ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖​ជោគវាសនា​នៃ​ទីប្រជុំជន​រ៉ែ​អំបិល​ដែល​រង​ការបំផ្លិចបំផ្លាញ​មួយ​នៅ​ភាគ​ខាងកើត​អ៊ុយ​ក្រែន​កំពុង​ស្ថិត​ក្នុង​ភាពស្រពេចស្រពិល​កាលពី​ថ្ងៃ​ពុធ​ទី​១១​មករា​នៅ​​ក្នុង​សមរភូមិ​ដ៏​បង្ហូរឈាម​បំផុត​នៃ​ការ​លុកលុយ​របស់​រុស្ស៊ី ខណៈ​ការតស៊ូ​ក្រាញននៀល​របស់​អ៊ុយ​ក្រែ​ន​និង​បញ្ហា​ប្រឈម​ផ្សេងទៀត​បាន​ជំរុញ​ឱ្យ​រដ្ឋាភិបាល​ក្រុង​មូ​ស្គូ​រុះរើ​ថ្នាក់ដឹកនាំ​យោធា​ម្តងទៀត​។​

​កងកម្លាំង​រុស្ស៊ី​បាន​ប្រើប្រាស់​យន្តហោះ​ចម្បាំង កាំភ្លើង​ត្បាល់ និង​គ្រាប់​រ៉ុក្កែត​ដើម្បី​វាយ​ជ្រំ​លើ​ទីប្រជុំជន​សូ​ឡេ​ដា (Soledar) ក្នុង​ការវាយលុក​ឥត​ឈប់ឈរ​មួយ​។​

​ជាមួយគ្នានេះដែរ ក្រសួងការពារជាតិ​រុស្ស៊ី​បាន​ប្រកាស​ដក​តំណែង​ប្រមុខ​កងកម្លាំង​រុស្ស៊ី​នៅ​អ៊ុ​យក្រែន បន្ទាប់ពី​បាន​បំពេញ​ការងារ​នេះ​បាន​ត្រឹម​តែ​បី​ខែ​ប៉ុណ្ណោះ​។​

​មន្ត្រី​យោធា​កំពូល​របស់​រុស្ស៊ី ដែល​ជា​ប្រធាន​អគ្គសេនាធិការ​យោធា លោក​ឧត្តមសេនីយ៍ វ៉ាល់​ឡឺរី ជើ​រ៉ាស៊ី​ម៉ូ​វ (Valery Gerasimov) ត្រូវបាន​តែងតាំង​ជា​អ្នក​ជំនួស​លោក​ឧត្តមសេនីយ៍ សឺ​ហ្គេ ស៊ូ​រ៉ូវី​គីន (Sergei Surovikin) ដែល​ត្រូវ​បាន​បន្ទាប​តំណែង​មកជា​អនុប្រធាន​វិញ​។​

​ក្នុង​អំឡុងពេល​ដ៏​ខ្លី​របស់​គាត់​ក្នុងការ​ត្រួតត្រា​កងទ័ព​នៅ​អ៊ុ​យក្រែន ឧត្តមសេនីយ៍ស៊ូ​រ៉ូវី​គីន​ត្រូវបានទទួលស្គាល់ស្នា​ដៃ​ក្នុង​ការពង្រឹង​ការសម្របសម្រួលនិង​ការគ្រប់គ្រង​។ ប៉ុន្តែ​លោក​ក៏​បាន​ប្រកាស​ដក​ខ្លួន​ចេញ​យ៉ាង​អាម៉ាស់​ក្នុង​ខែវិច្ឆិកា​ពី​ទីក្រុង​ឃើ​សុន​ផងដែរ ដែល​ជា​មជ្ឈមណ្ឌល​ក្នុង​តំបន់​តែមួយគត់​ដែល​កងកម្លាំង​រុស្ស៊ី​រឹបអូស​បាន​ប៉ុន្មាន​សប្តាហ៍​បន្ទាប់​ពី​វិមាន​ក្រឹម​ឡាំង​បាន​កាត់​យក​តំបន់​នេះ​ដោយ​ខុសច្បាប់​។​

​ទន្ទឹមនឹងនោះ ឧត្តមសេនីយ៍ជើ​រ៉ា​ស៊ីម៉ូវ​ត្រូវ​គេ​មើលឃើញ​ថា​ជា​ស្ថាបនិក​កំពូល​នៃ​ការ​លុកលុយ​របស់​រុស្ស៊ី​លើ​អ៊ុយ​ក្រែ​ន​ហើយ​អ្នក​រិះគន់​បាន​ស្តីបន្ទោស​គាត់​ចំពោះ​បរាជ័យ​ផ្នែក​យោធា​របស់​រដ្ឋាភិបាល​ក្រុង​​មូ​ស្គូ​។​

​ក្រសួង​ការពារជាតិ​អង់គ្លេស​បាន​និយាយថា ការដាក់​ឧត្តមសេនីយ៍ជើ​រ៉ា​ស៊ីម៉ូវ​ឱ្យទទួល​បន្ទុកគឺជា “​ការចង្អុលបង្ហាញ​អំពី​ការកើនឡើង​នៃ​ស្ថានភាព​ធ្ងន់ធ្ងរ​ដែល​រុស្ស៊ី​កំពុង​ប្រឈម​មុខ​ហើយ​ជា​ការទទួល​​ស្គាល់​យ៉ាង​ច្បាស់​ថា យុទ្ធនាការ​នេះ​គឺ​មិន​អាច​សម្រេច​គោលដៅ​យុទ្ធសាស្ត្រ​របស់​រុស្ស៊ី​បានទេ​”​។​

​ក្រសួង​បាន​បន្ថែម​នៅក្នុង Tweet មួយ​ថា ពួក​អ្នកជាតិនិយមជ្រុល​និង​អ្នកសរសេរ​ប្លុក​យោធា ដែល​រិះគន់​ឧត្តមសេនីយ៍ជើ​រ៉ា​ស៊ីម៉ូវ ទំនង​ស្វាគមន៍​ដំណឹង​នេះ​ជាមួយ “​ការ​មិន​សប្បាយ​ចិត្ត​ជា​ខ្លាំង​”៕

លោក​ឧត្តមសេនីយ៍ វ៉ាល់​ឡឺរី ជើ​រ៉ាស៊ី​ម៉ូ​វ (​ស្តាំ​) នឹង​ជំនួស​លោក​ឧត្តមសេនីយ៍ សឺ​ហ្គេ ស៊ូ​រ៉ូវី​គីន នៅ​អ៊ុ​យក្រែន