​ប្រែ​សម្រួលៈ​បំណង​(​ដេល្លី​ម៉េល​,​ស្ត្រេត​ថែមស៍​)៖ ចិន​កាលពី​ថ្ងៃ​ពុធ​ទី​១១​មករា​បាន​ធ្វើការ​គំរាម​វាយប្រហា​រកោះ​តៃវ៉ាន់​សាជាថ្មី​និង​បាន​ព្រមាន​ពួក​អ្នកនយោបាយ​បរទេស​ដែល​សកម្ម​ទាក់ទង​ជាមួយ​ក្រុម​​មេដឹកនាំ​​កោះ​ស្វ័យគ្រប់គ្រង​នេះ​ថា​កុំ​«​លលេង​ជាមួយ​ភ្លើង​»​។​

​អ្នកនាំពាក្យ​ការិយាល័យ​កិច្ចការ​តៃវ៉ាន់​របស់​ចិន​បាន​និយាយថា រដ្ឋាភិបាល​ទីក្រុង​ប៉េកាំង​នៅ​ឆ្នាំ​ថ្មី​នេះ​ប្តេជ្ញា​«​ការពារ​អធិបតេយ្យភាព​និង​បូរណភាព​ទឹកដី​» ព្រមទាំង​«​បំផ្លាញចោល​ផែនការ​ទាមទារ​​ឯករាជ្យភាព​»​នៅ​កោះ​តៃវ៉ាន់​ដែល​ជា​ទឹកដី​របស់​ចិន​។​

​លោក​ម៉ា ស៊ា​វ​ហ្កាង​(Ma Xiaoguang)​បាន​និយាយ​នៅក្នុង​សន្និសីទ​កាសែត​មួយ​ថា​«​ការគាំទ្រ​ឯករាជ្យភាព​តៃវ៉ាន់​ពី​ចំណោម​សមាសភាព​ប្រឆាំង​ចិន​នៅក្នុង​ប្រទេស​បរទេសមួយ​ចំនួន​ជា​ការ​បង្ករឿង​​ដោយ​ចេតនា​»​។​

​លោក​ម៉ា ស៊ា​វ​ហ្កាង

​សូមបញ្ជាក់​ថា ចិន​ប៉េកាំង​ចាត់ទុក​កោះ​តៃវ៉ាន់​ជា​ទឹកដី​ចិន ដែល​ត្រូវតែ​ធ្វើ​ការបង្រួបបង្រួម​មក​នៅ​ក្រោម​ការគ្រប់គ្រង​របស់​រដ្ឋាភិបាល​ទីក្រុង​ប៉េកាំង​វិញ និង​អាច​ប្រើ​កម្លាំងយោធា​ក្នុង​ករណី​ចាំបាច់​។​

​ដំណើរ​ទស្សនកិច្ច​បន្ត​បន្ទាប់​នៅ​ប៉ុន្មាន​ខែ​ចុងក្រោយ​នេះ​ដោយ​អ្នកនយោបាយ​បរទេស​មក​កាន់​កោះ​តៃវ៉ាន់ រួមមាន​ប្រធាន​សភា​អាម៉េរិក​និង​អ្នកនយោបាយ​មួយចំនួន​មក​ពី​សហភាព​អឺរ៉ុប​ផង នាំអោយ​​ចិន​ខឹងក្រេវក្រោធ​និង​បញ្ចេញ​សាច់ដុំ​យោធានៅ​ជុំវិញ​កោះ​ជាការ​គំរាម​។​

​នៅ​សប្តាហ៍​នេះ យោធា​តៃវ៉ាន់​ត្រូវធ្វើ​សមយុទ្ធ​យោធា​ក្នុង​គោលបំណង​ធានា​សាធារណជន​ឡើងវិញ​អំពី​លទ្ធភាព​របស់​ខ្លួន​ក្នុងការ​តតាំង​ជាមួយ​យោធា​ចិន នៅ​មុន​បុណ្យចូលឆ្នាំ​ថ្មី​របស់​ប្រជាជន​ចិន​។​មន្ត្រី​​កងទ័ពអាកាស​តៃវ៉ាន់​ម្នាក់​បាន​ប្រាប់​អ្នកយកព័ត៌មាន​ថា​« សំខាន់​បំផុត​គឺ​ត្រូវ​រក្សា​សុវត្ថិភាព​របស់​ដែនអាកាស​និង​សន្តិសុខ​ជាតិ​របស់​យើង​»​។​

