ដោយៈ ទេព មង្គល / ភ្នំពេញៈ ក្រសួងសុខាភិបាល បានចេញ​សេចក្តី​ជូន​ព័ត៌មាន មួយ នៅ​ថៃ្ង​ព្រហស្បតិ៍ ទី​១២ ខែមករា ឆ្នាំ​២០២៣​នេះ ដោយ​ជម្រាបជូន​អស់លោក លោកស្រី វេជ្ជបណ្ឌិត ឱសថការី ដែល​ទទួលខុសត្រូវ​គ្រឹះស្ថាន​អាហរ័ណ នីហរ័ណ ឱសថ គ្រឹះស្ថាន​លក់​ឱសថ អាជីវករ និង​ប្រជាពលរដ្ឋ​ទាំងអស់ ឱ្យបាន​ជ្រាបថាៈ យោងតាម RAPID ALERT SYSTEM របស់​អង្គការ​សុខភាព​ពិភព លោក ចុះ​ថ្ងៃទី​១១ ខែមករា ឆ្នាំ​២០២៣. បាន​រកឃើញថា ឱសថ AMBRONOL SYRUP ដែលមាន​ផ្ទុក​សារធាតុ​សកម្ម​ឱសថ Ambroxol Hydrochloride 15mg/5ml ផលិត​ដោយ​រោងចក្រ MARION BIOTECH PVT. LTD, India (​មាន​លេខ​ឡូ​តិ៍ AAS2103, AAS2201, AAS2202 និង AAS2204 ដែល​កំពុង​ចរាចរ នៅ​ប្រទេស អ៊ូ​បេ​គី​ស្ថាន (Uzbekistan) មាន​ផ្ទុក​សារជាតិ​គីមី Diethylene Glycol និង Ethylene Glycol លើស​កម្រិត​បទដ្ឋាន​ស្តង់ដារ ដែល​ក្បួនច្បាប់​ឱសថ (Pharmacopoeia) បានអនុញ្ញាត​។

ក្រសួងសុខាភិបាល សូមបញ្ជាក់ថា ” សារជាតិ​គីមី Diethylene Glycol និង Ethylene Glycol លើស​កម្រិត​បទដ្ឋាន ស្តង់ដារ អាច​បង្ក​ឱ្យ​គ្រោះថ្នាក់​ធ្ងន់ធ្ងរ​ដល់​កុមារ ឬ​ឈានដល់​បាត់បង់​ជីវិត ព្រមទាំង​មាន​ផល​រំខាន​ធ្ងន់ធ្ងរ ដូចជា ឈឺពោះ ក្អួត រាក ពិបាក​នោម ឈឺក្បាល ស្ថានភាព​ផ្លូវចិត្ត​ប្រែប្រួល និង​វិបត្តិ​តម្រងនោម​ស្រួចស្រាល់ ដែល​អាច​បង្ក​ឱ្យ ស្លាប់​បាន​។​

​ដោយឡែក ឱសថ AMBRONOL SYRUP មាន​លេខ​ឡូ​តិ៍ AAS2203 កំពុង​ចរាចរ​នៅលើ​ទីផ្សារ​ព្រះរាជាណាចក្រ​កម្ពុជា ដែល​នាំចូល​ដោយ​គ្រឹះស្ថាន អាហរ័ណ នីហរ័ណ​ឱសថ Quramax (Cambodia) Limited នោះ ក្រសួងសុខាភិបាល បាន​មាន​វិធាន​ការឱ្យ​គ្រឹះស្ថាន​មួយ​នេះ ត្រូវ​ប្រមូល​មកវិញ នូវ​ឱសថ​ខាងលើនេះ ពី​គ្រឹះស្ថាន​លក់​ឱសថ (​ឱសថស្ថាន​) នានា ក្នុង​ព្រះរាជា​ណា ចក្រ​កម្ពុជា ដោយ​អនុលោម​តាមច្បាប់ ស្តីពី​វិសោធនកម្ម​ច្បាប់ ស្តីពី​ការគ្រប់គ្រង ឱសថ និង​ដើម្បី​ធានា បាន​នូវ​សុវត្ថិភាព ដល់​អ្នកប្រើប្រាស់ ។​

​ក្រសួងសុខាភិបាល បាន​ព្រមាន​ថា គ្រប់​មន្ទីរពេទ្យ​រដ្ឋ ឯកជន គ្លីនិក បន្ទប់​ពិគ្រោះ ជំងឺ បន្ទប់​ព្យាបាល​ជំងឺ គ្រប់​សេវា សុខាភិបាល​ផ្សេងៗ​ទៀត និង​សាធារណជន ត្រូវ​បញ្ឈប់​ការប្រើប្រាស់​ឱសថ ខាងលើ ចាប់ពី​ថ្ងៃ​ចេញ​សេចក្តី​ជូន​ព័ត៌មាន​នេះ តទៅ​។ ចំណែក​គ្រឹះស្ថាន​លក់​ឱសថ (​ឱសថស្ថាន​) ទាំងអស់ ត្រូវ​បញ្ឈប់​ការលក់ ឱសថ ខាងលើនេះ ចាប់ពី​ថ្ងៃ​ចេញ​សេចក្តី​ជូន​ព័ត៌មាន នេះ​តទៅ​។​

​ក្រសួងសុខាភិបាល ក៏បាន​ព្រមាន​ថា នឹងមាន​វិធានការ​តឹងរ៉ឹង តាមផ្លូវ​ច្បាប់ ចំពោះ​គ្រឹះស្ថាន អាហរ័ណ នីហរ័ណ​ឱសថ ឱសថស្ថាន ឱសថស្ថាន​រង ទាំងឡាយណា ដែល​នៅតែ​បន្ត​ការលក់​ឱសថ ខាងលើនេះ​៕/V