​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រុស្ស៊ី​បាន​និយាយ​កាលពី​ថ្ងៃ​ពុធ​ទី​១១​មករា​ថា ខ្លួន​នឹង​បញ្ជូន​យានអវកាស​ទទេ​មួយ​ទៅ​កាន់​ស្ថានីយ​អវកាស​អន្តរជាតិ (ISS)​នៅ​ខែ​ក្រោយ​ដើម្បី​នាំយក​អវកាស​​យានិក​បីនាក់ ដែល​យាន​វិលត្រឡប់​មក​ផែនដី​វិញ​របស់​ពួកគេ ត្រូវ​បាន​ខូចខាត​ដោយសារ​ការវាយប្រហារ​ពី​អាចម៍ផ្កាយ​តូច​មួយ​។​

​ទីភ្នាក់ងារ​អវកាស​រុស្ស៊ី Roscosmos បាន​ធ្វើ​សេចក្តីប្រកាស​បែបនេះ បន្ទាប់ពី​បាន​ពិនិត្យមើល​ភាព​ស័ក្តិសម​នៃ​ការហោះហើរ​របស់​យានអវកាស Soyuz MS-22 ដែល​បាន​ចត​ជាមួយ​ស្ថានីយ ISS ដែល​បាន​លេច​ធ្លាយ​សារធាតុ​វិទ្យុសកម្ម​ក្នុង​ខែធ្នូ​។​

​រូប​វីដេអូ​បង្ហាញ​យានអវកាស Soyuz MS-22 ដែល​បាន​ចត​ជាមួយ​ស្ថានីយ ISS​លេច​ធ្លាយ​សារធាតុ​វិទ្យុសកម្ម​

​មន្ត្រី Roscosmos​និង​ណា​សាបាន​និយាយ​នៅក្នុង​សន្និសីទ​សារព័ត៌មាន​រួមគ្នា​ថា យានអវកាស​គ្មាន​មនុស្ស Soyuz MS-23 នឹង​ត្រូវ​បញ្ជូន​ទៅ​កាន់​ស្ថានីយ ISS នៅ​ថ្ងៃទី ២០ ខែ​កុម្ភៈ​ដើម្បី​នាំយក​​អវកាសយានិក​រុស្ស៊ី លោក ឌី​មី​ទ្រី ផេ​តេលីន (Dmitry Petelin) និង​លោក សឺ​ហ្គេ ប្រូ​កូប​យ៉េ​វ (Sergei Prokopyev) និង​អវកាសយានិក​របស់​ណា​សា លោក ហ្វ្រែង រូប៊ី​អូ (Frank Rubio) ត្រឡប់​មក​ផែនដី​វិញ​។​

​លោក ចូល ម៉ុន​តាល់​បាណូ (Joel Montalbano) អ្នក​គ្រប់គ្រង​កម្មវិធី ISS នៅ​មជ្ឈមណ្ឌល​អវកាស​ច​ន​សុន (Johnson) នៃ​អង្គការ​ណា​សា​ក្នុង​ទីក្រុង​ហ៊ូស្តុន (Houston) បាន​និយាយថា “​យើង​មិន​ហៅ​វា​ថា​ជា​យាន Soyuz សង្គ្រោះ​នោះ​ទេ​។ ខ្ញុំ​ហៅ​វា​ថា​យាន Soyuz ជំនួស​”​។​

“​ឥឡូវនេះ​អវកាសយានិក​ទាំងអស់​មាន​សុវត្ថិភាព​នៅលើ​ស្ថានីយ​អវកាស​”​។​

​យាន MS-22 បាន​ដឹក​លោក​ផេ​តេ​លីន លោកប្រូ​កូប​យេ​វ និង​លោក​រូប៊ី​អូ​ទៅកាន់​ស្ថានីយ ISS ក្នុង​ខែកញ្ញា បន្ទាប់​ពី​ហោះ​ចេញពី​ស្ថានីយ​បៃ​គូ​នួ​កូ​ស្មូ​ដ្រូ​ម (Baikonur Cosmodrome) ដែល​ដំណើរការ​ដោយ​រុស្ស៊ី​នៅ​ប្រទេស​កា​ហ្សាក់​ស្ថាន​។​

​ពួកគេ​គ្រោង​នឹង​ត្រឡប់​មក​ផែនដី​វិញ​តាម​យានអវកាស​ដដែល​នេះ​ក្នុង​ខែ​មីនា ប៉ុន្តែ​ការ​ស្នាក់នៅ​របស់​ពួកគេ​នៅលើ​ស្ថានីយ ISS ឥឡូវ​នេះ​នឹង​ត្រូវ​បន្លាយពេល​ច្រើន​ខែ​បន្ថែមទៀត ដោយសារ​តែ​ខូច​យាន​៕

​យានអវកាស​គ្មាន​មនុស្ស Soyuz MS-23 នឹង​ត្រូវ​បញ្ជូន​ទៅ​កាន់​ស្ថានីយ ISS នៅ​ថ្ងៃទី ២០ ខែ​កុម្ភៈ