​ការហ្វឹកហាត់​នេះ​កើតឡើង​ចំ​ពេល​សមាជិកសភា​អាល្លឺម៉ង់​និង​លី​ទុយ​អា​នី ធ្វើ​ទស្សនកិច្ច​តៃវ៉ាន់​ដើម្បី​ផ្តល់​កម្លាំងចិត្ត​ដល់​រដ្ឋាភិបាល​ទីក្រុង​តៃប៉ិ​។​

​សមាជិក​សភា​អាល្លឺម៉ង់​និង​គណៈប្រតិភូ​របស់​លោក​ស្រី ឈរ​ថត​ជាមួយ​ប្រធានសភា​តៃវ៉ាន់​នៅ​វិមាន​សភា​ក្នុង​ក្រុង​តៃប៉ិ​

​លោក​ម៉ា​បាន​និយាយថា «​យើង​អំពាវនាវ​គ្រប់​ប្រទេស​ពាក់ព័ន្ធ​…​ឈប់​បញ្ជូន​សញ្ញា​ខុស​ទៅកាន់​កម្លាំង​ផ្តាច់ខ្លួន​តៃវ៉ាន់ និង​ឈប់​លេង​ជាមួយ​ភ្លើង​អំពី​បញ្ហា​តៃវ៉ាន់​»​។​

​លោក​បាន​បន្តថា សមយុទ្ធ​របស់​កងទ័ព​រំដោះប្រជាជន​ចិន​នាពេលកន្លងមកជាការ​ព្រមាន​យ៉ាង​ម៉ឺងម៉ាត់​ប្រឆាំង​ការបង្ក​រឿង​ខ្លាំង​ឡើង​ពី​រដ្ឋាភិបាល​ទីក្រុង​តៃប៉ិ ដែល​ធ្វើអោយ​ខូច​សន្តិភាព​និង​ស្ថិរភាព​នៅ​ច្រក​ស​មុទ្រតៃ​​វ៉ាន់​។​«​អាជ្ញាធរ​កោះ​នេះ​កាលពី​ពេល​ថ្មីៗ​បាន​បង្កើន​ការ​សមគំនិត​យោធា​ជាមួយ​អាម៉េរិក​»​។​

​លោក​ទំនងជា​ចង់​និយាយ​សំដៅ​ពួក​សមាជិកសភា​អាម៉េរិក​អនុម័ត​ច្បាប់​ថវិកា​មួយ​កាលពី​ខែ​មុន រួមមាន​ប្រាក់​២​ពាន់​លាន​ដុល្លារ​សំរាប់​សព្វាវុធ​ដល់​តៃវ៉ាន់​នៅ​ឆ្នាំ​២០២៣ និង​១០​ពាន់​លាន​ដុល្លារ​ទៀត​​សំរាប់​ជំនួយ​ដល់​ឆ្នាំ​២០២៧។

​កន្លង​មក​ចិន​បាន​ឆ្លើយតប​ទៅនឹង​ដំណើរ​ទស្សនកិច្ច​របស់​អ្នកនយោបាយ​បរទេស​នៅ​កោះ​នេះ​ជាមួយនឹង​សមយុទ្ធ​យោធា​ទ្រង់ទ្រាយ​ធំ​ដែល​ត្រូវបាន​គេ​មើលឃើញ​ថា​ជា​ការហាត់​សម​បិទ​ខ្ទប់​ឬ​ចូល​ឈ្លានពាន​កោះ​នេះ​។​កាលពី​ចុង​ខែ​ធ្នូ​ចិន​បាន​បញ្ជូន​យន្តហោះ​ចម្បាំង​៧១​គ្រឿង​និង​នាវាចម្បាំង​ប្រាំពី​រគ្រឿង​ទៅ​ធ្វើ​សមយុទ្ធ​ឡោម​ព័ទ្ធ​តៃវ៉ាន់​ ជាការបង្ហាញកម្លាំងក្បែរកោះតៃវ៉ាន់ធំបំផុតប្រចាំឆ្នាំ២០២២៕