត្រូវ​លក់ ៤.៤៦៧​រៀល ក្នុង​១​លីត្រ សម្រាប់​ប្រេងសាំង​ធម្មតា EA92 និង ៤.៦៦៧​រៀល ក្នុង​១​លីត្រ សម្រាប់​ប្រេងម៉ាស៊ូត​។

​ក្រសួង បាន​ឲ្យ​ដឹង​ទៀតថា រហូតមកដល់​បច្ចុប្បន្ន​នេះ ប្រមុខ​រាជរដ្ឋាភិបាល​កម្ពុជា នៅតែ​បន្ត និង​សម្រេច​បញ្ចុះតម្លៃ​លក់រាយ​ប្រេងឥន្ធនៈ​ចំនួន ៦,៥​សេន​ដុល្លារ ក្នុង​១​លីត្រ​ដដែល ដើម្បី​ជួយ​សម្រួល​ដល់​ជីវភាព​របស់​ប្រជាជន និង​ដោយមាន​ការរួមចំណែក​ពី​ក្រុមហ៊ុន​ចែកចាយ​ប្រេងឥន្ធនៈ​នៅ​កម្ពុជា​។​

ក្រសួងពាណិជ្ជកម្ម បាន​បញ្ជាក់ថា ពាក់ព័ន្ធ​ការកំណត់ថ្លៃ​លក់រាយ​ប្រេងឥន្ធនៈ​នៅ​កម្ពុជា ក្រសួង​គ្រាន់តែ​ស្រង់តម្លៃ​ឡើង​-​ចុះ នៃ​ប្រេង​តាម​ទីផ្សារ​អន្តរជាតិ មក​គណនា​តាម​ប្រកាស​ដូច​មាន​ក្នុង​ភ្ជាប់​ក្នុង​ឯកសារ​ប៉ុណ្ណោះ​៕/R