ដោយៈសុផល/ភ្នំពេញ៖លោក ហ៊ុន ម៉ានី ប្រធានសហភាព សហព័ន្ធ យុវជនកម្ពុជា អមដំណើរដោយ លោក ស សុខា អនុប្រធាន ស.ស.យ.ក.និងជា ប្រធានក្រុមប្រឹក្សាយុវជន គ្រឹះស្ថានឧត្តមសិក្សា (ក.យ.គ.)នៃ ស.ស.យ.ក នាព្រឹកថ្ងៃទី១១ ខែមករា ឆ្នាំ២០២៣ បានអញ្ជើញជួបជាមួយ គណៈគ្រប់គ្រង នៃសាកលវិទ្យាល័យភូមិន្ទកសិកម្ម ដើម្បីស្តាប់នូវរបាយការណ៍ វឌ្ឍនភាពរបស់សាកលវិទ្យាល័យ និងស្វែងយល់ពីស្ថានភាពនានា ជាពិសេសបន្តពិភាក្សាលើការងារអភិវឌ្ឍសមត្ថភាពយុវជនក្នុង និងក្រៅ ក្របខណ្ឌការងារស្ម័គ្រចិត្ត ស.ស.យ.ក.ធ្វើយ៉ាងណាពង្រី ការ ផ្ដល់ឱកាសដល់យុវជន និងនិស្សិតនៅសកលវិទ្យាល័យ បន្ថែមទៀត។

ជំនួបនេះមានការអញ្ជើញចូលរួមពីសំណាក់លោកបណ្ឌិត ង៉ោ ប៊ុនថាន សាកលវិទ្យាធិការនៃសាកលវិទ្យាល័យភូមិន្ទកសិកម្ម និងជា សមា ជិកគណៈដឹកនាំចលនាយុវជនស្ម័គ្រចិត្តស.ស.យ.ក. ប្រចាំគ្រឹះស្ថានឧត្តមសិក្សារដ្ឋ រួមទាំងថ្នាក់ដឹកនាំ សមាជិក សមាជិកា លោកគ្រូ អ្នកគ្រូសាស្ត្រាចារ្យ នៃសាកលវិទ្យាល័យភូមិន្ទ កសិកម្មជាច្រើនរូប។

មិនខុសពីសព្វមួយដងបន្ទាប់ពីជួបជាមួយគណៈគ្រប់គ្រងនៃសាកលវិទ្យាល័យ លោក ហ៊ុន ម៉ានី បានបន្តជួបជាមួយសមាជិក សមាជិកា ក្នុងរចនាសម្ព័ន្ធ ស.ស.យ.ក. ប្រចាំនៅសាកល វិទ្យាល័យភូមិន្ទកសិកម្មផងដែរ។

នាឱកាសសំណេះសំណាលនោះ លោក ហ៊ុន ម៉ានី ប្រធាន​ស.ស.យ.ក បានថ្លែងអំណរគុណដល់ថ្នាក់ដឹកនាំ សមាជិក សមាជិកានៃសាកលវិទ្យាល័យទាំងអស់ដែលបានខិតខំប្រឹងប្រែង លះបង់កម្លាំងកាយចិត្ត ស្ម័គ្រចិត្តចូលរួមជាមួយ ស.ស.យ.ក និងសម្រេច បានសមិទ្ធផលជាច្រើន ក្រោមការដឹកនាំយ៉ាង​មុតមាំរបស់ លោកបណ្ឌិត ង៉ោ ប៊ុនថាន សាកលវិទ្យាធិការ​នៃសាកលវិទ្យាល័យភូមិន្ទ កសិកម្ម។ ជាមួយគ្នានេះ ឯកឧត្តម បានមានប្រសាសន៍លើកឡើងអំពីការគាំទ្រ និងការជំរុញដល់ការ​ស្វែងរកឱកាសបន្ថែមសម្រាប់យុវជនដើម្បីពង្រីក ការចូលរួមរបស់​ពួក​គាត់ក្នុងកិច្ចការសង្គម និងផ្សាភ្ជាប់ទំនាក់ទំនងជាមួយ​វិស័យនានា ជាពិសេសពង្រឹងសមត្ថភាពដល់ប្អូនៗនិស្សិត ដើម្បីកម្ពុជាទទួលបានធនធានមនុស្សដែលប្រកបទៅដោយសមត្ថភាពខ្ពស់។

ឆ្លៀតក្នុងឱកាសនេះ លោក អ៊ឹង រតនា សាកលវិទ្យាធិការរងនៃ​សាកលវិទ្យាល័យភូមិន្ទកសិកម្ម បានធ្វើការបេជ្ញាចិត្តបន្ត​បេសកកម្ម​បំពេញ ភារកិច្ច និងសកម្មភាពការងាររបស់ខ្លួន ទាក់ទងទងទៅនឹងការងារយុជនឱ្យបានល្អប្រសើរស្របតាមតម្រូវការរបស់ ក.យ.គ. និងស.ស.យ.ក.ខិតខំ ប្រឹងប្រែងធ្វើចលនា កៀគរ និងប្រមូលផ្ដុំនិស្សិត ដើម្បីគាំទ្រ និងចូលរួម ក្នុងសកម្មភាព​នានារបស់ស.ស.យ.ក.បន្តចូលរួមសហការក្នុងការផ្ដល់ យោបល់​ដល់ ក.យ.គ. ដើម្បីទទួលបាន ជោគជ័យក្នុងការ​អនុវត្តផែនការ​សកម្មភាពការងារប្រចាំឆ្នាំ សហការក្នុងការអប់រំ និងបណ្ដុះមន​សិការ លើកទឹកចិត្តដល់និស្សិតឱ្យខិតខំប្រឹងប្រែងសិក្សារៀនសូត្រ ពង្រឹងសមត្ថភាព ជាពិសេសផ្ដល់កិច្ចសហការល្អដល់​ក.យ.គ.​សម្រាប់ការរៀបចំ សិក្ខាសាលា ឬព្រឹត្តិការណ៍សំខាន់ៗ ហើយ​លើសពីនោះថែមទៀតផ្ដល់កិច្ចសហការជាមួយក.យ.គ.ដើម្បីចូលរួមផ្សព្វផ្សាយអំពីបេសកកម្ម នានា របស់ស.ស.យ.ក.និង បំពេញ​ការងារផ្សេងៗប្រកបដោយស្មារតីទទួលខុសត្រូវខ្ពស់ និងស្មោះត្រង់​ជានិច្ច៕សរន/r