​ប្រែ​សម្រួល : កញ្ញា​ដា​លី​ស (​បាងកក​ប៉ុស្តិ៍​) ៖​មន្ត្រី​ថៃ​បាន​រកឃើញ​ទ្រព្យសម្បត្តិ​ជា​កម្មសិទ្ធិ​របស់​កូនៗ​របស់​មេដឹកនាំ​របប​យោធា​មី​យ៉ាន់​ម៉ា​ក្នុងអំឡុង​ការបង្ក្រាប​មួយ​លើ​អគារ​អា​ផាត​មែន​របស់​សេដ្ឋី​មី​យ៉ាន់​ម៉ា​​ម្នាក់​នៅ​ទីក្រុង​បាងកក ដែល​រង​ការចោទប្រកាន់​ពី​បទ​ជួញដូរ​គ្រឿងញៀន​និង​លាង​លុយ នេះ​បើ​យោង​តាម​កំណត់ហេតុ​ផ្លូវការ​មួយ និង មនុស្ស​ពីរ​នាក់ ដែល​ដឹង​អំពី​ករណី​នេះ​។​

​ប័ណ្ណ​ម្ចាស់​កម្មសិទ្ធិ​ដីធ្លី​និង​ក្រដាសប្រាក់​ជា​កម្មសិទ្ធិរ​បស់​កូនស្រី​និង​កូនប្រុស​របស់​ឧត្តមសេនីយ៍​ជាន់ខ្ពស់ មីន អ៊ុង​ហ្លាំង ត្រូវបាន​រកឃើញ​នៅផ្ទះ​របស់​សេដ្ឋី ទុន មីន ឡាត់ (Tun Min Latt) អាយុ ៥៣ ឆ្នាំ នៅ​ពេល​គាត់​ត្រូវបាន​ចាប់ខ្លួន​កាលពី​ខែ​កញ្ញា​រួម​ជាមួយ​ជនជាតិ​ថៃ​បី​នាក់​ទៀត​ពី​បទ​សមគំនិត​ជួញដូរ​គ្រឿងញៀន​និង​លាង​លុយ​។​

​មនុស្ស​បីនាក់​ដែល​ដឹង​អំពី​បញ្ហា​នេះ​បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័រ​កាលពី​ឆ្នាំមុន​ថា លោក ទុន មីន ឡាត់ ដែល​មាន​ផលប្រយោជន៍​នៅក្នុង​វិស័យ​សណ្ឋាគារ ថាមពល​និង​រ៉ែ​គឺជា​មនុស្ស​ជិតស្និទ្ធ​​របស់លោក មីន អ៊ុង​ហ្លាំង ដែល​បាន​ដណ្តើម​អំណាច​ពី​រដ្ឋាភិបាល​ជាប់ឆ្នោត​បែប​ប្រជាធិបតេយ្យ​ក្នុង​ខែ​កុម្ភៈ ឆ្នាំ​២០២១​។ ប្រភព​និយាយ​កាលពី​ថ្ងៃ​ពុធ​ទី​១១​មករា​ថា​លោក​មីន​ឡាត់​ជា​អ្នក​ទិញគ្រឿង​​ផ្គត់ផ្គង់​ដល់​យោធា​។ រូបភាព​អាច​រកបាន​ជា​សាធារណៈ​មួយ​បានបង្ហាញ​ពួកគេ​នៅ​ជាមួយគ្នា​នៅ​ពិព័រណ៍​យោធា​មួយ​ក្នុង​ឆ្នាំ​២០១៩​។​

​លោក ទុន មីន​ឡាត់ បច្ចុប្បន្ន​កំពុង​ជាប់​ឃុំ​នៅ​មុនពេល​ឡើង​សវនាការ ហើយ​មេធាវី​របស់​គាត់​មិនអាច​ទាក់ទង​សុំ​ការបំភ្លឺ​បាន​ទេ​។

​កូន​ទាំង​ពីរ​នាក់​របស់​លោក​មីន អ៊ុង​ហ្លាំង​មិន​ប្រឈម​ចំណាត់ការ​ផ្លូវច្បាប់​ជុំវិញ​ទ្រព្យសម្បត្តិ​នេះ​ទេ នេះ​បើ​យោង​តាម​មនុស្ស​ពីរ​នាក់ ដែល​ដឹង​ករណី​នេះ​។ ពួកគេ​បាន​បន្ថែមថា​អាជ្ញាធរ​ថៃ​មិន​បាន​ចាត់​​ទុក​ពួកគេ​ជាប់​ពាក់ព័ន្ធ​នឹង​ការស៊ើបអង្កេត​ប្រឆាំងនឹង​លោក ទុន មីន​ឡាត់ ទេ​។​

​កូនប្រុស​របស់​លោក​មី​ន អ៊ុង​ហ្លាំង ឈ្មោះ អ៊ុង ព្យែ សូ​ន (Aung Pyae Sone) និង​កូនស្រី​ឈ្មោះ ឃី​ន ធី​រី ថេត មន (Khin Thiri Thet Mon)​ដែល​រួម​គ្នា​ជាមួយ​ឪពុក​របស់​ពួកគេ​ត្រូវបាន​ដាក់​​ទណ្ឌកម្ម​ដោយ​សហរដ្ឋ​អាម៉េរិក​និង​កាណាដា ពុំ​បាន​ឆ្លើយតប​នឹង​សំណូមពរ​សុំ​ការបំភ្លឺ​ពី​រ៉​យ​ទ័រនោះ​ទេ​។ សហរដ្ឋ​អាម៉េរិក​និយាយថា ពួកគេ​មាន​មុខ​ជំនួញ ដែល​”​ទទួល​ផលប្រយោជន៍​ដោយ​ផ្ទាល់​ពី​តំណែង​​និង​ឥទ្ធិពល​របស់​ឪពុក​ពួកគេ​”​។

​ឪពុក​របស់​ពួកគេ​ក៏​មិន​អាច​ទាក់ទង​សុំ​ការបំភ្លឺ​បានដែរ ហើយ​សារ​ដែល​ផ្ញើ​ទៅ​របប​យោធា​មី​យ៉ាន់​ម៉ា​ក៏​មិន​បាន​ឆ្លើយតប​នោះ​ដែរ​៕

ទ្រព្យសម្បត្តិ​របស់​កូនប្រុស​ស្រី​របស់​លោក​មីន អ៊ុង​ហ្លាំង ត្រូវបាន​រកឃើញ​នៅ​អគារ​អា​ផាត​មែន​របស់​សេដ្ឋី​មី​យ៉ាន់​ម៉ា លោក ទុន មីន ឡាត់