​ប្រែ​សម្រួលៈ​បំណង​(​វ៉េ​អិន​អិច​ស្ព្រេ​ស​)៖ ក្នុង​ដំណើរ​ទស្សនកិច្ច​នៅ​ទីក្រុង​វៀងចន្ទន៍ នាយករដ្ឋមន្ត្រី​វៀតណាម​លោក​ផាំ មិញ ជិញ និង​នាយករដ្ឋមន្ត្រី​ឡាវ​ថ្មី​លោក​សូ​ណេសាយ ស៊ីផា​ន​ដន​(Sonexay Siphandone)​កាលពី​ថ្ងៃ​ពុធ​បាន​ព្រមព្រៀង​គ្នា​ថា​នឹង​បង្កើន​ភាព​ជា​ដៃគូ​សេដ្ឋកិច្ច​ព្រមទាំង​គាំទ្រ​គ្នា​ទៅវិញទៅមក​នៅក្នុង​ដំណើរការ​ជំរុញ​ការ​រើប​រើ​សេដ្ឋកិច្ច​ឡើង​វិញ​នៅ​ក្រោយ​កូវី​ដ​១៩​។​

​ក្នុងអំឡុងពេល​ពិភាក្សាគ្នា​នៅ​ការិយាល័យ​នាយករដ្ឋមន្ត្រី​ឡាវ​ក្នុង​ក្រុង​វៀងចន្ទន៍ លោ​កជិញ​និង​ស៊ីផា​ន​ដន​បានបញ្ជាក់​អះអាង​ឡើងវិញ​ថា ប្រទេស​ទាំង​ពីរ​តែងតែ​អោយ​អាទិភាព​ខ្ពស់​លើ​សាមគ្គីភាព​និង​​មិត្តភាព ព្រមទាំង​កិច្ចសហការ​ពិស្តារ​រវាង​ប្រជាជាតិ​ទាំងពីរ​។​

នាយករដ្ឋមន្ត្រី​វៀតណាម​លោក​ផាំ មិញ ជិញ និង​នាយករដ្ឋមន្ត្រី​ឡាវ​ថ្មី​លោក​សូ​ណេសាយ ស៊ីផា​ន​ដន​ថត​នៅ​ក្រុង​វៀងចន្ទន៍ កាលពី​ថ្ងៃ​១១​មករា​

​ក្រៅពី​ពង្រឹង​ជំនឿ​ទុកចិត្ត​នយោបាយ ប្រទេស​ទាំង​ពីរ​បាន​ព្រមព្រៀង​បង្កើន​កិច្ចសហការ​សេដ្ឋកិច្ច គាំទ្រ​គ្នា​នៅក្នុង​ដំណើរការ​ជំរុញ​ការ​រើប​រើ​នៅក្រោយ​ជំងឺឆ្លង​និង​ស្ថាបនា​សេដ្ឋកិច្ច​ទីផ្សារ​ពឹង​លើ​ខ្លួនឯង ឯករាជ្យ​និង​លម្អៀង​ទៅ​សង្គមនិយម​ជាមួយនឹង​សមាហរណកម្ម​អន្តរជាតិដោយប្រសិទ្ធភាព ​ស៊ី​ជំរៅ​និង​ទូលំទូលាយ​។​

​ប្រទេស​ទាំង​ពីរ​ក៏​នឹង​ពង្រឹង​ភាព​ប្រទាក់ក្រឡា​សេដ្ឋកិច្ច ចេញពី​ហេដ្ឋារចនាសម្ពន្ធ​គម​នាគម​ន៍ ទូរគមនាគមន៍​និង​ថាមពល រហូត​ដល់​ហេដ្ឋារចនាសម្ពន្ធ​ទន់​ដូចជា ស្ថាប័ន នយោបាយ ពាណិជ្ជកម្ម​អេ​ឡិ​ច​​ត្រូ​និច សេដ្ឋកិច្ច​ឌីជីថល ធនាគារ​និង​ហិរញ្ញវត្ថុ​។​

​ភាគី​ទាំងពីរ​បាន​សំរេច​កិច្ចព្រមព្រៀង​មួយ​ស្តីពី​ការ​បន្ត​រក្សា​កំណើន​ពាណិជ្ជកម្ម​ក្នុង​រង្វង់​១០​ទៅ​១៥​ភាគរយ​ក្នុង​មួយឆ្នាំ​។​

​សូមបញ្ជាក់​ថា កិច្ចសហការ​សេដ្ឋកិច្ច ពាណិជ្ជកម្ម​និង​វិនិយោគ​រវាង​វៀតណាម​និង​ឡាវ​បាន​បន្ត​រីកចំរើន​​វិជ្ជមាន​កាលពី​ឆ្នាំទៅ ។​វៀតណាម​បាន​បង្កើត​គំរោង​ថ្មី​ចំនួន​ប្រាំ​នៅ​ឡាវ និង​បាន​បង្កើន​ការវិ​​និយោគ​នៅក្នុង​គំរោង​បួន​ទៀត ដែល​មាន​តំលៃ​សរុប​៧០​លាន​ដុល្លារ ដោយ​កើន​ជិត​៥០​ភាគរយ​ធៀប​នឹង​ឆ្នាំ​២០២១​។​

​ពាណិជ្ជកម្ម​ជា​វិស័យ​លេចធ្លោ​មួយ​នៅក្នុង​ទំនាក់ទំនង​វៀតណាម​-​ឡាវ​ឆ្នាំ​២០២២ ដោយ​ចំណូល​បាន​កើន​ដល់​ជិត​១,៧​ពាន់​លាន​ដុល្លារ កើន​២១​ភាគរយ​លើ​ឆ្នាំ​២០២១​។​

​លោ​កជិញ​និង​លោក ស៊ីផា​ន​ដន​ក៏​បាន​ព្រមព្រៀង​គ្នា​អំពី​សារសំខាន់​នៃ​ការអនុវត្ត​កិច្ចព្រមព្រៀង​កិច្ចសហការ​យុទ្ធសាស្ត្រ​វៀតណាម​-​ឡាវ​សំរាប់​ឆ្នាំ​២០២១-២០៣០ ហើយ​មេដឹកនាំ​ទាំងពីរ​បាន​ចុះហត្ថលេខា​​លើ​កិច្ច​ព្រមព្រៀង​ជាច្រើន​ក្នុង​វិស័យ​ផ្សេងៗ​គ្នា​៕